U Rwanda rwakiriwe mu Ihuriro ry’Ubucuruzi ku Isi

Ambasade y’u Rwanda muri Korea yakiriye Sinan Ozturk, umuyobozi w’Ihuriro ry’Ubucuruzi ku Isi (Global Business Alliance, GBA).

Muri iri huriro ni ho hahurizwa ibigo by’ubucuruzi byo muri Korea n’ibindi byo muri Korea bikora ubucuruzi mpuzamahanga.

Binyuze mu butumwa bugufi bwatambutse ku rubuga rwa X rukoreshwa na Ambasade y’u Rwanda muri Korea, buvuga ko GBA yakiriye u Rwanda nk’umunyamuryango.

Bugira buti “GBA yahaye ikaze u Rwanda nk’umunyamuryango inasobanura inyungu zo guhuza Sosiyete z’ubucuruzi mu Rwanda na Korea haba mu ishoramari ryo kwinjiza cyangwa kohereza ibicuruzwa”.

Kuva mu 1963 u Rwanda na Korea y’Epfo ni bwo byatangiye kubana nk’ibihugu by’inshuti.

Korea yagiye ifasha u Rwanda mu bijyanye n’uburezi, kubaka ubushobozi mu bakozi, kwigisha imyuga n’ubumenyingiro, guteza imbere ikoranabuhanga, guteza imbere ibyaro n’ibindi byinshi bikorwa n’ikigo cyabo cy’iterambere mpuzamahanga (KOICA) gikorera mu Rwanda kuva mu 2006.

KAYITARE JEAN PAUL