80% y’ibibazo by’i Cabo Delgado byarakemutse- Perezida Kagame

  • NTAWITONDA JEAN CLAUDE
  • Kamena 21, 2023
  • Hashize amezi 11
Image

Perezida wa Repubulika y’u Rwanda Paul Kagame, yatangaje ko ibibazo byinshi by’umutekano muke uterwa n’ibyihebe mu Ntara ya Cabo Delgado byamaze gukemuka ubuzima bukaba burimo kongera kugaruka, ibike bisigaye na byo bikaba biri mu nzira zo gukemurwa.

Yabigarutseho kuri uyu wa Gatatu, mu kiganiro we na Perezida wa Zambia Hakainde Hichilema bagiranye n’abanyamakuru, cyibanze ku iterambere ry’umubano w’u Rwanda na Zambia.

Abahagarariye ibitangazamakuru binyuranye bafashe umwanya wo kuganira ku ngingo zinyuranye, harimo n’umutekano w’Akarere. 

Abajijwe ku birebana n’umutekano wa Mozambique aho guhera muri Nyakanga 2021 u Rwanda rwohereje Ingabo na Polisi zihanganye n’ibyihebe bya Ansar Al Sunnah Wa Jammah, Perezida Kagame yasubije ko ibibazo byose biri hafi gukemuka.

Yagize ati: “Navuga ko ikibazo kiri hafi gukemuka, aho umubare munini w’abari barakuwe mu byabo n’umutwe w’iterabwoba babashije gusubira mu ngo zabo bagatangira n’imirimo yabo ya buri munsi nk’uko bisanzwe. Yego, hagiyeyo n’izindi ngabo zaturutse muri SADC zoherejwe mu bice bitandukanye bya Cabo Delgado, amahoro n’umutekano byaragarutse kubera iyo mpamvu.”

Yakomeje agaragaza ko ibikorwa by’iterambere ry’ubukungu na byo byatangiye kongera kwisuganya, atanga urugero rw’Ikigo cy’Abafaransa Total Energies n’ibindi bigo byashoye imari muri iyo Ntara byatangiye gutekereza uko byakongera gusubukura ibikorwa byabyo.  

Yavuze ko nubwo hakiri ibibazo bike cyane, ubufatanye bw’u Rwanda, Mozambique n’Umuryango w’Ubukungu w’ibihugu byo muri Afurika y’Amajyepfo (SADC) bugenda bubyoroshya buri ruhande rutanga umusanzu warwo.

Yunzemo ati: “Hari intambwe ikomeye imaze guterwa, navuga ko nka 80% y’ibibazo by’umutekano muke muri Mozambique byarakemutse. 20% bisigaye bishobora kuba binini cyangwa bito bitewe n’impamvu zitandukanye na zo zikeneye gukemurwa.”

U Rwanda na Zambia byiyemeje ubufatanye mu kubaka amahoro arambye

Mu kiganiro Abakuru b’Ibihugu byombi bagiranye mu muhezo mbere yo guhura n’itangazamakuru, biyemeje gufatanya kubaka amahoro arambye, kuyasigasira no kubyaza umusaruro umubano mwiza mu nyungu z’abaturage.

Abakuru b’ibihugu byombi bashimangiye ubushake bwabo bwo guteza imbere ubuhahirane n’ubutwererane hagati y’Abanyarwanda n’abaturage ba Zambia, usanga bagizwe ahanini n’urubyiruko nkuko bimeze n’ahandi ku mugabane wa Afurika muri rusange.

Perezida Kagame yagize ati: “U Rwanda na Zambia bifite abaturage b’urubyiruko bafite imbaraga n’impano byuzuye. Turashaka gufatanya n’abo ku Mugabane bose, ndetse n’abafatanyabikorwa bacu, tugashora imari muri uru rubyiruko mu rwego rwo guharanira Afurika irushijeho gutekana, iramba kandi yuje udushya.”

Yanagaragaje ko amahoro n’umutekano ari byo nkingi ikomeye ibihugu byombi byubakiyeho mu gushakira umuti ibibazo by’ubukungu n’imibereho myiza y’ababituye.

Perezida wa Zambia Hakainde Hichilema, na we yashimangiye akamaro k’amahoro n’umutekano mu iterambere ry’ibihugu byombi n’umugabane w’Afurika muri rusange, asaba ababituye kudakerensa amahoro bafite ahubwo bakarushaho kuyasigasira kuko ari yo shingiro rya byose.

Kugira ngo ubutwererane hagati y’ibihugu byombi burusheho gutera imbere kandi,  Perezida Hichilema yasabye abayobozi ku mpande zombi gukorana mu buryo buhoraho, ashimangira ko kuva yagera ku buyobozi avugana kenshi na Perezida Kagame nk’inshuti ye magara.

Uretse kuba bihuriye mu Muryango wa Afurika Yunze Ubumwe, u Rwanda na Zambia binahuriye mu muryango w’Isoko rusange rihuza ibihugu 21 byo muri Afurika y’Iburasirazuba n’iy’Amajyepfo (COMESA) kuri ubu iyobowe na Perezida Hichilema.

  • NTAWITONDA JEAN CLAUDE
  • Kamena 21, 2023
  • Hashize amezi 11
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE