Sudani: Abarenga 20 bishwe n’igisasu cyarashwe ku isoko

  • Imvaho Nshya
  • Ugushyingo 6, 2023
  • Hashize amezi 4
Image

Abarenga 20 baburiye ubuzima mu isoko ryo mu gace ka Omdurman riherereye mu Majyaruguru ya Khartoum muri Sudani ryarashweho igisasu ku Cyumweru tariki ya 5 Ugushyingo 2023.

Bikekwa ko icyo gisasu cyari kimwe mu byatewe ubwo Ingabo za Sudani (SAF) zari zihanganye n’Inkeragutabara (RSF) mu mirwano ikomeje kubashyamiranya kuva mu kwezi kwa Mata uyu mwaka.

Bivugwa ko ari cyo gihe cya bugufi umubare w’abasivili benshi bambuwe ubuzima n’ubwo bushyamirane bukomoka ku bwumvikane buke hagati y’Umugaba Mukuru w’Ingabo Abdel Fattah al-Burhan na Mohamed Hamdan Daglo wigeze kumwungiriza, ubu akaba ari we uyobora Inkeragutabara.

Umuryango witwa Sudan’s Emergency Lawyers, wagize uti: “Bitewe n’imirwano ikomeje gufata indi ntera hagati y’impande zombi zohererezanyaga ibisasu, ibyinshi (bibarirwa muri 15) byaguye mu Karere ka Al-Thawra ko muri Omdurman, hari icyaguye ku isoko cyica abasivili barenga 20 n’abandi benshi barakomereka.”

Uwo Muryango washinje impande zombi kuba zifite uruhare muri ubwo bwicanyi, unazisaba guhagarika iyo ntambara ikomeje kugira ingaruka ziremereye ku gihugu.  

Ku wa Gatandatu, na bwo Inzego z’ubuzima muri Khartoum zari zatangaje ko ibisasu byaguye ku nzu z’abasivili bikica abarenga 15.

Karitsiye ya Omdurman ni yo yagiye yibasirwa kenshi n’ingaruka z’imirwano ikomeje hagati y’impande zombi.

Nubwo imirwano yari itangiye guhosha mu Murwa Mukuru ndetse no mu Burengerazuba bw’Intara ya Darfour, bivugwa ko yagiye ikomereza mu majyepfo ya Khartoum.

Mu mezi atandatu ashize, imibare igaragaza ko hamaze gupfa abasivili barenga 10,000 nk’uko bishimangirwa n’Umushinga ‘Armed Conflict Location & Event Data Project’.

Gusa imiryango itabara imbabare n’abaganga bita ku nkomere ahabera iyo mirwano bavuga ko iyo mibare ari mikeya cyane kuko abenshi mu bapfa batagera ku bitaro cyangwa mu buruhukiro, ari na ho hakurwa amakuru atangazwa mu buryo bwemewe.

Umuryango w’Abibumbye na wo uvuga ko iyo ntambara imaze gukura mu byabo abarenga miliyoni 5.5, haba abahungiye muri Sudani ndetse n’abagiye bambuka imipaka, muri rusange abakeneye inkunga kugira ngo babeho muri icyo gihugu bakaba barenga miliyoni 25.

NTAWITONDA JEAN CLAUDE

  • Imvaho Nshya
  • Ugushyingo 6, 2023
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE