U Burundi bwasimbuye Ethiopia ku buyobozi bw’Umuryango EAPCCO

  • NTAWITONDA JEAN CLAUDE
  • Ukwakira 29, 2023
  • Hashize amezi 4
Image

Umuyobozi Mukuru wa Polisi y’u Burundi Frédéric Budomo, ni we wahawe gukomeza kuyobora Umuryango uhuza Abayobozi Bakuru ba Polisi zo mu bihugu by’Afurika y’Iburasirazuba (EAPCCO) asimbuye Demelash Gebremichael, Umuyobozi Mukuru wa Polisi ya Ethiopia wa manda y’umwaka umwe.

Umuhango w’ihererekanyabubasha wabereye mu Nteko Rusange ya 25 y’Umuryango EAPCCO yabereye i Bujumbura mu Burundi guhera ku wa 22 kugeza ku wa 27 Ukwakira 2023.

Inteko ya EAPCCO ihuza Abayobozi Bakuru ba Polisi (CPC) yanitabiriwe n’Umuyobozi Mukuru wa Polisi y’u Rwanda (IGP) Felix Namuhoranye, ahagarariye u Rwanda nka kimwe mu bihugu 14 bihuriye muri uwo Muryango. 

Ibindi bihugu bibarizwa muri uwo Muryango byiyongera ku Rwanda ni u Burundi, Tanzania, Uganda, Kenya, Repubulika Iharanira Demokarasi ya Congo (DRC), South Sudan, Somalia, Seychelles, Ethiopia, Comoros, Eritrea, Djibouti na Sudani.

Inama yateraniye i Bujumbura, yayobowe  na Visi-Perezida w’u Burundi, Bazombanza Prosper, ikaba yari ifite insanganyamatsiko igira iti: “Kwifashisha ubushobozi bw’inzego za Polisi mu Karere mu guteza imbere ubufatanye mu iyubahirizwa ry’amategeko rigendanye no kurwanya iterabwoba n’ibyaha byambukiranya imipaka.”

Visi-Perezida Bazombanza yavuze ko bikwiye y’uko Umuryango wa EAPCCO ushyira imbaraga mu kuzamura no gushimangira ubufatanye mu guhangana n’ibyaha byambukiranya imipaka, binyuze mu guhuriza hamwe no kubahiriza amategeko n’uburenganzira bw’ikiremwamuntu, gushyiraho gahunda y’amahugurwa n’ubundi buryo bwose bwo kubaka ubushobozi.

Inteko Rusange ya EAPCCO yafatiwemo imyanzuro itandukanye ishyiraho ingamba zo gushimangira ubufatanye mu guhangana n’ibyaha bigenda birushaho kwiyongera uko Isi irushaho gutera imbere mu ikoranabuhanga.

Umuyobozi Mukuru wa Polisi y’u Rwanda IGP Namuhoranye Felix i Bujumbura

Harimo nko kwifashisha ikoranabuhanga mu kurwanya iterabwoba n’ibyaha byambukiranya imipaka, gufata abanyabyaha binyuze mu Muryango wa Polisi Mpuzamahanga (Interpol), no gushyiraho amasezerano n’amategeko ahuriweho azafasha mu gukumira no guhangana n’ibiyobyabwenge n’urusobe rw’imiti ikoreshwa nka byo ndetse n’ibiturika.

Mu bindi byafatiwe umwanzuro harimo gushyira imbaraga mu guhanahana amakuru ajyanye no kugemura, gutumiza hanze no gukora ibiyobyabwenge n’urusobe rw’imiti ikoreshwa nka byo, gukumira no kurwanya ibikorwa byo gukora ibiturika no kubyigisha mu baturage.

Abayobozi Bakuru ba Polisi basabye ko hatangizwa umushinga wo guhimba indirimbo yubahiriza Umuryango wa EAPCCO, gushyira imbaraga mu kurwanya ubujura bw’amatungo n’ikwirakwizwa ry’intwaro mu buryo bunyuranyije n’amategeko mu Karere. 

EAPCCO ni Umuryango washinzwe mu mwaka wa 1998 hagamijwe kwimakaza no kongerera imbaraga ubutwererane bw’Akarere bushingiye ku guhangana n’ibyaha byambukiranya imipaka mu bihugu byo mu Burasirazuba bw’Afurika. 

NTAWITONDA JEAN CLAUDE 

  • NTAWITONDA JEAN CLAUDE
  • Ukwakira 29, 2023
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE