Igikombe cy’Amahoro: Rayon Sports na Mukura VS zatangiye neza imikino ya 1/8

Ikipe ya Rayon Sports yatsinze City Boys ibitego 2-0, Mukura VS itsindira Etincelles ibitego 2-1 i Rubavu mu gihe Marines FC yanganyije na AS Kigali ibitego 2-2 mu mikino ibanza ya 1/8 cy’Igikombe cy’Amahoro.

Ni imikino yakinwe kuri uyu wa Gatatu, tariki ya 18 Gashyantare 2026.

Kuri Kigali Pelé Stadium, Rayon Sports yari yakiriwe na City Boys yo mu Cyiciro cya Kabiri, umukino utagoye Rayon Sports kuko ku munota wa 32 yafunguye izami ku gitego cyatsinzwe na Rutahizamu Fall Ngagne n’umutwe, isoza Igice cya mbere iyoboye n’igitego 1-0.

Iyi kipe yambara umweru n’ubururu yakomeje gukina neza mu gice cya kabiri ishaka igitego cya kabiri,iza kubigeraho ku munota wa 66 na cyo gitsinzwe na Fall Ngagne n’umutwe.

Rayon Sports yashoboraga gutsinda ibindi bitego biturutse ku bundi buryo yabonye, ariko abakinnyi bayo basatira ntibabubyaza umusaruro.

Umukino warangiye Rayon Sports ktsinze City Boys ibitego 2-0, itangira neza imikino y’Igikombe cy’Amahoro.

I Rubavu, ibitego byitsinzwe na Irumva Justin na Joseph Sackey byafashije Mukura VS gutsinda Etincelles ibitego 2-1. Umukino wakurikiyeho Marines FC yanganyije na AS Kigali ibitego 2-2.

Mu y’indi mikino, Bugesera FC yatsinze Amagaju FC ibitego 2-1, Muhazi United inganya na Gorilla FC 0-0 naho Musanze FC inganya Gasogi United igitego 1-1.

Imikino yo kwishyura iteganyijwe ku wa 24 na 25 Gashyantare 2026.