Sosiyete z’indege zahagaritse ingendo zazo muri Isirayeli

  • Imvaho Nshya
  • Ukwakira 9, 2023
  • Hashize amezi 8
Image

Sosiyete mpuzamahanga zitandukanye z’indege zahagaritse ingendo zazo muri Isirayeli biturutse ku ntambara ikomeje hagati y’icyo gihugu n’umutwe wa Hamas wo muri Palestina.

Zimwe muri sosiyete zahagaritse ingendo harimo izo muri Amerika nka United Airlines, Delta Air Lines, American Airlines na Air France yo mu Bufaransa.

Ibiro Ntaramakuru by’Abafaransa (AFP) byatangaje ko izi sosiyete zizongera gukorera ingendo muri Isirayeri, ari uko intambara ikomeje hagati ya Isirayeri na Hamas, icogoye.

Sosiye z’indege muri Asia na zo zateye ikirenge mu k’ibindi bigo bikomeye mu guhagarika ingendo zijya n’iziva muri Israel nyuma y’intambara ikomeje gufata indi ntera hagati y’ingabo z’iki gihugu n’umutwe wa Hamas.

Korean Air yo muri Koreya y’Epfo, sosiyete rukumbi yo muri iki gihugu ikora igendo zihuse zihuza Incheon na Tel Aviv, yasubitse izo yari ifite kuri uyu wa Mbere, ariko ivuga ko ikora iziva muri Tel Aviv zijya i Incheon igacyura abantu iwabo.

Kuri ubu habarurwa Abanya-Koreya y’Epfo 570 baba muri Israel n’abandi 360 bagiye mu bukerarugendo nk’uko byatangajwe na Minisiteri y’Ububanyi n’Amahanga yashimangiye ko nta muturage w’icyo gihugu urakomerekera muri iyi ntambara.

Air India na yo yahagaritse ingendo zayo ziva n’izijya i Tel Aviv kugeza ku wa 14 Ukwakira, ishingiye ku mutekano w’abagenzi n’abakozi bayo.

Hagati aho, na Cathay Pacific yo muri Hong Kong yahagaritse ingendo zayo zo ku wa Kabiri zaba iziva n’izijya i Tel Aviv, ivuga ko ibanza kureba uko byifashe.

Sosiyete nyinshi z’indege ku Isi zirimo United Airlines, American Airlines na Delta Air Lines, na zo zabaye zihagaritse ingendo kubera ibiri kubera muri Israel.

Umubare w’abamaze gupfa muri Gaza wageze kuri 436. Amashusho yakwiriye ku mbuga nkoranyambaga, agaragaza imisigiti n’inyubako zituwemo abantu biri gusenyuka.

Igisirikare cya Israel cyatangaje ko mugitondo cyo kuri uyu wa Mbere cyarashe ahantu harenga 500 habarizwa abarwanyi bo mu mutwe wa Hamas.

Minisitiri w’Umutekano wa Palestine, yatangaje ko ahantu hari kuraswa cyane ari iminara, inyubako zo guturamo, ahakorera inzego za leta ndetse n’imisigiti.

KAYITARE JEAN PAUL

  • Imvaho Nshya
  • Ukwakira 9, 2023
  • Hashize amezi 8
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE