Perezida wa UAE yitabye Imana ku myaka 73 azize uburwayi

  • NTAWITONDA JEAN CLAUDE
  • Gicurasi 13, 2022
  • Hashize imyaka 2
Image

Ibihugu byo mu bigobe bya Peresi byatangiye icyunamo cy’iminsi 40 nyuma y’aho bitangajwe ko Sheikh Khalifa bin Zayed Al Nahyan wari Perezida wa Leta Zunze Ubumwe z’Abarabu (UAE), yitabye Imana azize uburwayi yari amaranye imyaka myinshi.

Urupfu rw’uyu muyobozi usezeye ku Isi afite imyaka 73 y’amavuko  rwamenyekanye kuri uyu wa Gatanu taliki ya 13 Gicurasi nk’uko byatangajwe n’Ikigo cy’Itangazamakuru cya Leta (Wam).

Minisiteri ishinzwe ibikorwa bya Perezidansi n’amahanga yahise itangaza icyunamo cy’iminsi 40 aho amabendera yose y’igihugu azamara amanuye mu cya kabiri, ndetse bikaba byabaye ngombwa ko inzego zitandukanye guhera kuri za Minisiteri ukageza kubikorera zizamara iminsi itatu yose zidakora.

Mu itangazo ryatangajwe na Wam, iyo Minisiteri yihanganishije abaturage ba UAE, Umuryango w’Abarabu, ibihugu by’Abayisilamu n’Isi yose ibuze umwe mu bayobozi b’icyerekezo Perezida Sheikh Khalifa bin Zayed Al Nahyan.

Visi Perezida akaba n’Umuobozi wa Dubai Sheikh Mohammed bin Rashid, yagaragaje akababaro yatewe n’iyi nkuru y’inshamugongo.

Ati: “Mu kababaro n’agahinda kenshi, tubabajwe no kwifatanya n’abaturage ba UAE, ibihugu by’Abarabu n’Abayisilamu ndetse n’Isi mu kunamira Perezida w’Igihugu cyacu Sheikh Khalifa bin Zayed Al Nahyan, Umuyobozi w’urugendo rwacu. Allah ahire roho ye kandi ayorohereze mu rugendo rushya rwa nyuma y’ubu buzima kandi azahabwe isumbwe rikomeye muri Paradizo.”

Abandi bayobozi bakomeye ku Isi bakomeje kwifatanya na UAE ibuze umuyobozi w’icyitegererezo, bose bakaba bakomeje kumwifuriza iruhko ridashira.  

Mu mwaka wa 2014 ni bwo Sheikh Khalifa yarwaye indwara ya Stroke ndetse bimuviramo kubagwa; ibyo byatumye adakomeza kugaragara mu ruhame kenshi nk’uko byahoze mbere.

Uruhare rwe mu buyobozi rwasigaye ari urw’icyubahiro ariko akaba ari na we wasohoraga amataganzo menshi arebana n’ibikorwa bya Politiki nubwo Igihugu cyasaga n’aho kiyobowe n’umuvandimwe we akaba igikomangoma cya Abu Dhabi Sheikh Mohammed bin Zayed.

Sheikh Khalifa yavukiye i Abu Dhabi mu mwaka wa 1948, mu myaka 23 mbere y’ishingwa rya UAE mu 1971. Ni we wari umuhungu w’imfura wa Sheikh Zayed washinze iki gihugu. Mbere yo gufata ubuyobozi, yari igikomangoma cya mbere cya Abu Dhabi akaba n’Umuyobozi w’Inama y’Ikirenga Ishinzwe ibya Peteroli.

  • NTAWITONDA JEAN CLAUDE
  • Gicurasi 13, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE