Abanyeshuri 68 ba Rwanda Coding Academy batangiye Itorero Intagamburuzwa

Abanyeshuri 68 basoje amasomo muri Rwanda Coding Academy, bagiye gukomereza muri Rwanda Institute of Computing, batangiye Itorero Intagamburuzwa rigamije kubatoza indangagaciro z’umuco nyarwanda, gukomeza gusigasira ubumwe bw’Abanyarwanda no kubafasha gusobanukirwa uruhare rwabo mu iterambere ry’Igihugu.

Iri torero ryatangijwe ku wa Gatanu, tariki ya 13 Ugushyingo 2026, mu Kigo cy’Ubutore cya Nkumba giherereye mu Karere ka Burera, rikaba rizamara ibyumweru bibiri.

Rizibanda ku kubakangurira gusigasira ubumwe bw’Abanyarwanda, kwimakaza indangagaciro na kirazira z’umuco nyarwanda, kurangwa n’imico mbonera no kumva neza inshingano bafite mu kubaka igihugu.

Umuyobozi Mukuru w’Urwego rw’Igihugu rushinzwe Itorero n’Umuco, Dr. Nelson Mbarushimana, yasabye aba banyeshuri gukoresha neza amasomo bazahabwa mu Itorero, kugira ngo bazavemo Abanyarwanda buzuye, bahuje ubumenyi bw’ikoranabuhanga n’indangagaciro z’umuco nyarwanda.

Yashimangiye ko ubumenyi bakuye muri Rwanda Coding Academy ari intangiriro y’urugendo rwabo, bityo bakwiye no kungukira mu Itorero ubumenyi buzabafasha gukoresha neza impano n’ubumenyi bafite mu guteza imbere igihugu.

Yagize ati: “Ntore mwitabiriye iri Torero, ndabashimira cyane kuko mwongeye guhamya ko mwifuza gukomeza mu murongo mwatangiye wo kuba ku ruhembe rw’indashyikirwa n’inzobere mu ikoranabuhanga, nk’uko umubyeyi wacu ari we Gihugu ari byo abitezeho.

“Ndongera kubibutsa ko ubumenyi mwakuye muri Rwanda Coding Academy butari buhagije, ahubwo mu Itorero muzahavoma ubundi bumenyi buzabafasha kuba Abanyarwanda buzuye bazagira uruhare mu kubaka igihugu, nk’uko Nyakubahwa Perezida Paul Kagame yabigarutseho ubwo yasozaga Itorero Indangamirwa icyiciro cya 13.”

Dr. Mbarushimana yabasabye kurangwa n’indangagaciro zirimo kwiyoroshya, kubahiriza igihe, gukorana umwete n’ubwitange, kwihesha agaciro no guha agaciro ibyo bakora byose.

Yabasabye kandi gutega amatwi, gukurikiza inyigisho bazahabwa no kwirinda imyitwarire yatuma batatira inshingano n’indahiro byabazanye mu Itorero.

Ati: “Ndabasaba kuzarangwa n’indangagaciro zo kwiyoroshya, gukorera ku gihe, gukorana umwete n’ubwitange, kwihesha agaciro mu byo mukora byose, gutega amatwi no kumva neza mwirinda icyatuma mutatira igihango gitumye muri hano, kuko ni mwe mizero y’igihugu mu ikoranabuhanga rizafasha kugeza igihugu mu cyerekezo cyifuzwa na buri wese.”

Yongeyeho ko muri iyi minsi bazamara mu Itorero bakwiye kugira umwete mu masomo bazahabwa, kugira ngo bazasohoke bafite ubumenyi n’ubushobozi bizabafasha guhangana ku isoko ry’umurimo.

Ati: “Iyi minsi muzamara hano mu Itorero muzakora cyane kugira ngo muzasohoke muri abantu bazima kandi bashoboye ku isoko ry’umurimo, muvome ubumenyi bwiza ndetse ntihagire n’umwe uzasigara inyuma cyangwa ngo avomere mu rutete.”

Itorero Intagamburuzwa rizasozwa ku wa 20 Ugushyingo 2026, nyuma y’ibyumweru bibiri byahariwe guhugura aba banyeshuri ku ndangagaciro, umuco n’inshingano zabo nk’abafite ubumenyi bwihariye mu ikoranabuhanga.

Rwanda Institute of Computing ni ikigo cyashyizweho na Leta y’u Rwanda muri Nyakanga 2026, kigamije gutanga amasomo yo ku rwego rwa kaminuza mu bijyanye n’ikoranabuhanga, by’umwihariko ubwenge buhangano (Artificial Intelligence).

Abanyeshuri bagiye kwiga muri iki kigo ni bamwe mu bagiye gukomeza urugendo rwo kongera ubumenyi mu ikoranabuhanga, mu gihe u Rwanda rukomeje gushyira imbaraga mu guteza imbere ubumenyi n’ubushobozi mu ikoranabuhanga buzatuma rugira uruhare mu guhanga ibisubizo by’ibibazo by’iterambere.