BAL 2023: Amakipe yose azakina imikino ya nyuma yamaze kumenyekana

Kuva taliki 26 Mata kugeza 06 Gicurasi 2023 i Cairo mu Misiri habereye imikino y’amajonjora yo mu itsinda B “Nile Conference”  mu  mikino y’Afurika “Basketball Africa League (BAL 2023)”.

Nyuma y’iyi mikino, ikipe ya  Petro de Luanda (Angola), Al Ahly (Egypt), CFV Beira (Mozambique) na  Cape Town Tigers (South Africa) yabonye itike yo kuzakina imikino ya nyuma ya BAL 2023 izabera i Kigali  taliki 20 kugeza 27 Gicurasi 2023.  Aya makipe akaba yiyongereye ku yandi 4  ari yo Stade Malien (Mali), AS Douanes (Senegal), REG BBC (Rwanda) na ABC Fighters (Côte d’Ivoire) yabonye itike  nyuma yo kwitwara neza mu mikino yo mu itsinda A “Sahara Conference” yabereye i Dakar muri Senegal kuva taliki 11 kugeza 21 Werurwe 2023.

Iyi mikino yo mu itsinda B “Nile Conference” yabereye muri  Hassan Moustafa Sports Hall  yahuje amakipe 6 yagombaga guhatanira imyanya 4 ari yo Al Ahly (Egypt), Cape Town Tigers (South Africa), City Oilers (Uganda), CFV Beira (Mozambique), Petro de Luanda (Angola) na  SLAC (Guinea).

Aya makipe  yakinnye hagati yayo maze 4 ya mbere aba ari yo abona itike yo kuzakina imikino ya nyuma.

Ikipe ya Petro de Luanda ni yo yitwaye neza isoza iyoboye urutonde aho yatsinze imikino yose uko ari 5. Iyi kipe yatsinze City Oilers amanota 89 kuri 71,  itsinda CFV Beira amanota 101 kuri 76, yatsinze Cape Town Tigers amanota 87 kuri 48, itsinda SLAC  amanota 95 kuri 78 nyuma itsinda Al Ahly amanota 91 kuri 90.

Ku mwanya wa kabiri hasoreje ikipe ya Al Ahly aho yatsinze imikino 4 muri 5. Ku mwanya wa 3 hasoreje ikipe ya CFV Beira yatsize imikino 2 muri 5, ku mwanya wa 4 hasoreza Cape Town Tigers na yo yatsinze imikino 2 muri 5. Aya makipe akaba ari yo azakina imikino ya nyuma. Andi makipe abiri, SLAC  yasoreje ku mwanya wa 5 na City Oilers yasoreje ku mwanya wa 6  zatsinze umukino umwe.

Uko imikino ya nyuma izagenda

Nyuma y’iyi mikino y’amajonjora mu matsinda yombi “Sahara Conference”   na “Nile Conference” , imikino ya nyuma biteganyijwe ko izabera muri BK Arena i Kigali kuva taliki 20 kugeza 27 Gicurasi 2023.

Mu mikino ya ¼ , taliki 20 Gicurasi 2023, ikipe ya Stade Malien izakina na Cape Town Tigers naho ikipe ya REG BBC ikine na Al Ahly.

Taliki 21 Gicurasi 2023, ikipe ya AS Douanes izakine na CFV Beira naho ikipe ya Petro de Luanda ikine na ABC Fighters.

Taliki 24 Gicurasi 2023 hazaba imikino ya ½ cy’irangiza aho ikipe izatsinda hagati ya REG BBC na Al Ahly izahura n’izatsinda hagati ya Stade Malien na Cape Town Tigers. Undi mukino uzahuza ikipe izatsinda hagati ya AS Douanes na CFV Beira n’izatsinda hagati ya Petro de Luanda na ABC Fighters.

Taliki 26 Gicurasi 2023 hazaba umukino wo guhatanira umwanya wa 3  naho taliki 27 Gicurasi 2023 habe umukino wa nyuma wo guhatanira igikombe.

Irushanwa riheruka “BAL 2022” ryegukanwe n’ikipe ya US Monastir yo muri Tunisia itsinze ku mukino wa nyuma ikipe  ya Petro de Luanda yo muri Angola amanota  83 kuri 72, iyi kipe ya US Monastir yabaye iya kabiri ubwo BAL yakinwaga ku nshuro ya mbere muri 2021 ikegukana igikombe giheruka  cya BAL 2022 nta bwo yashoboye kubona itike yo kuzakina iyi mikino ya nyuma uyu mwaka wa 2023.