Zelensky arashinja u Burusiya gukora Jenoside muri Ukraine

  • Imvaho Nshya
  • Mata 4, 2022
  • Hashize imyaka 2
Image

Perezida wa Ukraine  Volodymyr Zelensky yavuze ko ibitero by’u Burusiya ku gihugu cye ari “iyicarubozo ku gihugu cyose” ndetse nta n’aho bitandukaniye no gukora Jenoside urebye uburyo abaturage barimo kwicwa umusubirizo.

Mu kiganiro yahaye CBS News mu ijoro ryo ku cyumweru, yavuze ko abaturage ba Ukraine barimo kurimburwa n’u Burusiya.

Abajijwe niba ibyo bikorwa bigize Jenoside, yasubije ati: “Mu by’ukuri, iyi ni Jenoside. Kurimbura igihugu cyose n’abagituye. Turi abaturage ba Ukraine. Dufite ab’ubwenegihugu burenga 100. Ibi ni ukwica no kurimbura ubwo bwenegihugu bwose.”

Mu yindi video yasohotse nyuma nijoro, Perezida Zelensky yavuze ko “umuntu wese uhamwa n’ibi byaha azashyirwa mu Igitabo cy’Abicanyi, azashakishwa agahanwa.”

Ibiro bishinzwe uburenganzira bwa muntu mu Muryango w’Abibumbye byatangaje ko abasivili bagera ku 3,455 bakomeretse cyangwa bagapfa muri iyi ntambara.

Iri shami rya Loni rivuga ko muri iyo mibare yatangajwe, abarenga 1,400 bapfuye naho  abasaga 2,000 bagakomereka, ndetse ko iyo mibare ari ikigereranyo kuko imibare ya nyayo igomba kuba irenze iyatangajwe.

Ahishwe hakanakomereka benshi kugeza ubu ni mu duce twa Donetsk na Luhansk mu burasirazuba bwa Ukraine, aho u Burusiya burwanira ko utu duce twemerwa nka Leta zigenga nk’uko bitangazwa na BBC.

Hagati aho Umuryango w’Ibihugu by’i Burayi wongeye guterana mu rwego rwo kuganira ku bindi bihano byafatirwa u Burusiya bukomeje gutsimbarara ku kugaba ibitero simusiga ku Burusiya.

U Burusiya ntibwemera ko abasirikare babwo bari kwica abaturage b’abasivili nyuma y’abishwe mu gace ka Bucha. Umunyamabanga Mukuru w’Umuryango w’Abibumbye Antonio Guterres yavuze ko yashenguwe n’amafoto y’imibiri y’abasivili batsembwe i Bucha.

U Burusiya bwo bwasabye Loni guhamagaza akanama k’umutekano no gukora iperereza ryihariye kuri ayo mafoto yatangajwe.

Abana bari mu bicwa ndetse bakanakomerekera mu ntambara y’u Burusiya
  • Imvaho Nshya
  • Mata 4, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE