Elie Ganijuru na Muhire Kevin mu bakinnyi batanu bakuwe mu Mavubi azakina na Mali

Umutoza w’Ikipe y’Igihugu y’u Rwanda ‘Amavubi’, Stephen Constantine, yatangaje abakinnyi 24 izahagurukana mu rugendo rwerekeza i Bamako aho izakirirwa na Mali mu mukino w’umunsi wa gatatu wo mu Itsinda K mu gushaka itike y’Igikombe cya Afurika cya 2027.

Ku gicamunsi cyo kuri uyu wa Mbere, tariki ya 9 Ugushyingo 2026, ni bwo Ishyirahamwe ry’Umupira w’Amaguru mu Rwanda (FERWAFA), ryatangaje abakinnyi batoranyijwe n’uyu mutoza.

Abo bakinnyi ntiharimo umunyezamu Mugisha Yves, Ishimwe Elie Ganijuru, ba Rayon Sports, Muhire Kevin wa Jamus SC, Mbonyumwami Taiba wa Ethiopian Coffee SC na Uwiyaremye Fidali wa APR FC.

Mu kiganiro yagiranye ikiganiro n’itangazamakuru kigaruka ku myiteguro y’Amavubi Stephen Constantine yagaragaje ko mu bakinnyi bari mu mwiherero w’Amavubi, harimo abagomba kuwusohokamo, kuko urwego rwabo rutari hejuru ugereranyije n’urwo yifuza.

Yatanze urugero kuri myugariro wa Rayon Sports ukina anyuze ibumoso, Ishimwe Elie Ganijuru, aho yagize ati “Twahamagaye Elie wo muri Rayon Sports, turamureba neza, si bibi. Ariko hari ibindi tumukeneyeho, tukibaza tuti ‘ese turamukeneye ubu?’ Tugasanga ntitumukeneye, ahubwo tuzamukenera ubutaha.”

Abakinnyi 24 bazerekeza i Bamako ni Hakizimana Adolphe, Ntwari Fiacre, Niyongira Patience Mutsinzi Ange, Niyigena Clement, Kavita Phanuel, Nkulikiyimana Darryl, Imanishimwe Emmanuel, Mickels Leroy, Manzi Thierry na Iradukunda Elie Tatou.

Hari kandi Niyomugabo Claude, Kwizera Jojea, Byiringiro Jean Gilbert, Uwumukiza Obed, Mugisha Gilbert, Mugisha Bonheur, Bizimana Djihad, Ruboneka Jean Bosco, Hamis Hakim, Nshuti Innocent, Biramahire Abeddy, Mickels Joy Lance na Mickles Slayd.

Biteganyijwe Ikipe y’u Rwanda izahaguruka  ku Kibuga Mpuzamahaga cy’Indege cya Kigali ku wa Kabiri, tariki ya 10 Ugushyingo 2026 yerekeza i Bamako mu ndege yihariye.

Umukino ubanza uzabera i Bamako muri Mali, tariki ya 13 Ugushyingo; nyuma y’iminsi ine, u Rwanda ruzakira umukino w’umunsi wa kane uzabera muri Sitade Amahoro ku wa 17 Ugushyingo 2026.

Kugeza ubu Itsinda K, riyobowe n’u Rwanda n’amanota atandatu inganya na Mali ikurikiyeho mu gihe Liberia na Cape Vert nta nota bafite.