U Rwanda na Czech byemeje ubufatanye mu bya Politiki

  • NTAWITONDA JEAN CLAUDE
  • Werurwe 9, 2022
  • Hashize imyaka 2
Image

Leta y’u Rwanda na Repubulika ya Czech byasinyanye amasezerano y’ubufatanye mu bya Politiki ku wa Kabiri taliki ya 8 Werurwe 2022, ubwo Minisitiri w’Ububanyi n’Amahanga Dr. Biruta Vincent yakirwaga na Minisitiri w’Ububanyi n’Amahanga wa Repubulika ya Zech Jan Lipavský .

Ayo masezerao yasinywe nyuma y’ibiganiro abo bayobozi bombi bagiranye mu masaha y’igicamunsi, byagarutse ku ngingo zinyuranye zirebana n’umutekano, ubufatanye mu bya Politiki ndetse n’ubutwererane mu by’ubukungu.

Minisitiri Dr. Biruta na Minisitiri Lipavský, baganiriye ku bibazo biri ku mugabane w’u Burayi, by’umwihariko bagaruka ku makimbirane y’u Burusiya na Ukraine. Hagaragajwe ko u Rwanda rwatoye umwanzuro w’Umuryango w’Abibumbye usaba u Burusiya guhagarika ibitero bwagabye muri Ukraine ahanini hashingiwe ku ngaruka z’intambara u Rwanda rushingira kuri Jenoside yakorewe Abatutsi.

Banavuze kandi ko biteye inkeke kuba muri Ukraine hakiri Abanyafurika benshi bari mu bice byibasiwe n’intambara muri Ukraine, barimo n’Abanyarwanda.

Ibiganiro byabo kandi byanagarutse ku miterere ya Politiki n’umutekano ku mugabane w’Afurika, aho u Rwanda rukomeje kugira uruhare rukomeye mu gutanga umusanzu wo kugarura amahoro n’umutekano mu bihugu bitandukaye, binyuze mu Muryango w’Abibumbye no mu bufatanye n’ibihugu bikeneye ubwo bufasha mu buryo bwihuse.

Minisitiri Lipavský yashimye ukwiyemeza k’u Rwanda mu gufasha ibihugu byo mu Karere kwigobotora imitwe y’iterabwoba, agendeye ku rugero rwa Mozambique ahari inzego z’umutekano z’u Rwanda zikomeje guhashya ibyihebe.

Mu gushimangira umubano w’u Rwanda na Repubulika ya Czech, kwimakaza ubutwererane mu by’umutekano yari imwe mu ntego z’ingenzi z’uruzinduko rwa Minisitiri Dr. Biruta muri kiriya gihugu u Rwanda rubona nk’umufatanyabikorwa w’ingenzi muri urwo rwego.

Minisitiri Dr. Biruta na mugenzi we banagarutse no ku bibazo by’umutekano na Politiki muri Sahel, bemeranywa ko mu rwego rwo kugira ngo ibibazo by’umutekano bikemuke ari ingenzi kwibanda ku mpamvu muzi yabyo, ari yo miyoborere mibi ndetse na serivisi zidahagije zitangwa na Leta mu nzego zirimo ubuzima n’uburezi.

Bemeje ko imitwe y’iterabwoba yitwaza izo ntege nke za Guverinoma mu kuyigabaho ibitero no gukora icengezamatwara rigamije kwigarurira abayoboke cyane cyane urubyiruko.

Intumwa z’u Rwanda n’iza Czech zanaganiriye ku butwererane mu by’ubukungu, by’umwihariko mu rwego rw’ubuvuzi ndetse n’urw’ubuhinzi nka zimwe mu nzego zitanga amahirwe menshi muri ubwo bufatanye bw’ibihugu byombi.

Ubukungu bw’u Rwanda buri mu birimo kuzamuka cyane ku Mugabane w’Afurika kandi ni cyo gihugu gifite intumbero yo kwigaragaza mu ruhando mpuzamahanga nk’igikoresha ikoranabuhanga rigezweho mu nzego zinyuranye zigamije kubaka ubukungu bushingiye ahanini kuri serivisi.

Ni muri urwo rwego u Rwanda runyotewe no gukorana n’ibihugu nka Czech birufasha kugera kuri iyo ntego yo gukoresha ikoranabuhanga rigezweho. Repubulika ya Czech yiteguye gufatanya n’u Rwanda no mu guteza imbere ingufu n’ibijyanye n’inganda zirimo izikora imodoka n’indege.

Abo baminisitiri bombi banasuzumye aho urugendo rw’ibiganiro hagati y’ibihugu byombi rugeze mu bijyanye no gushyiraho amasezerano akuraho gusoresha kabiri ibicuruzwa bihererekanywa hagati y’u Rwanda za Czech ndetse n’ajyanye n’ubwikorezi bwo mu Kirere.

  • NTAWITONDA JEAN CLAUDE
  • Werurwe 9, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE