Perezida usanzwe ku butegetsi muri Uganda, Yoweri Kaguta Museveni, yongeye gutsinda amatora y’Umukuru w’Igihugu n’amajwi 71.65%, mu matora yabaye tariki ya 15 Mutarama 2026.
Ibi byatangajwe kuri uyu wa Gatandatu na Simon Byabakama Mugenyi, Perezida wa Komisiyo y’Igihugu y’Amatora, nyuma y’ibarura rya nyuma ryaturutse muri site z’amatora zirenga 50 000 ryari rirangiye.
Mu gihe cyose ibarura ry’amajwi ryatangiye ku wa Gatanu, aho Perezida Museveni yakomeje kuyobora ku majwi menshi ugeranyije n’abo bari bahanganye.
Nk’uko ibyavuye mu matora byemejwe bigaragaza ko Museveni yagize amajwi 7 946 772, angana na 71,65% by’amajwi yose y’abatoye.
Umunyapolitiki utavuga rumwe n’ubutegetsi Robert Kyagulanyi, uzwi nka Bobi Wine, ni we wamukurikiye, n’amajwi 2 741 238, angana na 24,72%. Kyagulanyi yanze kwemera ibyavuye mu matora, avuga ko atanyuze mu mucyo.
Abitabiriye amatora mu gihugu hose banganaga na miliyoni 11,3 bingana n’ijanisha rya 52,5%, muri miliyoni 21,6 bari biyandikishije kuri lisiti y’itora.
Nta gitekerezo kiratangwa. Ba uwa mbere gutanga igitekerezo.
Andika igitekerezo
AMATEGEKO AGENGA IYANDIKA RY'IGITEKEREZO CYAWE