Abahawe akazi n’ingurane ku rugomero rwa Nyabarongo II basabwe kubibyaza umusaruro

  • Imvaho Nshya
  • Nyakanga 15, 2023
  • Hashize amezi 11
Image

Abaturage baturiye ahubakwa urugomero rw’amashanyarazi rwa Nyabarongo II bahabonye akazi basabwe gukoresha neza amafaranga bakuramo kimwe n’abahawe ingurane bakayabyaza umusaruro, bityo bakiteza imbere.

Abo baturage babisabwe na Guverineri w’Intara y’Amajyaruguru Nyirarugero Dancille ubwo yasuraga abaturage bo mu Mirenge ya Ruli na Muhondo, Utugari twa Rwesero na Musagara mu Karere ka Gakenke, aganira na bo ku bikorwa by’Umushinga w’Urugomero rw’amashanyarazi rwa Nyabarongo II, ruri kubakwa muri ako gace.

Guverineri w’Intara y’Amajyaruguru yibukije abo baturage ko umushinga wo kubaka urwo Rugomero rwa Nyabarongo II ari umushinga w’Igihugu ugamije kongera amashanyarazi mu Gihugu kandi na bo ubafitiye akamaro kanini cyane kuko hari benshi muri bo bawubonyemo akazi. 

Yagize ati: “Ababonye ingurane ku bikorwa byabo ndetse n’ababonye akazi muri uyu mushinga w’Urugomero rw’amashanyarazi rwa Nyabarongo II murakangurirwa gukoresha neza ayo mahirwe mukarushaho kwiteza imbere”.

Guverineri Nyirarugero yibukije abaturage ko bagomba  kurangwa n’isuku no kuyigira umuco, kwirinda ubusinzi kuko bwangiza ubuzima kandi bukadindiza iterambere, kurwanya imiririre mibi n’igwingira mu bana bato, kumenya no gusobanukirwa neza imihigo y’Akarere no kuyigiramo uruhare n’ibindi.

Abaturage batanze ibyifuzo, bagarutse ku kubakirwa isoko rya kijyambere muri Santeri ya Ruli, kwihutisha igikorwa cyo guhabwa ingurane ku byabaruwe ahazakorerwa umushinga w’Urugomero rwa Nyabarongo II ku batarayihabwa, no gufashwa kuzuza dosiye z’imitungo izagendera mu bikorwa byo kubaka urwo Rugomero, ku batarazuzuza.

Banabajije ibibazo muri byo bagarutse ku muhanda wa Giticyinyoni-Ruli wafunzwe, wabahuzaga n’Akarere ka Rulindo n’Umujyi wa Kigali ufunze bikabangamira imigenderanire.

Guverineri Nyirarugero yabamaze izo mpungenge, aho yababwiye ko guhera ubu bagiye kujya bakoresha Umuhanda Ruli-Muhondo-Kirenge-Kigali kandi ko na wo ari nyabagendwa.

Yongeyeho ko mu minsi iri imbere uzashyirwamo kaburimbo, ukarushaho kwihutisha ingendo bakora bajya mu Mujyi wa Kigali.

Guverineri w’Intara y’Amajyaruguru Nyirarugero Dancille aganiriza abaturage bo mu Karere ka Gakenke ku bijyanye n’urugomero rw’amashanyarazi rwa Nyabarongo II

Yanditswe na NYIRANEZA Judith

  • Imvaho Nshya
  • Nyakanga 15, 2023
  • Hashize amezi 11
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE