Rwamagana: Abafite ubumuga boroye ingurube zibateza imbere boroza n’abandi

  • NSHIMIYIMANA FAUSTIN
  • Ukuboza 4, 2023
  • Hashize amezi 3
Image

Bamwe mu bafite ubumuga bo mu Murenge wa Nyakariro mu Karere ka Rwamagana bibumbiye muri Koperative KOPABI-Nyakariro ikora ubworozi bw’ingurube, bagaragaza ko uyu mushinga wabafashije kwikura mu bukene ukabateza imbere ndetse bakoroza n’abandi batishoboye.

Koperative KOPABI-Nyakariro ikorera mu Kagari ka Munini mu Murenge wa Nyakariro, ikaba igizwe n’abafite ubumuga 25 bakora ubworozi bw’ingurube kuva mu mwaka wa 2018 ubwo babonaga ubuzima gatozi.

Ibyo bishimira bagezeho birimo kuba bariguriye ikibanza cy’ibihumbi magana ane by’amafaranga y’u Rwanda (400,000) cyo gukoreraho ubworozi bwabo, umurima ufite agaciro ka miliyoni ebyiri n’igice (2.500,000), korozanya n’ibindi.

Gusa bemeza ko ibi byose babigezeho biturutse ku nkunga y’ibihumbi magana arindwi (700,000) bahawe n’Akarere ka Rwamagana.

Uwanyirigira Devotha, Umuyobozi wa KOPABI-Nyakariro, yishimira ko ubworozi bakora bwatumye buri munyamuryango yiteza imbere biturutse kukorozwa ingurube.

Ubu batangiye gukora imishinga y’ubuhinzi bahuriyeho nka Koperative mu murima biguriye, ndetse bakanawuhingamo ibyo kurya by’ingurube zabo.

Ikindi kandi kuri konti ya Koperative bishimira ko hariho amafaranga y’u Rwanda arenga ibihumbi 525

Yagize ati: “Twatangiye umushinga w’ubworozi bw’ingurube biturutse ku misanzu abafite ubumuga twatangaga, buri kwezi amafaranga 500, ndetse twororera mu rugo rw’umunyamuryango. Ariko ntibyari bihagije kugeza ubwo Akarere kaduteye inkunga. Kuba muri Koperative byatumye abafite ubumuga badaheranwa n’agahinda ngo bigunge, kuko buri kwezi turaterana tukaganira tukungurana ibitekerezo n’imishinga yaduteza imbere.”

Yakomeje agira ati: “Mfite ingurube enye, ingurube zanteje imbere kuko ingurube nahawe zirabyara nkagurisha, nk’ubu nishyurira umwana wange ishuri ry’imyuga (TVET), imyambaro n’ibikoresho byo mu rugo ndabyigurira, kandi nanjye hari abo noroje barenga 10 tuzagabana zabyaye kandi na bo urumva ko zizabateza imbere.”

Abanyamuryango ba Koperative y’abafite ubumuga bishimira ko ubworozi bubateza imbere bakoroza n’abandi

Mujawase Theodosie na we yagize ati: “Koperative idutangira ubwisungane mu kwivuza ku miryango yacu, EjoHeza n’ibindi. Ubumuga mfite bwatumaga niheza nkaguma mu rugo ariko Koperative yatumye njya ahabona turaterana.

Ubu mfite inka naguze biturutse ku ngurube nagurishe. Mu rugo iyo ingurube yabyaye ngurisha icyana kimwe ibihumbi 20 Frw nkakemura ibibazo mfite, ubwo urumva rero iyo ifite ibyana 10 ko mbona menshi. Ubu mfite ebyiri kandi zishobora kubyara vuba.”

Umuhuzabikorwa w’Inama y’Igihugu y’Abantu bafite Ubumuga mu Karere ka Rwamagana, Nkikabahizi Ndaguza Jean Bosco, yavuze ko hari uburyo bafatanya n’ubuyobozi bw’Akarere n’Inzego z’ibanze mu gukurikira imishinga y’abafite ubumuga kugira ngo idasubira inyuma.

Yagize ati: “Ku bufatanye n’inzego z’ubuyobozi zitandukanye dufatanya gukurikirana no gutera inkunga imishinga y’abafite ubumuga kandi dufatanya no gutanga amahugurwa ku banyamuryango kugira ngo bamenye gucunga imitungo yabo no kubyaza umusaruro inyungu babona kugira ngo amatsinda atazasubira inyuma.”

Umuyobozi w’Akarere ka Rwamagana, Mbonyumuvunyi Radjab, yavuze ko amakoperative y’abafite ubumuga agira uruhare mu iterambere ry’imiryango yabo, Akarere n’igihugu, bityo nk’ubuyobozi bw’Akarere bakaba bazakomeza kubaba hafi no kubashyigikira mu byo bakora.

Yagize ati: “Dufite amakoperative akora ubworozi, abadoda inkweto, ubukorikori, ababaza n’abandi kandi bose aho bamaze kugera uyu munsi bamaze kwiteza imbere; baritunze kandi batunze imiryango yabo ariko hejuru y’ibyo bateza n’imbere Akarere n’igihugu kubera ko ibikorwa bakora ntabwo bibaheramo kuko babikorera Abanyarwanda yaba ababaguraho, abo baha akazi kuko batanga n’imirimo, bamaze rero kugera ahantu hashimishije. Icyo dusabwa kubafasha ni ugukomeza kubashyigikira no kubaherekeza muri ibyo bikorwa.”

Mu Karere ka Rwamagana habarizwa amakoperative y’abafite ubumuga 72 agizwe n’amabanyamuryango 1,992. Muri rusange abafite ubumuga mu Karere ka Rwamagana bakaba ari 3,997 muri bo abana bakaba bangana na 802.

Ba,we mu bahuriye muri Koperative KOPABI Nyakaliro
  • NSHIMIYIMANA FAUSTIN
  • Ukuboza 4, 2023
  • Hashize amezi 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE