Perezida wa Ukraine yasabye u Burayi n’Amerika inkunga y’intwaro

  • Imvaho Nshya
  • Werurwe 27, 2022
  • Hashize imyaka 2
Image

Perezida wa Ukraine Volodymyr Zelensky yashishikarije Leta z’ibihugu byo mu Burengerazuba bw’Isi (u Burayi n’Amerika) guha igihugu cye indege z’intambara, ibifaru, n’ubwirinzi bw’ibisasu bya misile byo kwifashishwa mu rugamba rwo guhangana n’u Burusiya bwagabye igitero kuri icyo Gihugu bwirengagije ubusugire bwacyo.

Mu ijambo yagaragajemo imbamutima ryo mu buryo bwa videwo yavuze mu ijoro ryo ku wa Gatandatu, Perezida Zelensky yavuze ko intwaro zishobora kuba zarinda ubwisanzure i Burayi ahubwo ubu zirimo kujyaho ivumbi mu bubiko bwazo.

Perezida Zelensky yinubiye kuba indege z’intambara z’u Burusiya zidashobora guhanurwa n’imbunda zo mu bwoko bwa ‘machine guns’ (mitrailleuses).

Yongeyeho ati: “NATO [OTAN] irimo gukora iki? Irimo kuyoborwa n’u Burusiya? Bategereje iki? Hashize iminsi irenga 30. Turimo gusaba gusa 1% by’ibyo NATO ifite, nta kindi…”.

Minisitiri w’intebe wa Slovakia Eduard Heger, yabwiye BBC ko igihugu cye gifite ubushake bwo guha Ukraine ubwirinzi bwacyo bw’ibisasu bya misile bwa S-300 bwakorewe mu Burusiya, mu gihe Slovakia yaba ihawe ikibusimbura.

Hagati aho Perezida wa Leta Zunze Ubumwe z’Amerika na we yatangaje ko Perezida Vladmir Putin adakwiye kuguma ku buyobozi bw’u Burusiya nk’ubuyobozi bagaragaje imyitwarire idasanzwe muri Politiki mpuzamahanga, kuko yatangije ibikorwa bikomeje kwibasira umubare munini w’abasivili n’inzirakarengane.

Kuri iki Cyumweru ubaye umunsi wa 32 w’urugamba u Burusiya bwatangije kuri Ukraine bivugwa ko icyo gihugu gishaka kuba icyanzu cy’abanzi b’u Burusiya. Uyu musi hagaragaye misile zatewe mu mujyi wa Lviv uherereye mu bilometero 60 uturutse ku mupaka wa Ukraine na Poland.

Kugeza ubu ingabo za Ukraine zikomeje gukaza ibirindiro zihangana n’iz’u Burusiya zikomeje gushaka uko zakwigarurira Umurwa Mukuru Kyiv, cyane ko ibice bitandukanye bimaze kujya mu maboko y’u Burusiya.

Kugeza ubu bivugwa ko abasaga miliyoni 3.7 bamaze guhunga Igihugu cya Ukraine kuva iyi ntambara yatangira aho 90% byabo ari abagore n’abana, na ho abasaga miliyoni 6.5 bamaze gukurwa mu byabo n’iyi ntambara idatanga icyizere cyo kuba yahosha vuba.

  • Imvaho Nshya
  • Werurwe 27, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE