U Rwanda na Korea y’Epfo bikomeje mu kwagura ubutwererane

  • NTAWITONDA JEAN CLAUDE
  • Mutarama 15, 2024
  • Hashize ukwezi 1
Image

Guverinoma y’u Rwanda n’iya Korea y’Epfo bikomeje kureba uburyo bwo kurushaho kwagura ubutwererane n’ubufatanye by’umwihariko mu bucuruzi n’ishoramari.

Byagarutsweho mu biganiro byahuje Ambasaderi w’u Rwanda muri Korea y’Epfo Nkubito Manzi Bakuramutsa yahuraga na Minisitiri wungirije w’Ubucuruzi Byung Nae Yang, kuri uyu wa Mbere tariki ya 15 Mutarama 2024.

Umusingi w’ibyo biganiro byibanze ku kurebera hamwe amahirwe y’ubucuruzi yari ibirebana no gutegura abakozi bafite umuhate kandi bashoboye.

Nanone kandi Amb. Bakuramutsa yagiranye ibiganiro n’Umuyobozi Mukuru (DG) Kim Eun Chul, bagaragaza ubushake bwo kwimakaza ubufatanye no guhererekanya ubumenyi mu kubaka ubushobozi bw’abakozi ba Leta.

Amb. Bakuramutsa yagize ati: “Dutegerezanyije amatsiko ubufatanye no kungurana ibitekerezo hagati y’u Rwanda na Repubulika ya Korea mu bijyanye no kongera ubushobozi bw’abakozi ba Leta. Nishimisye inama itanga umusaruro nagiranye na DG Kim Eun Chul.”

Umubano w’u Rwanda na Korea y’Epfo watangiye mu 1963. Ibihugu byombi bifatanya cyane mu bijyanye n’ubuhinzi, uburezi, guteza imbere ikoranabuhanga mu buvuzi, ikoranabuhanga n’ibindi.

Amasezerano y’ubutwererane bw’ibihugu byombi ya vuba aheruka gushyirwaho umukono muri Nzeri 2023 i Busan, ajyanye no gukuraho ugusoresha kabiri ibicuruzwa bihererekanywa hagati y’ibihugu byombi.

Ambasade y’u Rwanda muri Repubulika ya Korea ishimangira ko ayo masezerano ari igihamya cy’uko umubano ushingiye ku bucuruzi ugenda urushaho gukura.

Ayo masezerano nanone yoroshya ubutwererane mu by’ubukungu agakuraho imbogamizi zose zijyanye n’imisoro, bikarushaho kongerera imbaraga abashoramari n’abacuruzi bo hagati y’ibihugu byombi.

Nanone kandi muri Kanama 2023, u Rwanda na Korea y’Epfo byashyize umukono ku masezerano abiri y’ingenzi mu Mujyi wa Kigali.

Amasezerano ya mbere ni ajyanye n’ubutwererane mu bya Politiki agamije kongera ibiganiro bya Politiki n’ubutwererane burambye hagati y’ibihugu byombi.

Ni amasezerano ashimangira ukwiyemeza kw’ibihugu byombi mu kurushaho kwimakaza umubano mu bya politiki no gukorana bya hafi ku ngingo mpuzamahanga zitandukanye.

Amasezerano ya kabiri yashyizweho umukono kuri uyu munsi, ajyanye no korohereza Ikigega gitera inkunga iterambere mu by’ubukungu, kizajya gitera inkunga imishinga y’ingenzi y’iterambere ry’ibikorwa remezo.

Ni amasezerano ashimangira ukwiyemeza kwa Repubulika ya Korea mu gushyigikita iterambere ry’ubukungu ry’u Rwanda.

Mu mwaka wa 2020 nabwo Korea y’Epfo yasinyanye n’u Rwanda amasezerano yemerera ibihugu byombi gusangira ikirere, amasezerano azwi nka Bilateral Air Services Agreement/BASA.

Muri rusange, intambwe imaze guterwa mu butwererane ni igihamya cy’uko ibihugu byombi bikomeje gushyira umuhate mu kurushaho gushyigikira ubutwererane mu nzego zinyuranye.

Amb. Bakuramutsa na Minisitiri Byung Nae Yang
Amb. Bakuramutsa na DG Kim Eun Chul
  • NTAWITONDA JEAN CLAUDE
  • Mutarama 15, 2024
  • Hashize ukwezi 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE