Rubavu: Urubyiruko rwahwituwe ku bwandu bushya bwa virusi Itera SIDA

  • Imvaho Nshya
  • Ukuboza 11, 2023
  • Hashize amezi 3
Image

Inzego z’ubuzima zasabye urubyiruko rwo mu Karere ka Rubavu kuba  maso ku bwandu bushya bwa Virusi Itera SIDA bukomeje kugaragaza ubwiganze mu rubyiruko kurusha abakuze kandi ari rwo ejo hazaza h’u Rwanda.

Byagarutsweho mu Karere ka Rubavu kuwa 10 Ukuboza 2023 mu bukangurambaga bwakozwe na Minisiteri y’Ubuzima, Ikigo cy’Igihugu gishinzwe ubuzima bari kumwe n’umufatanyabikorwa muri gahunda zo kurwanya SIDA, AHF Rwanda.

Ni ubukangurambaga bwabanjirijwe na Siporo Rusange ikunze guhuza abantu benshi biganjemo urubyiruko.

Dr. Bazile Ikuzo, Umuyobozi ushinzwe kurwanya SIDA mu Kigo cy’Igihugu  cy’Ubuzima (RBC), yavuze ko kuba bakoreye ubukangurambaga i Rubavu  nta kintu kidasanzwe cyabaye cyatumye baza mu bukangurambaga burwanya SIDA.

Yavuze ko bafite  gahunda y’amezi atandatu y’ubukangurambaga batangiye kuwa 30 Ugushyingo 2023, aho bari kwibanda ku rubyiruko rugaragara cyane nk’urwugarijwe na Virusi itera SIDA.

Avuga ko ubwandu bushya buri mu rubyiruko rufite hagati y’imyaka 10-25 ku kigero cya 35%.

Zimwe mu ngamba zihari mu kurwanya ko ubwandu bwakwiyongera harimo gukangurira buri wese kumenya ko serivisi zifasha abashaka kwirinda cyangwa abanduye zihari kandi zitangirwa ubuntu mu gihugu hose.

Dr. Ikuzo avuga ko bimwe mu bituma urubyiruko rwisanga mu bwandu ari rwinshi harimo kuba urubyiruko rufite ubumenyi budahagije, kugendera mu bigare bigatuma bibaganisha mu mibonano idakingiye, ubukene n’ibindi bitandukanye.

Agira ati: “Turi kuzamura ubukangurambaga mu rubyiruko turusanga mu mashuri, ku bibuga bakiniraho, ku mbuga Nkoranyambaga nka Twitter, Facebook, Instagram n’ ahandi bahurira tubigisha kubegereza serivisi tugerageza kubegera ku buryo byaborohera kwirinda.”

Ubuyobozi bwa RBC buvuga ko ugereranyije n’imyaka yatambutse SIDA iri kugabanyuka cyane kubera ingamba zafashwe zigamije kuyirandura ndetse mu mwaka wa 2030 nta barwayi bashya ba SIDA bazaba bahari.

Umuyobozi Mukuru w’Umuryango AHF Rwanda Rangira Lambert, avuga ko mu rwego rwo gukumira ukwiyongera k’ubwandu bushya bwa Virusi itera SIDA biyemeje kugira uruhare mu kongera umubare w’ahasangwa udukingirizo na Sirivisi zifasha mu bwirinzi.

Agira ati: “Dufite abantu henshi hatangirwa urukingirizo ku buntu mbere twahisemo ahantu usanga abantu benshi bahurira kugira ngo ugiye gukora imibonano mpuzabitsina abone agakingirizo mu buryo bworoshye kandi ku buntu. Mu ngamba dufite ni ukuhongera hakaba henshi cyane, ikindi mu mikoranire dufitanye n’urwego rw’ubuzima dufite gahunda mu kongera ahatangirwa serivisi zo kurwanya SIDA mu bigo nderabuzima biri mu gihugu byose, bizadufasha guhangana burundu n’ubwandu bushya.”

Uwase Esther, umwe mu rubyiruko rwo mu Karere ka Rubavu, yemeza ko akora imibonano mpuzabitsina, ariko agakoresha agakingirizo mu kwirinda asaba bagenzi be kuzibukira.

Agira ati:” Ni byo koko mu bana bakiri bato higanjemo ubwandu bwa virusi itera SIDA ahanini kubera ibishuko, ibigare, ubukene butera kwifuza kubaho neza ugasimbuka urwego rwawe, usanga umukobwa ashaka kubaho nka runaka kandi badahuje ubushobozi kumushuka biba byoroshye.

Avuga ko muri urwo rubyiruko usanga abafite ibibazo cyane ari abakobwa bari kwanduzwa n’ababashukisha uduhendabana akabasaba kubungabunga amagara yabo kuko aseseka ntayorwe.

Abashishikariza kwifata ariko n’ubona bimugoye akibuka gukoresha agakingirizo kuko turi ahantu henshi, hakaba n’utubonerwa ubuntu.

  • Imvaho Nshya
  • Ukuboza 11, 2023
  • Hashize amezi 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE