U Rwanda na Senegal byasinyanye amasezerano 11 agamije guteza imbere ubufatanye

U Rwanda na Senegal byasinyanye amasezerano 11 agamije kurushaho guteza imbere umubano n’ubufatanye hagati y’ibihugu byombi, mu nzego zirimo politiki, ubukungu, uburezi, ikoranabuhanga, umuco n’ubutabera.

Aya masezerano yasinyiwe i Kigali kuri uyu wa Gatatu tariki ya 7 Ukwakira 2026, mu nama ya mbere ya Komisiyo Ihoraho y’Ubufatanye hagati y’u Rwanda na Senegal, yayobowe na Minisitiri w’Ububanyi n’Amahanga n’Ubutwererane w’u Rwanda,Amb. Olivier Nduhungirehe,  hamwe na mugenzi we wa Senegal, H.E. Cheikh Niang, Minisitiri ushinzwe Ubufatanye bwa Afurika, Ububanyi n’Amahanga n’Abanya-Senegal baba mu mahanga.

Muri iyi nama, impande zombi zasinyanye amasezerano asanzwe atatu n’amasezerano y’ubwumvikane (MoU) umunani, agamije guteza imbere ubufatanye mu nzego zitandukanye.

Aya masezerano akubiyemo ubufatanye mu bijyanye n’ubujyanama bwa politiki, ikoranabuhanga no guhanga udushya, ubukerarugendo, urubyiruko, umuco n’ubugeni ndetse na siporo.

Harimo kandi amasezerano ajyanye n’amashuri makuru n’ubushakashatsi mu bya siyansi, ubufatanye mu bijyanye no gutsura ubuziranenge , gufashanya mu guca imanza z’inshinjabyaha, koherezanya abantu bashakishwa n’ubutabera, ndetse no kohereza abantu bakatiwe ibihano kugira ngo babirangirize mu bihugu byabo.

Abaminisitiri b’Ububanyi n’Amahanga b’ibihugu byombi bagaragaje ko aya masezerano ashyiraho umusingi wo kurushaho guteza imbere umubano n’imikoranire hagati y’u Rwanda na Senegal.

Minisitiri Nduhungirehe yashimangiye ko ibihugu byombi bishyize imbere ubufatanye bugamije guteza imbere abaturage babyo.

Yagize ati: “Turishimira abakozi ba Minisiteri babashije kumvikana kuri aya masezerano no gushaka uko umubano wacu watera imbere. Bivuze ko aya masezerano yagirira akamaro ibihugu byacu n’abaturage mu nzego zose zivugwamo.”

Minisitiri Nduhungirehe yavuze kandi ko ubufatanye bukomeye hagati y’u Rwanda na Senegal bugaragaza ubushake bw’ibihugu byombi bwo kugira uruhare mu iterambere rya Afurika, binyuze no mu gushyigikira Isoko Rusange rya Afurika (AfCFTA), ryatangirijwe i Kigali mu 2018.

Minisitiri Cheikh Niang yavuze ko uruzinduko rw’iminsi itatu Perezida wa Senegal, Bassirou Diomaye Faye, yagiriye mu Rwanda mu Ukwakira 2025 rwabaye umwanya w’ingenzi wo kurushaho gushimangira umubano hagati y’ibihugu byombi.

Mu masezerano yashyizweho umukono harimo n’ayo korohereza abafite pasiporo za dipolomasi, iz’abakozi ba Leta n’izisanzwe no ku bijyanye n’impushya zo kwinjira muri ibyo bihugu.

Hari kandi amasezerano y’ubufatanye mu buhinzi n’ubworozi, ubuzima ndetse no guteza imbere gahunda z’ingenzi z’ibihugu byombi, mu gihe impande zombi zanashyize umukono ku bwumvikane bugamije ubufatanye mu micungire y’amagereza.

Minisitiri Niang yavuze ko icy’ingenzi nyuma yo gusinya aya masezerano ari ugukurikirana ishyirwa mu bikorwa ryayo.

Yagize ati: “Inshingano dufite ni ugushingira kuri izi ngamba twiyemeje, gukurikirana ishyirwa mu bikorwa ryazo no guteza imbere ishyirwa mu bikorwa ryazo mu buryo bufatika.”

Yakomeje agira ati: “Umubano hagati y’ibihugu byombi ushobora kugera ku bushobozi bwawo bwose ari uko uwa politiki na dipolomasi waguwe ukagera no ku bufatanye hagati y’abacuruzi, abashoramari, za kaminuza, ibigo by’ubushakashatsi n’izindi nzego.”

Minisiteri y’Ububanyi n’Amahanga n’Ubutwererane y’u Rwanda yatangaje ko aya masezerano mashya atumye umubare w’amasezerano ibihugu byombi bimaze gusinyana ugera kuri 17, agamije guteza imbere ubufatanye mu nzego zitandukanye.

Umubano wa u Rwanda na Senegal umaze imyaka myinshi

Umubano hagati y’u Rwanda na Senegal umaze imyaka myinshi ushingiye ku bufatanye bwa dipolomasi n’ubw’ubukungu. Mu 2011, u Rwanda rwafunguye Ambasade i Dakar, Umurwa Mukuru wa Senegal, ibintu byafashije kurushaho guteza imbere imikoranire hagati y’ibihugu byombi.

Uyu mubano wakomeje gushimangirwa n’inzinduko abayobozi b’ibihugu byombi bagiriye i Kigali n’i Dakar.

Perezida Paul Kagame yasuye Senegal muri Kanama 2025, mu gihe Perezida Bassirou Diomaye Faye we yagiriye uruzinduko rw’iminsi itatu mu Rwanda mu Ukwakira 2025.