Abagore n’abagabo, ntawuhejwe mu mirimo yo mu rugo-Minisitiri Bayisenge

  • NTAWITONDA JEAN CLAUDE
  • Ukwakira 16, 2022
  • Hashize imyaka 2
Image

Minisitiri w’Uburinganire n’Iterambere ry’Umuryango Prof. Bayisenge Jeannette, yavuze ko imirimo yo mu rugo ntawe uyihejwemo yaba  umugabo cyangwa umugore; iyo bose bayifatanyije bigira uruhare rukomeye mu iterambere ry’umuryango.

Yagize ati: “Iyo habayeho kuyifatanya ku  mugore n’ umugabo abana babyungukiramo kuko bibona mu babyeyi bombi kandi aba babyeyi bakabona umwanya wo gukora imirimo yinjiriza urugo rugatera imbere mu buryo bwihuse”.

Minisitiri Prof. Bayisenge yabigarutseho ku wa 15 Ukwakira 2022, mu birori byo kwizihiza Umunsi Mpuzamahanga w’Umugore wo mu cyaro. Ku rwego rw’Igihugu wizihirijwe  mu Kagari ka  Musebeya, Umurenge wa Kigoma, mu Karere ka Huye. 

Yakomeje agira ati: “Ni imirimo myiza ituma urugo rubaho; hatabayeho guteka ibiribwa mu rugo abantu ntibabaho batariye, hatabayeho kurera abana bategurirwa ejo hazaza ntabwo umuryango wabaho. Icyo dukora ni ukongera gushishikariza Abanyarwanda muri rusange, abagore n’abagabo ko iyo mirimo ntawe uyihejwemo, ka kanya umugore yayimaragamo iyo bafatanyije n’ umugabo, ajya hanze agakora”.

Yasobanuye ko muri uko kuyifatanya hazamo no kuyoroshya nko guteka bikaba byakorwa hifashishijwe rondereza, uko iterambere riza hakaba hanakoreshwa umuriro cyangwa gazi, ibi byose bigatuma iriya mirimo itwara umwanya mutoya.

Ati: “Ibikoresho byatanzwe hariya (amashyiga ya rondereza) ni ibitworohereza kugira ngo na wa mugabo atazajya guhuha mu ziko n’inkwi zitumye n’ibyatsi, ubwo ishyiga rya rondereza ryabonetse biroroshye kuritekaho tuzabona n’abagabo benshi badufasha muri iyo mirimo. Ntabwo bigayitse!” 

Prof. Bayisenge, yagaragaje ko kuba abashakanye babura buriya bufatanye ari kimwe mu byonnyi bibangamiye umuryango kuko usanga umugore aheranwa n’imirimo yo mu rugo  idahemberwa (imirimo yahoze yitwa ko ari iy’umugore muri sosiyete nyarwanda)  bigatuma atabona umwanya wo gukora iyinjiza amafaranga.

Yaboneyeho kugaragaza n’izindi mbogamizi zirimo ko umugore akora imirimo ya nyakabyizi ku gipimo kiri hejuru, kubura ubushobozi n’ubumenyi buhagije bwo kugera ku nguzanyo n’imikoreshereze y’ikoranabuhanga itarazamuka.

Ikindi ni uko abagore benshi bo mu cyaro bakora ubuhinzi bugarukira ku kubona ibiryo gusa rimwe na rimwe biba bitanahagije; atari bwa buhinzi buzana amafaranga ugasanga bunahungabanywa n’imihindagurikire y’ikirere.

Ibindi bibazo bishingiye ku makimbirane. Ati: “Iyo hajemo amakimbirane kwa gukorera hamwe kugira ngo umuryango utere imbere ntabwo bikunda, ndetse ni bwo utangira kubona abana bagwingiye, barwaye imirire mibi, bataye ishuri bagiye mu muhanda kubera ko ababyeyi bahugiye mu makimbirane za nshingano zo kwita ku mwana ntizibeho”.

Ati: “Niba dufite imbogamizi tunibuka ko dufite, ni ukugira ngo tutirara kuko u Rwanda rudutoza gukora cyane no kureba kure”.

Minisitiri w’Uburinganire n’Iterambere ry’Umuryango Prof. Bayisenge, avuga ko nubwo hakiri imbogamizi  ku iterambere ry’umuryango ariko hari byinshi byakozwe mu kuwitaho no kwita  ku iterambere ry’umugore n’ umwana w’umukobwa ariko bitavuze ko abana b’ abahungu n’abagabo babibagiwe ahubwo ari uko umugore yagiye ahura n’inzitizi.

Yavuze ko hari gahunda zashyizweho zo guhangana na ziriya mbogamizi; ari zo  gukorera mu matsinda, Umugoroba w’imiryango, hashyizweho inzego zihagarariye abagore, Inshuti z’umuryango, gukurikirana imiryango irimo amakimbirane igahabwa inyigisho zo kubana neza, gushyigikira no kumenyekanisha udushya twahanzwe n’abaturage bagamije kwishakamo ibisubizo.

Kuba umugore yakora imirimo migari kandi yinjiza ifaranga ni ibintu bishoboka nk’uko byagarutsweho na Mukadusabe Bellancile wo mu Kagari ka Rukira mu Murenge wa Huye, akora umwuga wo gusudira. Avuga ko mbere yasabaga umugabo we buri kintu cyose, ariko ubu bafatanya guteza imbere urugo. 

Ati: “Guhera ku mboga kugera no ku myenda nabisabaga umugabo, ariko ubu ntamenya uko byagenze, ndabyigurira nanamutanga kubona amafaranga y’ishuri y’abana sinirirwa mubaza ngo bigende gute, ndamubwira nti nakunganiye”.  

Nyandwi Jean Damascene na we ni umwe mu bahamya ibyiza byo gufatanya ku bashakanye, ati: “[…], umugore ntiyankoreraga ku ikawa, ariko ubu turajyana tugasarura akagenda akajya kuzigurisha, amafaranga avuyemo tukayahingisha, abana bakajya kwiga, mituweli nyitangira ku gihe. Nkaba mbwira abagabo mbagira inama ko bahinduka kuko badahindutse nta terambere babona”.  

Mu kwizihiza uyu munsi ufite insanganyamatsiko  igira iti: “Iterambere ry’Umugore wo mu cyaro inkingi y’ubukungu bw’Igihugu cyacu”, hasezeranye byemewe n’amategeko imiryango 153.

Ku bufatanye n’abafatanyabikorwa banyuranye, habayeho no kuremera imiryango ihabwa inka muri gahunda ya Girinka, hari iyahawe amashyiga arondereza ibicanwa, abahawe imashini zo kudoda imyenda, amatsinda y’abagore bo mu cyaro yongerewe igishoro, yose hamwe yahawe amafaranga agera kuri miliyoni 2.5.

  • NTAWITONDA JEAN CLAUDE
  • Ukwakira 16, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE