REG BBC na Patriots BBC zitwaye neza ku munsi wa gatatu wa Shampiyona (Amafoto)

REG BBC yatsinze RSSB amanota 69-55, Patriots BBC itsinda UGB amanota 87-70 mu mikino y’umunsi wa gatatu wa Shampiyona ya Basketball.

Iyi mikino yombi yabaye mu ijoro ryo ku wa Gatanu, tariki 20 Gashyantare 2026, muri BK Arena.

Wari umukino witezwe cyane wahuje RSSB Tigers na REG BBC dore ko amakipe yombi ataratsindwa muri shampiyona muri uyu mwaka.

Ni umukino watangiye ugenda gake amakipe yombi atsinda amanota make. Agace ka mbere karangiye REG BBC iwuyoboye n’amanota 13-8.

Mu gace ka kabiri, iyi kipe yakomeje kongera ikinyuranyo cy’amanota binyuze mu bakinnyi barimo Muhizi Prince na Furaha Cadeau de Dieu kigera mu manota 10 (24-14).

Mu minota ya nyuma y’aka gace, Tigers yiminjiriyemo agafu, Albert Odero na Antino Jackson bakuramo ikinyuranyo.

Icyakora Elliott Cole yatsinze amanota atatu y’ingenzi yatumye igice cya mbere kirangira REG BBC yatsinze RSSB Tigers amanota 35 kuri 31.

REG BBC yakomeje gukina neza no mu gace ka gatatu Muhizi Prince ayitsindira amanota menshi bityo izamura ikinyuranyo kigera mu manota 10 (49-39).

Tigers ntiyagaragazaga imbaraga cyane kuko n’abakinnyi igenderaho nka Antony Tarke, Odero na Antino Jackson bari bafite amakosa atatu byatumaga bakina bigengesera.

Agace ka gatatu karangiye REG BBC ikomeje kuyobora umukino n’amanota 55 kuri 39 ya RSSB Tigers.

Mu gace ka nyuma Tigers yashatse gusubira mu mukino no kugabanya ikinyuranyo ariko biranga.

Umukino warangiye REG BBC yatsinze RSSB Tigers amanota 69-55, yuzuza umukino wa gatatu wikurikiranya itsinda ni mu gihe Tigers BBC yatsinzwe umukino wa mbere.

Umukino wabanje, Patriots BBC yatsinze UGB amanota 87-70, uba umukino wa gatatu wikurikiranya iyi kipe itsinzwe.