Urundi ruzinduko rwa Lt. Gen. Muhoozi mu Rwanda ruravugisha benshi

  • NTAWITONDA JEAN CLAUDE
  • Nzeri 26, 2022
  • Hashize imyaka 2
Image

Abakurikiranira hafi imibanire y’u Rwanda na Uganda, ndetse na Politiki y’Umuryango w’Afurika y’Iburasirazuba (EAC), bakomeje kuvuga byinshi ku mbuga nkoranyambaga no mu bitangazamakuru bitandukanye bibaza ibibazo byinshi ku ruzinduko rushya rw’umuhungu wa Perezida wa Uganda Yoweri Kaguta Museveni mu Rwanda.

Mu cyumweru gishize ni bwo Lt Gen. Muhoozi Kainerugaba, Umugaba w’Ingabo za Uganda (UPDF) zirwanira ku Butaka, yatangaje ko azagaruka mu Rwanda aje “kwiga byinshi ku bworozi bw’inka n’uburyo bwo gucunga amashyo.”

Yakomeje agira ati: “Inkotanyi cyane! Tugiye kugaruka kuri gakondo yacu ya kabiri…mu Rwanda rwiza.”

Biteganyijwe ko muri urwo ruzinduko bitaramenyekana amataliki ruzaberaho, Lt. Gen Muhoozi azahura na Perezida Kagame wanamugabiye inka eshanu ubwo aheruka mu Rwanda muri Werurwe.

Uruzinduko rwe rwo muri Werurwe rwaje rukurikira urundi yari yagize mu mpera z’ukwezi kwa Mutarama 2022, aho ari na we wabaye imbarutso yo kongera gufungura umupaka wa Gatuna wari umaze imyaka itatu ufunzwe kubera ibibazo bya Politiki byari bimaze imyaka irenga itanu bimunga umubano w’ibihugu byombi.

Urundi ruzinduko Lt. Gen Muhoozi agiye kugirira mu Rwanda rukomeje kuvugisha abatari bake, aho bamwe batangiye no kuruhuza n’ibibazo by’umutekano muke uvugwa mu Karere k’Ibiyaga Bigari, aho ingabo z’ibihugu bitandukanye byo muri Afurika y’Iburasirazuba zamaze kugera mu Burasirazuba bwa Repubulika Iharanira Demokarasi ya Congo (RDC) zigiye guhangana n’inyeshyamba cyane cyane iza M23.

Abasesenguzi mu bya Politiki bavuga ko Lt. Gen. Muhoozi ashobora kuba ahangayikishijwe no kuba ingabo z’Akarere  zigiye guhagangana na M23 zirengagije umutwe wa FDLR watumye M23 ivuka.

Bivugwa ko nk’ingabo z’u Burundi zageze muri icyo gihugu zabanje guhangana n’umutwe wa RED Tabara n’ubusanzwe washinzwe n’Abarundi bagamije kugaba ibitero ku gihugu cyabo.

Ingabo za Uganda na zo zagiye ku butaka bwa RDC zihanganye n’umutwe w’iterabwoba wa ADF Nalu.

Mu gihe na Kenya yamaze kohereza ingabo zo guhangana n’inyeshyamba za M23 zigaruriye, abasesenguzi mu bya Politiki basanga kubona igisubizo buri ngabo zijya guhangana n’inyeshyamba runaka bitazatanga umuti urambye w’ikibazo cy’umutekano muke mu Burasirazuba bwa Repubulika Iharanira Demokarasi ya Congo.

Imwe mu mpamvu bashingiraho ni uko u Rwanda rumaze imyaka irenga 25 rubuzwa amahwemo n’inyeshyamba ziturutse muri icyo gihugu na n’ubu zikaba ari ho zikibarizwa, kuri ubu nta ngabo ruzoherezayo kandi iyo mitwe yongeye kwigaragaza muri uyu mwaka ubwo zateraga ibisasu ku butaka bw’u Rwanda.

Ni muri urwo rwego, bamwe mu basesengura ibya Politiki bakeka ko mu bizazindura Lt. Gen Muhoozi mu Rwanda harimo no kuzaganira ku bibazo by’umutekano mu Karere k’Ibiyaga Bigari.

Perezida Kagame, ubwo yagezaga ijambo ku bitabiriye Inteko Rusange y’Umuryango w’Abibumbye mu cyumweru gishize, yavuze ko ikibazo cy’umutekano muke mu Burasirazuba bwa RDC kitazakemurwa no kwitana bamwana, ahubwo hakenewe ubufatanye mpuzamahanga mu gushakira hamwe umuti urambye.

  • NTAWITONDA JEAN CLAUDE
  • Nzeri 26, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE