Uburenganzira bwa muntu mu Rwanda burashimishije – MINIJUST

  • KAYITARE JEAN PAUL
  • Ukuboza 11, 2023
  • Hashize amezi 6
Image

Minisiteri y’Ubutabera (MINIJUST) itangaza ko uburenganzira bwa muntu mu Rwanda bushimishije kandi ko urugendo rukomeje. Ibi bishimangirwa na Komisiyo y’Uburenganzira bwa Muntu (NCHR) ndetse n’imwe mu miryango iharanira uburenganzira bwa muntu mu Rwanda.

Byagarutsweho ubwo hizihizwaga umunsi ngarukamwaka w’isabukuru y’itangazo mpuzamahanga ry’uburenganzira bwa muntu ku nshuro ya 75.

Ni umunsi wizihizwa tariki 10 Ukuboza buri mwaka ariko mu Rwanda ukaba warizihijwe ku wa Gatandatu tariki 09 Ukuboza, wizihirizwa mu Karere ka Bugesera mu Murenge wa Mayange mu Ntara y’Iburasirazuba.

Insanganyamatsiko y’uyu mwaka igira iti ‘Agaciro, ubwisansure n’ubutabera kuri bose’.

Mbonera Théophille, Umunyamabanga Uhoraho muri Minisiteri y’Ubutabera, avuga ko muri iryo tangazo ari ho hubakiye ibijyana no guha agaciro umuntu no guhabwa uburenganzira bwe.

Icyo gihe iryo tangazo ryashyizweho hagamijwe gutuma umuntu agarurirwa agaciro nyuma yuko Isi yari mu bihe bikomeye birimo intambara.

Ahamya ko intera u Rwanda ruriho ku bijyanye n’uburenganzira bwa muntu no kwimakaza uburenganzira bwa muntu bishimishije.

Agira ati: “Birashimishije kuko hashyizweho inzego zitandukanye zigamije kubungabunga uburenganzira bwa muntu, hashyirwaho amategeko anyuranye, hashyirwaho za politiki muri ibyo byose harimo no guhora abantu bakangurirwa, bigishwa, ibyo nabyo birakorwa.

Bivuze ngo kugeza ubungubu duhagaze neza mu gihugu mu ishyirwa mu bikorwa cyangwa se abaturage mu kugerwaho n’uburenganzira bwa muntu kuko n’ubundi uburenganzira ni bo bugenewe”.

Uburenganzira bwa muntu mu Rwanda haracyari urugendo kuko hari ibyaha bikorwa hakaba hasabwa imbaraga mu kubihashya cyane ko biri mu bihungabanya uburenganzira bwa muntu.

Hari ibikorwa birimo ihohoterwa rishingiye ku gitsina, irikorerwa abana, irijyanye n’icuruzwa ry’abantu, ubujura, ibyaha bikorerwa kuri za YouTube bigateza ibibazo bikabuza umuntu uburenganzira.

Mbonera agira ati: “Ibyaha akenshi bikunda kugira ingaruka ku burenganzira bwa muntu. Igihe tugifite ibyaha mu muryango Nyarwanda nta n’ubwo twavuga ngo byacitse, ariko nanone tugomba guhora ku rugamba rwo guhora duhanganye nabyo mu rwego rwo gukumira, rwo guhana ndetse no mu rwego rwo guhashya ubukana ibyabaye bishobora kugira”.

Umurungi Providence, Perezida wa Komisiyo y’Uburenganzira bwa Muntu (NCHR), avuga ko hashize imyaka 75 hizihizwa umunsi mpuzamahanga w’itangazo ry’uburenganzira bwa muntu kandi riracyafite ishingiro.

Ashimangira ko uburenganzira bwa muntu ari urugendo ahubwo ko atari ikintu wavuga ngo cyagezweho 100%.

Agira ati: “Aho u Rwanda ruhagaze ubungubu namwe murabyibonera n’amaso, twavuga ko uburenganzira bwa muntu buhagaze neza muri rusange.

Hashobora kuba harimo utubazo k’umuntu ku giti cye ariko ntibivuze ko uburenganzira bwa muntu budahari”.

Ashimangira ko uburenganzira bwa muntu buhari, inzego zishinzwe kubwubahiriza no ku bushyira mu bikorwa igihe bwahungabanye zihari, amategeko aburengera ahari akaba ari yo mpamvu ngo uburenganzira bwa muntu muri rusange burahari.

Tom Mulisa, umuyobozi w’Ikigo giharanira guteza imbere uburenganzira bwa muntu n’iterambere mu karere k’ibiyaga bigari (GLIHD), avuga ko uburenganzira bwa muntu ari urugendo kandi bujyana n’ubuzima abantu babamo umunsi ku wundi.

Ati: “Impamvu twavuga ngo uburenganzira bwa muntu ni urugendo, ni uko imiryango cyane cyane idaharanira inyungu yagombye kugira uruhare mu gukurikirana kureba iyubahirizwa ry’uburenganzira bwa muntu”.

Ku rundi ruhande, Mulisa ashimangira ko ikibazo gihari ari uko abaturage batazi uburenganzira bwabo.

Itangazo Mpuzamahanga ryerekeye Uburenganzira bwa muntu, ryemejwe kandi ritangazwa n’Inteko Rusange y’Umuryango w’Abibumbye tariki 10 Ukuboza 1948 nyuma y’Intambara ya kabiri y’Isi, yari imaze guhitana ubuzima bw’abasaga miliyoni 60 ikanangiza ibitabarika.

Ryashyizweho nk’uburyo bwo gushimangira intangiriro y’amahame remezo n’uburenganzira ntavogerwa buri wese akwiye kugira, mu kurengera ubuzima n’imibereho.

Ibikubiye muri iryo tangazo n’urugendo rwakozwe n’ibihugu byo ku Isi n’u Rwanda rurimo bigaragara ko harimo kubahiriza uburenganzira bwa muntu.

  • KAYITARE JEAN PAUL
  • Ukuboza 11, 2023
  • Hashize amezi 6
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE