Turikiya yasabwe kwigira ku Rwanda ikemera amateka mabi yayo n’u Bugereki

  • NTAWITONDA JEAN CLAUDE
  • Gicurasi 22, 2022
  • Hashize imyaka 2
Image

U Rwanda ni kimwe mu bihugu ku Isi byafashe ingamba zihamye zo kwibuka buri mwaka Jenoside yakorewe Abatutsi yatwaye ubuzima bw’abasaga miliyoni mu minsi 100 gusa, nka bumwe mu buryo bwo kwemera ubugwari bwaranze bamwe mu Banyarwanda no kwirinda kwibagirwa kuko ari yo ntandaro y’uko ayo mateka ashaririye ashobora kongera kwisubira.

Nyuma y’imyaka 28 ishize, u Bugereki ni kimwe mu bihugu byinshimira intambwe yatewe n’u Rwanda mu guharanira ahazaza hazira Jenoside n’ingengabitekerezo yayo ari na ho bwahereye busaba, mu buryo butaziguye, Turikiya gutera iyo ntambwe mu kwemera amateka mabi yaranze icyo gihugu ku Bugereki mu myaka 103 ishize.

Minisitiri w’Ububanyi n’Amahanga w’u Bugereki Nikos Dendias yabishimangiye ku wa Gatanu taliki 20 Gicurasi 2022, ubwo yahuraga na Minisitiri w’Ububanyi n’Amahanga n’Ubutwererane w’u Rwanda Dr. Biruta Vincent wari mu ruzinduko muri icyo Gihugu.

Uruzinduko rwa Dr. Biruta mu Bugereki rwabaye nyuma y’umunsi umwe icyo gihugu cyibutse Jenoside yakorewe Abagiriki ahitwa Pontus mu gihe cy’Intambara ya Mbere y’Isi na nyuma ya yo.

Minisitiri Nikos Dendias yavuze ko ibindi bihugu bikwiye kwigira ku rugero rw’u Rwanda mu kwemera no kubakira ahazaza hazima ku mateka mabi yaranze ahahise habyo.  

Nyuma yo kwakira Dr. Biruta, Minisitiri Nikos Dendias yagize ati: “Uruzinduko rwawe uyu munsi ruje nyuma y’umunsi umwe gusa ushize twibutse Jenside yakorewe Abagereki i Pontus. Kuri uwo munsi twibuka abagereki basaga 350,000 bishwe n’abandi bakuwe mu byabo n’abayobozi b’Ubwami bwa Ottoman mu myaka 103 ishize.”

Yakomeje agira ati: “Bityo twifuza ko ibindi bihugu, mu Karere kacu kagari, byakurikiza urugero rw’u Rwanda rumurikira amahanga mu kwemera amapaji yijimye y’amateka, kwiyunga, guhuza ahahise n’amateka ndetse no gusaba imbabazi imiryango y’abishwe n’abarokotse ubwo bwicanyi.”

Hagati y’umwaka wa 1914 na1924, bivugwa ko Abagereki bakabakaba miliyoni ari bo bishwe n’abayobozi b’Ubwami bwa Ottoman rifatanyije n’ishyaka rya Politiki ryo muri Turikiya ryitwaga ‘Young Turks’; muri iyo Jenoside yanatwaye ubuzima bw’abaturage b’Armenia basaga miliyoni n’igice ndetse n’abasaga kimwe cya kabiri cya miliyoni cy’Abasiriya.

By’umwihariko, Abagereki basaga 350,000 ni bo bishwe mu gace ka Pontus konyine bahorwa ubwoko n’imyemerere yabo y’uko bari Abakirisitu mu Bwami bwasengaga izindi mana.

Minisitiri Dendias yishimiye kwakira mugenzi we w’u Rwanda Dr. Biruta Vincent

Kugeza uyu munsi, bivugwa ko Turikiya ari cyo gihugu kigihakana mu buryo bweruye uruhare urwo ari rwo rwose cyaba cyaragize muri iyo Jenoside yakorewe abaturage b’abakirisitu mu Bwami bwa Ottoman, nubwo hari ibihamya bibishimangira ndetse n’impuguke mu mateka zikaba zibyemeranywaho.

Minisitiri Nikos Dendias yavuze ko u Rwanda rwabaye intangarugero mu ruhando mpuzamahanga mu bijyanye n’ubumwe n’ubwiyunge ndetse ko Urwibutso rwa Jenoside rwa Kigali yasuye mu Gushyingo 2021 n’izindi nzibutso mu gihugu, zifite igisobanuro gikomeye mu kubungabunga no gusigasira amateka azaba urumuri ku binyejana byinshi by’ahazaza.

Yagize ati: “Mu gihe gito, igisekuru kimwe, Perezida wa Repubulika y’u Rwanda Paul Kagame yabashije kunga Igihugu nyuma y’amateka ashaririye cyanyuzemo, ndetse bijyana no n’umuco wo guhora bibuka kugira ngo ubwo bwicanyi butazongera kwisubira mu gihe kizaza.”

Minisitiri Dendias yasobanuye ko uruzinduko rwa Dr. Biruta mu Bugereki ari urw’amateka kuko ari rwo rwa mbere rwakozwe na Minisitiri w’Ububanyi n’Amahanga w’u Rwanda mu Bugereki, rukaba ruje rukukikira urwo we aheruka kugirira i Kigali.

Yakomeje avuga ko urwo ruzinduko ari igihamya cy’umubano mwiza ukomeje kubakwa hagati y’u Bugereki n’ibihugu by’Afurika yo munsi y’Ubutayu bwa Sahara, by’umwihariko mu Rwanda.

Ati: “Ibihugu byacu byombi bisangiye ukwiyemeza ku mahame ajyanye no gukemura amakimbirane mu mahoro hashingiwe ku matekego mpuzamahanga, u Rwanda ntirwemera gukoresha imbaraga (intambara) mu guharanira amahoro ndetse rwizera ko amasezerano yasinywe akwiye kubahirizwa, kugira ngo ubuhezanguni bubure umwanya mu kinyejana cya 21.”

Yavuze ko u Bugereki n’Umuryango w’Ubumwe bw’u Burayi (EU) byiyemeje kubaka umubano uhamye n’Afurika, agaruka ku buryo nyuma yo gusura u Rwanda mu mwaka ushize yakomereje no mu bindi bihugu bitandatu.

Yanashimangiye ko u Bugereki buha agaciro gakomeye u Rwanda nk’inkingi y’amahoro n’umutekano mu buryo bwagutse, kuko rugira uruhare rukomeye mu gutanga ibisubizo ku bibazo byo by’umutekano mu Karere, kwihuza kw’Afurika, ari na ko rutanga umusanzu warwo mu miryango mpuzamahanga.

Minisitiri Dendias yanakomoje ku masezerano mashya yasinywe hagati y’u Rwanda n’u Bugiriki i Athens mu birebana n’umuco na siporo, yiyongereye ku yandi yasinyiwe i Kigali ubwo aheruka mu rw’Imisozi Igihumbi.

Yavuze ko kuri ubu impande zombi zikomeje kwiga no ku gusinya andi masezerano y’ubufatanye n’ubutwererane mu zindi nzego zirimo ubukerarugendo.

Dendias yaboneyeho gutanga ubutumire bwa Perezida w’u Bugereki Republic Katerina Sakellaropoulou, wasabye Perezida Kagame gusura u Bugereki.

Hasinzwe amasezerano y’ubufatanye mu rwego rw’umuco na siporo
  • NTAWITONDA JEAN CLAUDE
  • Gicurasi 22, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE