Mexique yatangiye Igikombe cy’Isi cya 2026 itsinda Afurika y’Epfo (Amafoto)

Ikipe y’Igihugu ya Mexique yatangiye neza Igikombe cy’Isi cya 2026, itsinda iya Afurika y’Epfo ibitego 2-0 imbere y’imbaga y’abafana bayo mu mukino ufungura irushanwa.

Ni umukino wabaye mu ijoro ryo ku wa Kane tariki ya 11 Kamena 2026, ubera kuri Estadio Azteca yakira abafana ibihumbi 83 bicaye neza.

Mbere y’uko umukino utangira, Shakira na Burna Boy baririmbye indirimbo ‘Dai Dai’ bakoranye, ikaba ari yo ndirimbo y’Igikombe cy’Isi cya 2026.

Byabaye andi mateka ku muziki wa Nigeria aho undi muhanzi ukomoka muri iki gihugu aririmbye mu birori bifungura Igikombe cy’Isi. Uwaherukaga ni Davido mu Gikombe cy’Isi cyabereye muri Qatar mu 2022.

Ikipe y’igihugu ya Mexique ni yo yatangiye neza umukino bidatinze ku munota wa cyenda yafunguye amazamu ku gitego cyatsinzwe na Julián Quiñones ku mupira watakajwe na Sphelophelo Sithole ukina mu kibuga hagati ku ruhande rwa Afurika y’Epfo, ufatwa n’uyu rutahizamu wahise atera ishoti riremereye cyane ujya mu rushundura.

Mu minota 15, iyi kipe yakomeje kwiharira cyane umupira hagati mu kibuga mu gihe Afurika y’Epfo yakiniraga inyuma yagorwaga no kwibona mu mukino.

Mu minota 35, umukino wagabanyije umuvuduko, amakipe yombi akinira cyane hagati mu kibuga, bituma n’uburyo bwo kurema igitego bubana buke cyane.

Ku munota wa 42, Julián Quiñones yahushije amahirwe yo gutsinda igitego cya kabiri ku ishoti rikomeye yateye ukubita igiti cy’izamu.

Igice cya mbere cyarangiye Mexique itsinze Afurika y’Epfo igitego 1-0.

Intangiriro z’igice cya kabiri ntizahiriye Afurika y’Epfo kuko ku munota wa 49, yasigaye ari abakinnyi 10 nyuma yaho Sphelophelo Sithole ukina mu kibuga hagati yugarira yeretswe ikarita itukura kubera ikosa yakoreye Brain Gutierrez wari ugeze hafi y’urubuga rw’amahina.

Ku munota wa 57, umutoza wa Afurika y’Epfo yakoze impinduka Lyle Foster na Jayden Admas basimburwa na Thalente Mbatha na Themba Zwane.

Ku munota wa 67, Raul Jimenez yatsindiye Mexique igitego cya kabiri n’umutwe ku mupira Roberto Alvarado yamuhaye awushyira mu izamu.

Ku munota wa 84, Themba Zwane wo muri Afurika y’Epfo yahawe ikarita itukura nyuma yo gukubita ukuboko mu maso Umunya- Mexique Roberto Alvarado, bituma isigarana abakinnyi icyenda mu kibuga.

Mbere y’uko umukino urangira umusifuzi wa kane yongeyeho iminota irindwi y’inyongera.

Ku munota wa 90+2, myugariro wa Mexique, César Montes, yeretswe ikarita y’umutuku ku ikosa yakoreye Khuliso Mudau wa Afurika y’Epfo.

Umukino warangiye Mexique yatsinze Afurika y’Epfo ibitego 2-0, itangira neza igikombe cy’Isi cya 2026 kiri gukinwa ku nshuro 23 mu mateka.

Afurika y’Epfo yabaye ikipe ya mbere yabonye amakarita abiri atukura mu mukino w’Igikombe cy’Isi kuva mu 2006, ubwo Portugal n’u Buholandi zombi zahabwaga amakarita abiri atukura mu mukino wa 1/8.

Uyu mukino wabaye uwa kabiri mu mateka y’Igikombe cy’Isi wabonetsemo amakarita atatu y’umutuku mu matsinda, dore ko byaherukaga mu 2006 mu mukino wahuje u Butaliyani na Leta Zunze Ubumwe za Amerika.

Imikino y’Igikombe cy’Isi cya 2026 irakomeza ku wa Gatanu tariki ya 12 Kamena, ku munsi wayo wa kabiri.

Guhera saa kumi za mugitondo, Koreya y’Epfo irakina na Repubulika ya Tchèque mu Itsinda A.

Undi mukino, wo mu Itsinda B, uzahuza Canada na Bosnie-Herzégovine guhera taa tatu z’umugoroba.