U Buhinde bwifurije u Rwanda isabukuru nziza ya 28 yo Kwibohora

  • NTAWITONDA JEAN CLAUDE
  • Nyakanga 4, 2022
  • Hashize imyaka 2
Image

Minisitiri w’Ububanyi n’Amahanga w’u Buhinde Dr. Subrahmanyam Jaishankar, yifatanyije n’Abanyarwanda ndetse n’Inshuti z’u Rwanda kwizihiza isabukuru ya 28 yo kwibohora, agaragaza icyizere cy’uko umubano w’ibihugu byombi uzarushaho kwimakazwa binyuze mu nzego zitandukanye z’ubutwererane.

Mu butumwa yanyujije ku mbuga nkoranyambaga, Dr. S. Jaishankar yagize ati : “Nifatanyije mu byishimo na Minisitiri w’Ububanyi n’Amahanga n’Ubutwererane Dr. Biruta Vincent, Guverinoma y’u Rwanda n’Abanyarwanda bose kuri uyu munsi w’isabukuru ya 28 yo Kwibohora. Mfite icyizere ko ubutwererane bw’ibihugu byombi buzakomeza kwimakazwa mu nzego zitandukanye.”

Buri mwaka ku italiki ya 4 Nyakanga, Abanyarwanda n’inshuti z’u Rwanda bizihiza Umunsi wo Kwibohora bazirikana ubutwari bwaranze abahoze muri RPA Inkotanyi bitangiye kubohora ingoyi y’imiyoborere mibi bakanahagarika Jenoside yakorerwaga Abatutsi.

Urugamba rwo kubohora u Rwanda rwatangijwe ku ya 1 Ukwakira 1990, rusoza ku ya 4 Nyakanga 1994 nyuma yo guhagarika Jenoside yakorerwaga Abatutsi yatwaye ubuzima bw’abasaga miliyoni mu gihe cy’iminsi 100 gusa.

U Buhinde bwifatanyije n’u Rwanda kwizihiza uyu munsi ku nshuro ya 28 mu gihe umubano w’ibihugu byombi umaze imyaka myinshi, by’umwihariko ukaba warashimangiwe bwa mbere guhera mu 1999 ubwo u Rwanda rwafunguraga Ambasade i New Delhi yaje guhabwa Ambasaderi wa mbere mu 2001.

Minisitiri Dr. Biruta na Minisitiri Dr. Jaishankar bagiranye ibiganiro mu Nama ya 26 ya CHOGM

Minisitiri Dr. Jaishankar aheruka mu ruzinduko rwe rwa mbere mu Rwanda mu Nama ya 26 y’Abakuru b’Ibihugu na Guverinoma bibarizwa mu Muryango w’Ibihugu bikoresha ururimi rw’Icyongereza (CHOGM) yateraniye i Kigali mu cyumweru cyahereye taliki ya 20-25 Kamena 2022.  

Muri iyo nama, Dr. Jaishankar yagaragaje u Rwanda nk’igihugu cy’intangarugero mu guharanira iterambere, kibereye gukorerwamo ubucuruzi kandi kitagira umuntu n’umwe giheza cyangwa ngo asigazwe inyuma mu rugendo rw’iterambere.

Yagarutse no ku mubano w’ibihugu byombi, aho yashimangiye ko u Buhinde buha agaciro gakomeye umubano bufitanye n’u Rwanda, ati : “Iyo tureba muri Afurika, u Buhinde bufata u Rwanda nk’inshuti y’akadasohoka kandi y’ingirakamaro.”

Yakomeje ashimangira ko ubutwererane bw’ibyo bihugu byombi burushaho kongerwamo ikibatsi uko imyaka ihita indi igataha, by’umwihariko bikaba bishimangirwa n’imishinga y’iterambere itandukanye ihuriweho n’ibihugu byombi mu Rwanda, uburyo u Buhinde ari umufatanyabikorwa ukomeye mu burezi n’ubuvuzi n’izindi nzego.

Yanagaragaje uburyo u Rwanda ruri mu bihugu by’Afurika byakiriye neza kandi bicumbikiye Abahinde benshi. Yanashimiye ko na bo bitwara neza ndetse abasaba gukomeza kuzamura ibendera ry’u Buhinde cyabo binyuze mu myitwarire myiza n’uruhare bagira mu iterambere ry’Igihugu cyabakiriye neza.

Igihe yari i Kigali mu kwezi gushize, Dr. Jaishankar yabonye amahirwe yo kuganira n’umuryango w’Abahinde batuye mu Rwanda, nyuma yo kuganira na bo yagize ati : “Byari byiza kuganira n’Umuryango w’Abahinde i Kigali. Nabaganirije ku iterambere ry’u Buhinde, mbashimira n’uruhare bagira mu kwimakaza ubutwererane bw’u Rwanda n’u Buhinde.”

Uruzinduko rwa mbere rwa Dr. Jaishankar mu Rwanda yarukoze mu kwezi gushize aho yitabiriye CHOGM
  • NTAWITONDA JEAN CLAUDE
  • Nyakanga 4, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE