Ruhango: Abikorera bashimirwa uruhare bagira mu guhindura isura y’umujyi

  • Imvaho Nshya
  • Ugushyingo 21, 2023
  • Hashize amezi 3
Image

Bamwe mu bakorera mu mujyi wa Ruhango baravuga ko bashimishijwe no gutangira serivisi ahantu heza havuguruwe hakajyanishwa n’igishushanyombonera babigizemo uruhare, bakanabishimirwa n’Akarere.

Batangarije Imvaho Nshya ko kuba barakiranye ingoga kuvugurura inzu zabo babitewe nuko bashakaga gutangira serivisi ahantu heza kandi hasa neza.

Ntakirutimana Louis ufite umuryango w’ubucuruzi muri uyu mujyi avuga ko yajyaga abangamirwa naho yakoreraga mbere kandi acuruza imyaka akavuga ko ubu yagize isuku bijyanye nuko inzu imeze.

Yagize ati: “Mfite umuryango hano ariko mbere y’uko dusana hari umwanda ukabije, byarambangamiraga cyane ariko byarahindutse cyane kuko ntabwo wagira umwanda ukorera mu nzu nziza gutya kandi iyo imvura yagwaga abaguzi baranyagirwaga ugasanga n’ibicuruzwa biranyagiwe bikaba byaranangirikaga bikamuteza igihombo.

Kuvugurura uyu mujyi byahinduye isura y’umujyi, murabizi isengesho ryo kwa Yezu Nyirimpuhwe nibura rizamo abasaga ibihumbi 10 ku cyumweru cya mbere cy’ukwezi nabo bazajya baza gusaba serivisi ahantu heza habanogeye”.

Mutabazi Edmon avuga ko kuva hatangira igikorwa cyo kuvugurura umujyi ibintu byinshi byahindutse, n’umujyi ugasa neza ariko hakiri abakirimo kubaka nibarangiza uyu mujyi uzaba unogeye ijisho.

Ati:  “Hatangizwa ibikorwa byo kuvugurura umujyi twabonaga bitazahinduka ariko twabonye ubwiza bw’umujyi wacu nubwo hari abacyubaka ubona ko bose nibarangiza hazaba hari isura yihariye ugereranyije n’indi mijyi nagiyemo, kuko uyu wacu urihariye mbese mbona uzaba unogeye ijisho”.

Umuyobozi wungirije w’Urugaga rw’abikorera mu Karere ka Ruhango, Niyonshuti Pascasie avuga ko nk’abikorera bazakomeza gushyira mu bikorwa ibyo basabwe n’ubuyobozi dore ko na bo ari inyungu zabo gukorera ahantu heza.

Ati: “Twebwe nk’abikorera tuzakomeza gushyira mu bikorwa ibyo dusabwa gukora haba gutanga umusoro cyangwa kuvugurura inzu no gufasha abatishoboye ariko biragaragara ko kuvugurura umujyi byatumye tugira umujyi wakwiratwa n’utuye mu Ruhango wese, bityo tugasaba n’abafite ibibanza bitarubakwa gusaba ibyangombwa na bo bakubaka tukarushaho guteza imbere umujyi wacu”.

Yongeraho ko abikorera bose bashishikajwe no gukomeza gutanga umusanzu wabo mu kwihutisha iterambere ry’ibikorwa remezo no gukorera ahantu hatekanye.

Umuyobozi w’Akarere ka Ruhango, Habarurema Valens avuga ko iyi gahunda yo gukesha umujyi bajya kuyitangiza abikorera bagaragazaga ko bagifite ibibazo bitandukanye, ariko byakunze.

 Ati: “Abikorera bagaragaje ko bafite ibibazo, nyuma yaho tubafasha kubona ibyangombwa byo kubaka kandi babibona bitabagoye nabo bagira umugambi wo guhindura inzu zabo, kugira ngo bakorere ahantu heza hafite isuku kandi twabonye ko aha byashobotse hari n’abandi badusaba ko na bo bafashwa mu bice byo mu Mirenge ya Kinazi, Byimana, Gitwe na Buhanda ubona ko batewe ishema no gutanga serivisi nziza kandi zigatangirwa ahantu heza. Tirashimira abikorera uruhare bagize mu guhindura isura y’umujyi”.

Meya Habarurema avuga ko n’abandi batarabona ubushobozi bazakomeza gufashwa ngo babone uko batangiza imishinga kandi nk’ubuyobozi bwiteguye mu kubafasha kubona ibyangombwa byo kuvugurura inyubako zabo mu buryo bwihuse.

Usibye iyi gahunda yo gukesha umujyi wa Ruhango hari na gahunda zo gutera indabo ku nkengero z’umuhanda aho aka Karere kagabanira n’Uturere twa Nyanza na Muhanga mu rwego rwo kwereka abinjira mu Karere ko bageze mu Ruhango.

AKIMANA JEAN DE DIEU

  • Imvaho Nshya
  • Ugushyingo 21, 2023
  • Hashize amezi 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE