Volleyball: APR WVC yatwaye igikombe mu bagore, Police VC biranga mu bagabo 

APR WVC yegukanye igikombe Shampiyona y’Icyiciro cya Mbere muri Volleyball y’Abagore 2025/26 itsinze Kepler WVC, mu gihe mu bagabo Police VC yatsinzwe na REG VC inanirwa kucyegukana.

Ku wa Gatandatu, tariki 9 Gicurasi 2025, ni bwo muri Petit Stade hakinwe imikino ya gatatu nyuma ya kamarampaka muri Shampiyona ya Volleyball mu bagabo no mu bagore.

Umukino wabanjirije indi ni uwo guhatanira umwanya wa gatatu mu bagore, wegukanywe na Police WVC nyuma yo gutsinda RRA imikino 3-0.

Umukino wa gatatu wabaye ku wa Gatandatu, warangiye Police WVC itsinze amaseti 3-2 (18-25, 25-14, 25-21, 22-25, 15-9).

Uyu mukino wakurikiwe n’uwa nyuma wahuje APR WVC na Kepler WVC, aho Ikipe y’Ingabo z’Igihugu yasabwaga gutsinda kugira ngo yegukane iri rushanwa.

Nk’uko byari byitezwe, iyi kipe yitwaye neza itsinda Kepler WVC amaseti 3-2 (22-25, 25-17, 25-20, 16-25, 15-10), ihita yegukanye igikombe kuko yatsinze imikino itatu ku busa.

Nyuma y’uyu mukino hakurikiyeho uwa Police VC yari ifite intsinzi ebyiri, ikaba na yo yasabwaga gutsinda iya gatatu igahita yegukana igikombe bitagombereye imikino itanu.

REG VC iherutse kwegukana umwanya wa gatatu mu Mikino Nyafurika ihuza amakipe yabaye aya mbere iwayo, yakomerejeho yigarurira 

amahirwe yo guhatanira igikombe cya Shampiyona ya Volleyball, nyuma kubona intsinzi ya mbere muri Kamarampaka.

Iyi kipe ya Sosiyete y’u Rwanda ishinzwe ingufu yabigezeho nyuma yo gutsinda Police VC amaseti 3-1 (25-22, 26-24, 20-25, 25-22), bituma ikipe y’abashinzwe umutekano inanirwa kwegukana igikombe kuko yasabwaga gutsinda gusa.

Amakipe yombi azagaruka mu kibuga ku wa Gatandatu tariki ya 16 Gicurasi 2026, aho REG VC nitsinda hazakinwa undi mukino wa nyuma, ariko Police VC yatsinda igahita itwara igikombe ku nshuro ya mbere kuva yashingwa.