CECAFA Kagame Cup: Rayon Sports yatsinze Tusker biyongerera amahirwe yo kugera muri ½

Rayon Sports yatsinze Tusker FC yo muri Kenya igitego 1-0 mu mukino w’umunsi wa kabiri wo mu Itsinda C rya CECAFA Kagame Cup, biyongerera amahirwe yo kugera muri ½ cy’iri rushanwa.

Uyu mukino wabereye kuri Kigali Pele Stadium, ku mugoroba wo kuri uyu wa Gatatu, tariki ya 29 Nyakanga 2026.

Ni umukino watangiye wegeranye cyane, amakipe yombi agerageza kurema uburyo bwo gutsinda igitego.

Mu minota 20, Rayon Sports yongereye imbaraga itangira gusatira izamu rya Tusker FC ibifashijwemo na Iradukunda Elie Tatau wahinduraga imipira mu rubuga rw’amahina.

Mu minota 30, Tusker FC yatangiye kwinjira mu mukino ndetse ibona uburyo bw’igitego ku ishoti rikomeye ryari ritewe na Steve Omondi, umunyezamu wa Rayon Sports, Dande Junior, awushyira muri koruneri itagize icyo itanga.

Ku munota wa 45, Rayon Sports yafunguye amazamu ku gitego cyatsinzwe na Antonio Atisso Kodjo Kossivi ku mupira yatereye mu rubuga rw’amahina Muderi Akbar awumuhaye.

Igice cya mbere cyarangiye Rayon Sports itsinze Tusker FC igitego 1-0.

Mu igice cya kabiri, Rayon Sports yakomeje gusatira ndetse ku munota wa 58, Iradukunda Elie Tatou wagize umukino mwiza yateye ishoti rikomeye ari inyuma y’urubuga rw’amahina, umupira ukubita umutambiko w’izamu uvamo.

Mu minota 70, Tusker FC yongeye kwibona mu mukino igerageza gusatira ishaka igitego cyo kwishyura harimo umupira John Otieno yananiwe gushyira mu rushundura arebana n’umunyezamu, awushyira hejuru.

Iminota 10 ya nyuma, Tusker yakomeje kugerezageza gushaka igitego cyo kwishyura, ariko ubwugarizi n’umunyezamu ba Rayon Sports bakomeza guhagarara neza.

Umukino warangiye Rayon Sports yatsinze Tusker FC igitego 1-0, yuzuza umukino wa Kabiri wikurikiranya itsinda muri CECAFA Kagame Cup 2026.

Undi wabaye muri iri tsinda, Al-Hilal SC yanyagiye KVZ FC ibitego 4-0.

Kugeza ubu itsinda riyobowe na Al-Hilal SC n’amanota atandatu izigamye ibitego bitandatu, ikurikiwe na Rayon Sports banganya amanota atandatu n’ibitego bitatu izigamye.

Ku wa Gatandatu, Rayon Sports na Al Hilal SC zizahura mu mukino wo guhatanira kuyobora itsinda.

Kunganya bizahesha Rayon Sports gukomeza muri ½ ariko nitsindwa ishobora gusezererwa bitewe n’andi makipe ya kabiri ashobora kugira amanota atandatu.

Undi mukino wo muri iri tsinda uzahuza Tusker FC na KVZ FC, zombi zamaze gusezererwa.