Rusizi: Umurinzi wa SACCO arakekwaho kwica umugore we agahungira i Burundi

  • BAHUWIYONGERA SYLVESTRE
  • Gashyantare 8, 2024
  • Hashize amezi 3
Image

Nizeyimana Cyprien w’imyaka 48, ukora akazi k’izamu muri SACCO ya Bweyeye mu Karere ka Rusizi, arakekwaho kwica umugore we Mukarutabana Annonciatha w’imyaka 42 amukubise ishoka mu mutwe agahungira i Burundi.

Amakuru umwe mu baturanyi yahaye Imvaho Nshya, avuga ko byabaye  saa kumi n’ebyiri z’igitondo kuri uyu wa Kane tariki ya 8 Gashyantare, ubwo uyu mugore yajyaga gutema igiti cyo gucana mu ishyamba ashwanira n’umugabo we.

Bivugwa kandi ko amakimbirane y’uyu mugabo n’umugore we amaze imyaka irenga 10, ndetse ngo bombi bari bamaze imyaka irenga ibiri batabana.

Iryo shyamba yamutemeyemo buri wese yajyaga aryita irye. Bivuwa ko umugabo yasanze atema igiti amwambura ishoka yakoreshaga maze ahita ayimwasa mu mutwe undi na we ntiyarushya asamba.

Umugabo abonye ibyo akoze, yahise yambuka umugezi wa Ruhwa acikira i Burundi. Umwe mu baturanyi b’ubu muryango yagize ati: “Amakimbirane yabo amaze imyaka irenga 10 bapfa imitungo irimo n’iryo shyamba. Ubuyobozi bwakoze uko bushoboye burabunga birananirana, n’imiryango iragerageza biranga.”

Byatangiye baba mu kazu gato mu Mudugudu wa Mudasomwa, Akagari ka Kiyabo, ariko umugabo agura inzu nini mu Mudugudu wa Mbisabasaba muri ako Kagari.

Nubwo bari bateye imbere bakomeje gushyamirana, ubuyobozi bubabwira ko niba kumvikana binaniranye baba batadukanye by’agateganyo, aho kugira ngo umwe azice undi.

Muri uko gutandukana, umugore yagiye muri iyo nzu nini yo mu Mudugudu wa Mbisabasaba n’abana batanu bafitanye, umugabo asigara mu gato kari mu wa Mudasomwa, ariko n’ubundi umugore akajya amusanga aho yamusize bakongera bagashyamirana.

Byageze aho umugabo aramuhunga amara umwaka n’igice batazi iyo aba, aho yagiye ubuzima bumukubise agaruka iwe muri iyi minsi. Agatutse ni bwo yasubiye ku kazi ko kuri SACCO ya Bweyeye.

Mu gitondo cyo kuri uyu wa Kane ni bwo umugore yazindukanye n’umukobwa wabo w’imfura w’imyaka 18, bajya gutema igiti cyo gucana muri iryo shyamba riri iruhande rw’aho umugabo aba.

Ibiro by’Umurenge wa Bweyeye

Hari amakuru avuga ko mu rwego rwo guhosha amakimbirane yabo, ubuyobozi bwari bwagiye bubagabanya imirima  by’agateganyo ngo batazagira ubwo bicaniramo, n’amashyamba barayabagabanya iryo bapfuye rihabwa  umugabo.

Umuturanyi ati: “Ubwo umugore yazindukanaga n’umukobwa wabo w’imfura w’imyaka 18 muri iryo shyamba ryabaye imbarutso y’ubwo bwicanyi. Bagiye gutema mo icyo giti cyo gucana, bagitemye, batangira ku gicamo ingiga, iya mbere arayijyana ayitura haruguru y’urugo umugabo arimo.

Umugabo yiteguye kujya ku kazi kuko akora izamu ry’amanywa, yumva ikintu cyikubise hasi, agiye kureba asanga ni uwo mugore we uyihatuye agiye gusubira kuzana izindi kuko yari yanasize inkweto yari yambaye muri iryo shyamba.

“[…]Barashyamiranye  bizamo imirwano, umugore ariruka,umugabo amwirukaho, amwambura ya shoka ayimukubita mu mutwe, umugore yikubita hasi apfa adasambye, umugabo ahita yambuka umugezi wa Ruhwa acikira i Burundi.”

Umunyamabanga Nshingwabikorwa w’Umurenge wa Bweyeye Ndamyimana Daniel, yemeje aya makuru, anavuga ko bari barabagiriye inama igihe kinini byaranze.

Yavuze ko bibwiraga ko ubwo batakibana mu nzu imwe byari guhosha amakimbirane yabo, ariko ngo ntibyakunze kuko umugore yajyaga anamusanga aho umugabo yamuhungiye.

Ati: “Ntako tutari twaragize byaranze kuko uretse urwo rugo, hari n’izindi zari ziyafitanye, ku bufatanye n’inzego z’umutekano n’abanyamadini n’amatorero ingo 8 ziyemeza guhinduka, izindi zirimo urwo biranga kugeza uyu munsi mugitondo dutunguwe n’inkuru mbi itugezeho ko umugabo amwishe agahungira i Burundi. ‘’

Yasabye abafitanye amakimbirane kujya bayageza ku buyobozi bukayakemura, byakwanga bagatandukana mu mahoro aho kwamburana ubuzima kuko nta n’umwe ubyungukiramo.

Anasaba abaturage kujya bihutira gutanga amakuru aho bumvise urugo rushyamiranye, kugira ngo rugendererwe hakiri kare bungwe cyangwa hagire ikindi gikorwa mu rwego rw’umutekano wabo n’uw’abana babo.

Mu gihe nyakwigendera ategereje gushyingurwa, bivugwa ko ukekwaho kumwica akirimo gushakishwa n’Inzego z’umutekano ngo agarurwe aho yakoreye icyaha akiryozwe.

  • BAHUWIYONGERA SYLVESTRE
  • Gashyantare 8, 2024
  • Hashize amezi 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE