RDC: FARDC yagabye ibitero kuri M23, irangije irabyigurutsa

Ku Cyumweru tariki ya 1 Ukwakira 2023, imirwano hagati y’ingabo za Repubulika Iharanira Demokarasi ya Congo (FARDC) n’inyeshyamba za M23 yongeye kubura mu Burasirazuba bw’iki gihugu mu Ntara ya Kivu y’Amajyaruguru.

Mu gihe inyeshyamba za M23 zatangaje ko Ingabo za FARDC zabagabyeho igitero i Kilorirwe hafi y’i Masisi, ubuyobozi bwa FARDC buhita busohora itangazo ko atari bwo bwagabye icyo gitero, bushimangira ko FARDC ikomeje kwiyemeza gahunda yo guhagarika imirwano.

Impande zihanganye zasohoye amatangazo zitana ba mwana ku watangije imirwano no kutubahiriza amasezerano agamije guhagarika imirwano.

Ni imirwano yabereye muri  Teritwari ya Masisi, izi mpande zihanganye zasabye  Umuryango w’Afurika y’Iburasirazuba kugira icyo ukora ugahosha iyi mirwano mu bwumvikane.

Umuvugizi w’igisirikare cya FARDC mu Ntara ya Kivu y’amajyaruguru Lt Col Guillaume Ndjike Kaiko yashinje umutwe wa M23 gushaka kongera kwisubiza uduce yari yavuyemo ikadusigira ingabo za EAC hagamijwe guhagarika imirwano.

Gusa ariko M23 na yo Umuvugizi wayo mu bya Politiki Lawrence Kanyuka yavuze ko iyi mirwano yatangijwe na FARDC hashingiwe ku biherutse gutangazwa na Perezida Tshisekedi ubwo yagezaga ijambo ku nteko rusange  ya 78 y’Umuryango w’Ababibumbe Loni  avuga ko atazigera agirana ibiganiro  na M23 bigamije gukemura ibibazo.

Kanyuka yagize ati: “M23 iramagana icyemezo cya Perezida Tshisekedi cyo gutangaza intambara kandi nyamara imiryango mpuzamahanga yamaganye kenshi ibi bibazo by’amakimbirane bikomeje guteza umutekano muke.”

Yongeyeho ko kandi Leta ya Kinshasa ikomeje gukorana n’indi mitwe mu rwego rwo guhisha intege nke zayo.

Bamwe mu bayobozi bakuru muri Guverinoma ya Congo Kinshasa bamaze iminsi  batangaza ko bashaka kuzagaba ibitero bigamije kurwanya izi nyeshyamba aho hashize n’iminsi FARDC yitoza mu buryo bukomeye ndetese mu minsi yashize yatangaje ku mugaragaro imyambaro ingabo zizakoresha mu ntambara.

Umutwe wa M23 watangije imirwano yeruye ku ngabo za Congo mu kwezi k’Ugushyingo kwa 2021 aho hari hagiye gushira imyaka 10 ihungiye muri Uganda mu mwaka wa 2013.

Uyu mutwe wakomeje gutangaza ko utazihanganira ko Guverinoma yirengagiza amasezerano bagiranye  yo kuvanga ingabo ikaba inakomeje guheza bamwe mu baturage bavuga Ikinyarwanda by’umwihariko abo mu bwoko bw’Abatutsi mu burasirazuba bwa Congo bicwa umunsi ku munsi n’imitwe isanzwe ikorana na Guverinoma yiswe Wazalendo ndetse  n’umutwe wa FDLR.

M23 kandi ikomeza gushinja RDC kwirengagiza amasezerano yashyizweho n’Abakuru b’Ibihugu by’Akarere ka EAC yasinywe tariki ya 4 Gashyantare 2023, agamije ko M23 na Guverinoma ya Kinshasa bahagarika imirwano ahubwo bakaganira ku cyatuma amahoro n’umutekano  bigaruka  mu burasirazuba bwa Congo.