U Burusiya bwasabye u Bushinwa inkunga y’ubukungu n’iya gisirikare

  • Imvaho Nshya
  • Werurwe 14, 2022
  • Hashize imyaka 2
Image

Mu gihe kuri uyu wa Mbere biteganyijwe ko hakomeza ibiganiro byo gushaka uko intambara hagati y’u Burusiya na Ukraine byahagarara, u Burusiya burimo gusaba u Bushinwa inkunga y’imari n’iya gisirikare, nk’uko bivugwa n’ibinyamakuru Financial Times na New York Times.

BBC yo yatangaje ko Leta Zunze Ubumwe z’Amerika (USA) zihanije u Bushinwa ko ni buramuka bufashije u Burusiya mu bitero bwagabye kuri Ukraine buzahura “buzahura n’ingaruka”.

Amakuru akomeje gukwirakwizwa n’ibitangazamakuru bitandukanye ni uko Moscow irimo gusaba Beijing kuyiha ibikoresho bya gisirikare byo kwifashisha muri Ukraine.

Mu gihe Ambasade y’u Bushinwa i Washington muri USA ivuga ko itazi iby’ubwo busabe bw’u Burusiya, Ikinyamakuru Financial Times cyo kivuga ko amakuru gikesha umwe mu bayobozi bakomeye muri Amerika ‘utatangajwe’, avuga ko u Burusiya bumaze iminsi busaba u Bushinwa ibikoresho, ndetse ko hari ibimenyetso simusiga bigaragaza ko u Bushinwa bwaba burimo kwitegura gutanga iyo nkunga.

New York Times na yo isubiramo iby’uwo muyobozi w’Amerika utavugwa amazina uvuga ko u Burusiya bwasabye u Bushinwa ubufasha bw’imari mu guhangana n’ingaruka z’ibihano.

U Bushinwa kugeza ubu bugaragaza ko ntaho bubogamiye muri aya makimbirane kandi ntabwo bwigeze bwamagana ibitero by’u Burusiya.

Kuri uyu wa Mbere, biteganyijwe ko Umujyanama mu by’umutekano w’Amerika Jake Sullivan, aganira na Yang Jiechi Umudiplomate wo hejuru w’u Bushinwa, bahuriye i Roma mu Butaliyani.

Ku cyumweru Sullivan yabwiye ikinyamakuru NBC ko Amerika ishaka ko “yaba u Bushinwa cyangwa undi wese nta usubiza u Burusiya ibyo burimo guhomba mu bukungu”.

Ubushinwa mu mayirabiri

Leta ya Amerika yaburiye Ubushinwa ko bwabona “ibihano bikomeye” niba bufashije u Burusiya muri iyi ntambara kuri Ukraine, nk’uko ibinyamakuru byaho bibivuga.

Mu byumweru bishize u Bushinwa n’u Burusiya byatangaje ko umubano wabyo “udafite imbago”, mu gihe bivugwa ko u Burusiya ubu buri gusaba inshuti yabwo ubufasha mu ntambara.

Ibi bihugu byombi bifitanye ubufatanye bukomeye mu bukungu – ubucuruzi bwabyo umwaka ushize bwageze ku gipimo cyo hejuru cyane cya miliyari 147 z’amadolari y’Amerika.

Ariko u Bushinwa bushobora kugira impungege zo gukomanyirizwa mu gihe bwatangira gufasha u Burusiya mu ntambara.

Mu butumwa bwo kuri Twitter, Richard Hass, Umudiplomate w’Amerika n’Umujyanama wa Perezida mu bubanyi n’amahanga, yagaragaje ko u Bushinwa buri mu mayirabiri.

Hagati aho Hu Xijin Umwanditsi Mukuru w’Ikinyamakuru Global Times cya Leta y’u Bushinwa, yavuze ko u Bushinwa n’Amerika bikwiye kugera ku bwumvikane busaba ibihugu byose guhagarika guha ubufasha bwa gisirikare Ukraine cyangwa u Burusiya.

  • Imvaho Nshya
  • Werurwe 14, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE