Tshisekedi yagaruye inzika ku Rwanda amaze guhabwa kuyobora SADC

  • NTAWITONDA JEAN CLAUDE
  • Kanama 17, 2022
  • Hashize imyaka 2
Image

Perezida wa Repubulika Iharanira Demokarasi ya Congo (RDC) Felix Antoine Tshisekedi Tshilombo, yongeye kugaragaza akangonorwa afitiye u Rwanda mu ijambo yagejeje ku bitabiriye umuhango wo kumushyikiriza inkoni y’ubuyobozi bw’Umuryango w’Ubukungu bw’Ibihugu byo muri Afurika y’amajyepfo (SADC).

Ni umuhango wabereye i Kinshasa kuri uyu wa Gatatu taliki ya 17 Kanama 2022 mu nama isanzwe ya 42 y’Abakuru b’Ibihugu na Guverinoma bigize SADC yitabiriwe n’abandi bayobozi baje bagaragiye abahagarariye ibihugu byabo.

Iyo nama y’iminsi ibiri ihurije hamwe ba Perezida cyangwa ababahagarariye ku cyicaro gikuru cy’Inteko Ishinga Amategeko ya RDC. Perezida wa Malawi Lazarus Chakwera wayoboraga uyu muryango yahaye ubuyobozi Tshisekedi ubwo hafungurwaga iyo nama.

Amaze gufata inkoni y’ubuyobozi, Perezida Tshisekedi yafashe ijambo ashimira mugenzi we Chakwera wayoboye neza SADC ndetse akanagaragaza umubano wihariye n’ubuyobozi bwa RDC, ariko aboneraho no gushimangira ko ibihugu bigize uwo muryango byamugaragarije ubufatanye mu bihe yita ibigoye avuga byatewe n’u Rwanda rwabagabyeho ibitero.

Yagize ati: “Ndashimira ibihugu bigize Umuryango byabaye hafi Abanyenyekongo mu gihe Igihugu cyacu cyibasiwe n’igitero kinini kandi cy’ubunyamaswa (barbare) cyagabwe n’umuturanyi, ari we u Rwanda.”

Akimara kuvuga ayo magambo, abayobozi ba RDC bari mu Nteko Ishinga Amategeko bahise bavuza induru bigaragaza ko bishimiye iyo mvugo ya Perezida isa n’izagiye ziteza ibibazo by’urugomo n’ubwicanyi ku Banyekongo bavuga Ikinyarwanda, cyane cyane abo mu bwoko bw’Abatutsi.

By’umwihariko, Perezida Tshisekedi yashimiye ibihugu bitatu ari byo Afurika y’Epfo, Tanzania na Malawi byatanze umusanzu w’ingabo zigira uruhare mu guhangana n’inyeshyamba za M23 ziharanira uburenganzira bw’Abanyekongo avuga Ikinyarwanda baherereye mu Burasirazuba bwa RDC.

Afurika y’Epfo ni yo igiye kuyobora ishami ry’Umuryango ryitwa Troïka rishinzwe ibirebana n’umutekano mu Karere.

SADC ni wo Muryango munini kurusha iyindi muri Afurika kuko ugizwe n’ibihugu 16 ari byo Afurika y’Epfo, Angola, Botswana, RDC, Lesotho, Madagascar, Malawi, Ibirwa bya Maurice, Mozambique, Namibie, Swaziland, Seychelles, Tanzania, Ibirwa bya Comores, Zambia na  Zimbabwe.

Perezida Tshisekedi yashimiye SADC yohereje ingabo zisaga 3000 mu myaka 10 mu butumwa w’Umuryango w’Abibumbye bwo kugarura amahoro muri RDC (MONUSCO) zifite inshingano zihariye zo guhangana n’imitwe yitwaje intwaro.

Yakomeje agira ati: “Ndabizeza ko RDC izakomeza uyu murimo neza, kandi ikaba yizeye inkunga ya buri gihugu kigize uyu muryango kugira ngo igere ku ntego isabwa kugeraho.”

Umunyamabanga Nshingwabikorwa wa SADC Elias Mpedi Magosi, yagaragaje bimwe mu byo iyi nama izibandaho birimo gusuzuma intambwe imaze guterwa mu kwihuza kw’ibihugu bigize uyu muryango ugamije kwimakaza iterambere ry’inganda, kugeza buri gihugu ku rwego rw’ibihugu bifite ubukungu bwihagazeho aho abaturage banyurwa n’iterambere ry’ubukungu rirambye.  

  • NTAWITONDA JEAN CLAUDE
  • Kanama 17, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE