UEFA Champions League: Atletico Madrid na PSG zageze muri ½ (Amafoto)

Atletico Madrid yatsinzwe na FC Barcelone ibitego 2-1 ikomeza muri ½ cya UEFA Champions League ku giteranyo cy’ibitego 3-2, ijyana na Paris Saint-Germain yatsinze Liverpool ibitego 2-0 igakomeza ku giteranyo cy’ibitego 4-0.

Iyi mikino yo kwishyura ya ¼ yakinnwe mu ijoro ryo ku wa Kabiri, tariki ya 14 Mata 2026.

Umukino wari witezwe cyane wahuje Liverpool yatsinzwe umukino ubanza na Paris Saint-Germain ibitego 2-0.

Liverpool yasatiriye cyane ariko amahirwe yabonaga imbere y’izamu ikomeza kutayabyaza umusaruro, igice cya mbere kirangira itabashije kugabanya ikinyuranyo.

Mu igice cya kabiri ku munota wa 73, Ousmane Dembele yatsindiye Paris Saint-Germain igitego n’ishoti rikomeye yatereye hanze y’uburuga rw’amahina, umupira uruhukira mu rushundura. 

Ku munota wa 90+1, Ousmane Dembele yatsindiye Paris Saint-Germain igitego cya kabiri ku mupira yatereye mu rubuga rw’amahina.

Umukino warangiye Paris Saint-Germain itsinze Liverpool ibitego 2-0, iyisezerera ku giteranyo cy’ibitego 4-0 mu mikino yombi. Iyi igomba gutegereza izava hagati ya Bayern Munchen na Real Madrid zikiranura kuri uyu wa Gatatu.

Undi mukino wabereye ku kibuga cya Riyadh Air Metropolitano, Atletico Madrid yakuyemo FC Barcelone zombi zo muri Espagne n’impamba y’ibitego 2-0. 

FC Barcelona ni yo yatangiye neza umukino ku munota wa kane gusa Lamine Yamal yafunguye amazamu ku  makosa yo guhagarara nabi kwa ba myugariro.

Iyi kipe yakomeje gukina neza maze ku munota 24, Ferran Torres atsinda igitego cya kabiri ku mupira mwiza Danny Olomo yamuhaye.

Atletico Madrid yavuye inyuma ijya gushaka uko yishyura ndetse ibona igitego ku munota wa 31 cyinjijwe na Ademola Lookman, bituma Igice cya mbere kirangira, FC Barcelone iyoboye umukino n’ibitego 2-1.

Mu igice cya kabiri, FC Barcelona yakomeje gusatira cyane ishaka igitego cya gatatu cyo kuyigarura mu mukino. 

Ku munota 57’ Ferran Torres yibwiraga ko yatsinze igitego cya gatatu cya FC Barcelone, ariko umusifuzi yifashishije VAR bemeza ko yahawe umupira na Lamine Yamal yaraririye.

Amakipe yombi yahise akora impinduka, aho Umutoza wa FC Barcelone, Hansi Flick, yakuyemo Fermín López na Ferran Torres hajyamo Robert Lewandowski na Marcus Rashford, na ho Diego Simeone wa Atletico Madrid akuramo Ademola Lookman na Marcos Llorente hajyamo Alex Baena na Nicolas Gonzalez.

Eric García wa FC Barcelona yakoreye ikosa Alexander Sorloth ku munota wa 79, yerekwa ikarita y’umutuku yasubije inyuma iyi kipe inanirwa kubona ikindi gitego.

Umukino warangiye nta kindi kibonetse, Atletico Madrid ihita ikatisha itike ya ½ ku giteranyo cy’ibitego 3-2. Iyi igomba gutegereza izava hagati ya Arsenal na Sporting CP zihura kuri uyu wa Gatatu.