Abagore 65% mu Rwanda bashyigikiye gukubitwa n’abagabo

  • NTAWITONDA JEAN CLAUDE
  • Ugushyingo 16, 2022
  • Hashize imyaka 2
Image

Minisiteri y’Uburinganire n’Iterambere ry’Umuryango (MIGEPROF) isanga hakiri urugendo rurerure mu kwimakaza ihame ry’uburinganire ku buryo bwuzuye mu Rwanda, mu gihe umubare munini w’abagore ari ushyigikiye gukubitwa n’abagabo ku mpamvu zimwe na zimwe.

Byagarutsweho na Minisitiri w’Uburinganire n’iterambere ry’Umuryango Prof. Bayisenge Jeannette, ubwo yitabaga Inteko Ishinga Amategeko ku wa Kabiri, wagarutse ku bushakashatsi ku buzima n’imibereho y’abaturage (DHS 2020) bwatangajwe n’Ikigo cy’Igihugu cy’Ibarurishamibare mu Rwanda (NISR).

Ubwo bushakashatsi bwerekana ko 65% by’abagore babajijwe bemeje ko umugore ashobora gukubitwa kubera impamvu runaka, aho 18% bavuze ko bashyigikiye ko umugore yacishwaho akanyafu igihe yaba yateguye amafunguro nabi.

Abagore ni bo benshi bashyigikiye gukubitwa kurusha abagabo babajijwe kuri iyo ngingo ijyanye no guteka, kuko abagabo 2% gusa ari bo bemeza ko umugore akwiye kubizira agakosozwa inkoni.

Abagore 31%i ni bo bemeje ko umugore akwiye gukubitwa igihe atonganyije umugabo we, na ho abagabo 6% gusa ni bo basanga ari uko byagakwiye kugenda. 

Prof Bayisenge yagize ati: “Mu gihe umugore atitaye ku bana neza, abagore 40% babajijwe bavuze ko kumukubita byaba byumvikana, mu gihe abagabo bangana na 13% ari bo babyemeza. Amahirwe ahari, ni uko abagabo bake ari bo basanga hari impamvu zatuma umugore akubitwa.”

Hejuru ya 61% by’abagore ni bo basanga umugore waciye inyuma umugabo we akwiye gukubitwa, mu gihe abagabo bangana na 36% mu babajijwe ari bo babibona muri ubwo buryo.

Prof. Bayisenge yakomeje agira ati: “Murazi aho twavuye mu kwigisha ibijyanye n’uburinganire, none ni hano turi uyu munsi. Niba tugifite 65% by’abagore bavuga ko bashobora gukubitwa kubera impamvu runaka, tuzirikane ko abo bagore ni bo bagira uruhare runini mu kwigisha abana babo.”

Minisitiri Prof. Bayisenge yongeyeho ko imyitwarire y’abagore igira uruhare mu myumvire idahwitse irimo nko kumva ko hari imirimo imwe n’imwe igenewe abagore idashobora gukorwa n’abagabo.

Ati: “Ndagira ngo mbereke ko urugamba turimo kurwana rutoroshye nk’uko dushobora kubyibwira. Imyumvire ntishobora guhinduka mu ijoro rimwe, bikaba bibangamira gahunda zitandukanye zashyizweho na Leta.”

Minisitiri Bayisenge yagaragaje ko Leta ikomeje gahunda yo kumvikanisha neza ihame ry’uburinganire, abashakanye bakirinda guhangana biturutse ku kutamenya icyo politiki y’uburinganire n’ubwuzuzanye igamije.

Gusa nubwo bimeze bityo, u Rwanda ruza ku mwanya wa mbere muri Afurika mu birebana no kwimakaza ihame ry’uburinganire, ndetse rukaza no ku mwanya wa gatandatu ku Isi nk’uko byemejwe n’ubushakashatsi bw’Ihuriro Mpuzamahanga ry’Ubukungu (WEF) mu biberabana n’uko ibihugu bihanganye no kugabanya icyuho mu buringanire hagati y’abagore n’abagabo.

WEF isanga bishobora kuzatwara nibura imyaka132 kugira ngo icyuho cy’ubusumbane hagati y’abagore n’abagabo kibashe kuvaho burundu haba mu rwego rw’ubukungu, kugira uruhare muri politiki, uburezi n’izindi nzego.

Iryo huriro rihamya ko kuziba icyuho cy’ubusumbane mu birebana n’ubukungu ubwabyo bishobora kuzatwara nibura imyaka 200 kugira ngo bigerweho.

Abagize Inteko Ishinga Amategeko, Umutwe w’Abadepite, bagaragaje ko hakwiye kwimakazwa gahunda zigamije kwishakamo ibisubizo nk’uko byagenze mu kuburanisha imanza za Gacaca.

Depite Euthalie Nyirabega yagize ati: “Mu Rwanda twabonye urugero rwiza; mu gihe abakora mu rwego rw’ubutabera bavugaga ko imanza z’abakekwaho ibyaha bya Jenoside zashoboraga gutwara imyaka 100, binyuze mu Nkiko Gacaca zatwaye imyaka mikeya.”

Depite Justine Mukobwa na we yongeyeho ko niba kuziba icyuho kikiri mu buringanire bw’abagore n’abakobwa bishobora kuzatwara imyaka 200,   hakwiye gukoreshwa uburyo butanditse ndetse inzego zitandukanye zikabigiramo uruhare ziyobowe na Minisiteri ifite uburinganire n’iterambere ry’umuryango mu nshingano.

Theogène Munyangeyo yavuze ko gahunda zo kwishakamo ibisubizo zikwiye kwegerezwa abaturage zigahera mu muryango, mu rwego rwo gukemura ibibazo bifitanye isano n’ubusumbane b’igitsina gabo n’igitsina gore muri sosiyete nyarwanda.

  • NTAWITONDA JEAN CLAUDE
  • Ugushyingo 16, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE