Sri Lanka: Perezida yemeye kwegura akurikiye Abaminisitiri 4

Minisitiri w’Intebe wa Sri Lanka Ranil Wickremesinghe, yatangaje ko Perezida w’icyo gihugu Gotabaya Rajapaksa yemeye kwegura nyuma y’imyigaragambyo yahurije ibihumbi n’ibihumbi aho abo bayobozi bombi batuye.

Perezida Gotabaya Rajapaksa yavuze ko azegura kuri uyu wa Gatatu taliki ya 13 Nyakanga, nyuma y’aho iki gihugu kiguye mu bibazo by’ubukungu bikomeye, abaturage bakaba basaba gusubizwa ubutunzi bwabo bwaguye mu bihombo.

Ku wa Gatandatu na bwo Minisitiri w’Umurimo na Minisitiri ushinzwe Ubwikorezi n’Imihanda, ndetse n‘Umuvugizi wa Guverinoma bose beguriye rimwe.

Ku Cyumweru na bwo uwari Minisitiri ushinzwe guteza imbere ishoramari na we yaraye yeguye.

Ibibazo by’ubukungu byibasiye iki gihugu kibarizwa mu Birwa byo mu Nyanja y’u Buhinde byatumye abaturage basaga miliyoni bagituye bagwa mu nzara aho umubare munini wabo udashobora no kwigurira ibyo kurya, imiti igihe barwaye ndetse n’ibikomoka kuri peteroli ku bafite ibinyabiziga.

Nyuma y’imyigaragambyo yari imaze amezi ikorwa mu mutuzo, ku wa Gatandatu ni bwo abigaragambya basaga 100,000 bahutse urugo rwa Perezida bamusaba kwegura.

Amashusho yanyujijwe ku bitangazamakuru bya Sri Lanka agaragaza abigaragambya binjira mu nzu ya Perezida ndetse n’aho akorera nyuma yo kurenga ku bashinzwe umutekano.

Bagaragaye bahagaze ku rubaraza basaba ko Perezida yegura ndetse bazamuye n’ibyapa bibishimangira. Hari n’abagaragaye bigabije ubwogero (Piscine) wo kwa Perezida.

Igihe imyigaragambyo yabaga, bivugwa ko yaba Perezida na Minisitiri w’Intebe nta n’umwe wari akihabarizwa. Bivugwa kandi ko muri iyo myigaragambyo yagejeje ku Cyumweru, abantu babarirwa muri 55 barimo n’abanyamakuru bari bagiye gutangaza ibiri kuhabera bakomeretse.