Perezida wa Santarafurika yakiriye ku meza Ingabo z’u Rwanda

  • NTAWITONDA JEAN CLAUDE
  • Ukwakira 2, 2022
  • Hashize imyaka 2
Image

Ku munsi wo ku wa Gatandatu, byari ibirori   bibereye ijisho mu rugo rwa Perezida wa Santarafurika Faustin Archange Touadéra ruherereye mu Karere ka Damara, nyuma y’aho we na Madamu we batumiye Ingabo z’u Rwanda ngo basangire iby’umugoroba.

Ni ibirori byitabiriwe n’abofisiye bakuru, ba suzofisiye n’abasirikare bo mu bindi byiciro bagera kuri 200, bikaba byabaye mu busabane bwo gusangira, imyiyereko no gucinya akadiho. 

Ingabo z’u Rwanda zakiriwe ni izoherejwe gucunga umutekano ku bufatanye bwa Leta y’u Rwanda n’iya Santarafurika, ababarizwa muri iyo batayo bakaba bagaragaje ubuhanga bafite mu mbyino gakondo no mu mikino njyarugamba nka bimwe mu bikorwa by’imyidagaduro byaranze ibirori. 

Ubwo bagaragazaga impano bafite mu mbyino gakondo, Perezida Touadéra yanze kubyihererana na we abiyungaho si ukubyina kinyarwanda karahava!

Perezida Touadéra ageza ijambo ku bitabiriye ubwo butumire, yashimiye u Rwanda na Perezida wa Repubulika Paul Kagame bashyigikira kandi bagakorana neza na Repubulika ya Santarafurika by’umwihariko mu birebana no gusigasira amahoro n’umutekano.

Umugaba w’Ingabo zisaga 300 zoherejwe muri ubwo butumwa, Col Egide Ndayizeye, yashimiye Perezida Touadéra ku bw’urugwiro yabakiranye ndetse anaboneraho kuvuga imyato ubufatanye buzira amakemwa burangwa hagati y’Ingabo z’u Rwanda n’iza Santarafurika mu guharanira umutekano urambye muri icyo Gihugu. 

Santarafurika ni kimwe mu bihugu by’Afurika bikomeje kwishimira uruhare rw’inzego z’umutekano z’u Rwanda mu kubigarurira amahoro. 

Iki gihugu cya Santarafurkka cyari cyaribasiwe n’amacakubiri aherekejwe n’ubwicanyi bw’urudaca bwakorwaga m’imitwe yitwaje intwaro ya Seleka na Anti Balaka. 

Ingabo z’u Rwanda zageze muri icyo Gihugu bwa mbere mu mwaka wa 2014,  zoherejwe mu butumwa bw’Umuryango w’Abibumbye bwo kugarura amahoro (MINUSCA), ariko zikigerayo zahise zigirirwa icyizere zihabwa kurinda Umukuru w’Igihugu, abakozi ba Loni n’abandi banyacyubahiro. 

Mu mpera z’umwaka wa 2020 ni bwo u Rwanda rwoherereje iki gihugu abasirikare 300 bo gutera ingabo mu bitugu aboherejwe muri MINUSCA, kikaba ari igikorwa cyakozwe hagendewe ku masezerano ibihugu byombi bifitanye mu birebana no gucunga umutekano. 

Hagati aho, Umugaba Mukuru wungirije w’Ingabo za Repubulika ya Santarafurika (FACA) ushinzwe ibikorwa bya gisirikare Brig Gen Freddy Sakama, yasoje uruzinduko rw’icyumweru amazemo mu Rwanda n’itsinda ryari rimuherekeje. 

Urwo ruzinduko rwari rugamije kurushaho gushimangira umubano ingabo z’ibihugu byombi zifitanye.  

Mu minsi amaze mu Rwanda, we n’itsinda rimugaragiye basuye Ibirindiro Bikuru by’Ingabo z’u Rwanda n’ibindi bigo bya gisirikare binyuranye aho bagiye basobanurirwa imikorere yabyo.

Banasuye kandi Urwibutso rwa Jenoside rwa Kigali, bunamira abazize Jenoside yakorewe Abatutsi, nyuma bakomereza no ku Ngoro Ndangamurage y’Urugamba rwo guhagarika Jenoside.

  • NTAWITONDA JEAN CLAUDE
  • Ukwakira 2, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE