Rusizi:  Impungenge ku buke bw’urubyiruko rwitabira ubuhinzi bw’icyayi.

  • BAHUWIYONGERA SYLVESTRE
  • Ukuboza 8, 2023
  • Hashize amezi 6
Image

Abakora ubuhinzi bw’icyayi mu Karere ka Rusizi bafite impungenge z’uko ubuhinzi bw’icyayi bushobora gukendera mu myaka iri imbere muri ako Karere bitewe n’uko urubyiruko rwakabaye rwitoza kubukora rutabikozwa.

Ubuyobozi bw’Ihuriro ry’amakoperative 5 y’abahinzi b’icyayi mu Turere twa Rusizi na Nyamasheke (UCOTHEI) buvuga ko ubuhinzi bw’icyayi usanga bugaragaramo abakuze gusa, urubyiruko rukaba ruke cyane.

Ibyo babibonamo ikibazo gikwiye kuvugutirwa umuti n’inzego zose bireba, kugira ngo ubuhinzi bw’ibyayi bukomeze kuba umurage uhererekanywa mu bisekuru, cyane ko kiri mu bihingwa ngengabukungu bimenyekanisha u Rwanda mu ruhando mpuzamahanga.

Umuyobozi w’Ihuriro ry’Amakoperative y’abahinzi b’icyayi Kayitarama Epimaque, yavuze ko ari ikibazo kuko mu bahinzi barenga 13 000 bafite urubyiruko rutagera kuri 35%, abandi bose bari mu myaka yo hejuru.

Ati: “Urebye urubyiruko ntirwitabira neza ubuhinzi bw’icyayi kuko bisa n’umurage warazwe abakuze, ari bo batangiranye na cyo, hakaba n’uko kigira imvune nyinshi uhereye mu gutunganya imirima giterwamo, kugeza cyeze kigakurwa mu mirima, imyinshi ikanakoreshwa amafaranga rudafite ugasanga abakuze ari bo bihanganira iyo mirimo yose kurusha urubyiruko.”

Agaragaza impungenge z’uko abakuze bagenda basaza bavamo, iki cyuho kikaba gishobora kuzateza ikibazo cy’igabanyuka rikabije ry’umusaruro w’icyayi mu bihe biri imbere mu gihe cyaba kidafatiwe ingamba zihamye.

Avuga ko ikibabaje ari uko usanga rimwe na rimwe urubyiruko rwanga kujya mu buhinzi bw’icyayi kandi nta n’ikindi rurimo gukora.

Avuga ko muri manda ye y’imyaka 3, ku bufatanye n’abahagarariye amakoperative, bagiye gukora ubukangurambaga mu rubyiruko bakarugaragariza ibyiza biri muri ubu buhinzi kuko icyayi ari cyo cyonyine gishobora gusarurwa buri minsi 15 nubwo ugihinze bushya bisaba gutegereza imyaka nibura 3 ngo kimuhe umusaruro.

Nambajimana Simon w’imyaka 59, avuga ko ababazwa n’uko mu bana be 10, uwo abona ushishikajwe n’ubu buhinzi ari umwe gusa, kandi we akimazemo imyaka hafi 40.

Avuga ko iyo ababajije impamvu bamubwira ko kibamo imvune nyinshi batakwihanganira, imvura yabanyagirira mu mirima bacyitaho n’ibindi.

Ati: “Bamwe bambwira ko baba bashaka akazi bakora bambaye neza, batakanyagirirwamo, kabaha amafaranga y’ako kanya, abandi nkababonamo ubunebwe no kutita ku murimo nk’uko twakuze. Abandi bambwira ko badashaka ibitinda kuko guhinga icyo uzategereza imyaka 3 ngo kiguhe umusaruro batabikozwa kandi jye ndi gusaza, imbaraga zishira kubona uzansimbura bikazagorana.”

Avuga ko urubyiruko rutakwitabira imirimo nk’iyi hatabayeho imbaraga z’ubuyobozi mu bukangurambaga, rukigishwa ko mucyayi harimo imirimo yunguka haba iyo kugihinga no kugisoroma, yababuze guhora bategereje akava imuhana

Twiringiyimana Olivier w’imyaka 20 avuga ko yabaye umusoromyi kandi ayo yakuyemo yamufashije cyane, akanenga bagenzi be bashaka ibyoroshye no kwirarira bigatuma batareba iterambere ry’ahazaza.

Ati: “Biterwa no kwirarira, kwiyemera, kwanga kwiyanduza, gushaka ifaranga ryihuse n’ibindi byoroshye kuko guhinga ikintu uzategereza imyaka 3 ngo kibone kuguha amafaranga ab’ubu mbona bitugora. Leta nitwereke inyungu zifatika zirimo tucyitabire bitabaye ibyo ikibazo kizakomeza kuba ingorabahizi.”

Umuyobozi w’impuzamahuriro y’amakoperative y’abahinzi b’icyayi mu Rwanda (UCOTHEI), Nkurikiyinka Jean Népomscène, avuga ko bafite intego zo gukuba kabiri umusaruro w’icyayi mu makoperative yose yabahinzi bacyo mu Rwanda mu myaka 5 iri imbere, kandi ko bidashoboka urubyiruko rutacyitabiriye.

Ati: “Tugiye kurukundisha icyayi, rugaragarizwe inyungu  ziri mu gukorera imirimo ijyanye na cyo yose ku gihe. Umusaruro wose nujya ushira mu mirima kandi imbaraga zarwo zikenewe muri ako kazi, kikongera ubwiza, kikarushaho gukundwa ku isoko mpuzamahanga, amafaranga avamo aziyongera rwunguke. Tugomba kubirubwira.”

Uyu muyobozi avuga ko nubwo nta bushakashatsi burabikorwaho ariko no ku rwego rw’Igihugu ubwitabire bw’urubyiruko mu buhinzi bw’icyayi  butarenga 35%.

Hakizimana Chrispin, Umuyobozi w’Ikigo cy’Igihugu gishinzwe iterambere ry’ubuhinzi n’Ubworozi (RAB) muri Rusizi na Nyamasheke, avuga ko gukangurira urubyiruko ubuhinzi muri rusange ari gahunda ya Leta, bityo ubukangurambaga bukomeje.  

Ati: “Urubyiruko rukwiye kwitabira ubuhinzi, ari icyo cyayi dukuramo amadovize n’ibihingwa ngandurarugo kugira ngo tubone umusaruro uhagije, kuko ni rwo rufite imbaraga n’ubumenyi buhagije bwo kubikora.”

Yavuze ko imbogamizi rugaragaza zirimo iz’ubutaka buke, imirimo igoye igikorerwamo n’ibindi, ariko akavuga ko ibyo bibazo bigenda bishakirwa umuti urambye.

  • BAHUWIYONGERA SYLVESTRE
  • Ukuboza 8, 2023
  • Hashize amezi 6
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE