Perezida Kagame ategerejwe i Trinidad mu nama ya CARICOM

  • NTAWITONDA JEAN CLAUDE
  • Nyakanga 4, 2023
  • Hashize amezi 11
Image

Perezida wa Repubulika y’u Rwanda Paul Kagame, ategerejwe i Trinidad kuri uyu wa Kabiri taliki ya 4 Nyakanga 2023, aho yitabiriye Inama y’Abakuru b’Ibihugu na Guverinoma bihuriye mu Muryango wa Karayibe (CARICOM) ahanizihizwa Isabukuru y’imyaka 50 y’uwo Muryango.

Ibiro bya Minisitiri w’Intebe w’Ibirwa bya Trinidad na Tobago byemeje ayo makuru ku wa Mbere taliki ya 3 Nyakanga, aho byashimangiraga ko kuri uyu wa Kabiri ari bwo biteguye kwakira Umukuru w’Igihugu cy’u Rwanda muri iyo nama yatangiye ku wa Mbere.

Perezida Kagame ni umwe mu banyacyubahiro n’abayobozi bo ku rwego rwo hejuru bitabiriye iyo nama ibaye ku nshuro ya 45, akaba ahurirayo na Perezida wa Koreya y’Epfo Yoon Suk Yeol, Umunyamabanga wa Leta Zunze Ubumwe z’Amerika (USA) Anthony Blinken, na Minisitiri w’Ububanyi n’Amahanga wungirije w’u Bushinwa Hua Chunying.

Perezida Kagame ni umwe mu bageza ijambo ku bitabiriye iyo nama ku ngingo zinyuranye zirimo izijyanye n’iterambere ry’Afurika, ubuyobozi n’imiyoborere, n’amahirwe ahebuje y’ikoranabuhanga mu gukemura ibibazo Isi ihanganye na byo, ari na ryo rihanzwe amaso mu mpinduka z’iterambere ry’Afurika.

Biteganyijwe kandi ko Perezida Kagame yitabira Ibirori  byo kwizihiza Isabukuru y’imyaka 50 ya CARICOM ndetse nyuma akazitabira n’umuhango wo gusangira iby’umugoroba wateguwe na Minisitiri w’Intebe wa Trinidad & Tobago Dr. Keith Rowley, biteganyijwe ku wa Gatatu taliki ya 5 Nyakanga.

CARICOM ni Umuryango uhuriyemo ibihugu 15 byo ku Mugabane w’Amerika no mu Nyanja y’Antalantika, icyicaro cyawo kikaba giherereye i Georgetown muri Leta ya Guyana.

Muri ibyo bihugu harimo n’icya Haiti, cyugarijwe n’amabandi yayogoje abaturage, aho Umunyamabanga Mukuru w’Umuryango w’Abibumbye Antonio Guterres yasabye ko hakoherezwa ubutumwa bwa Loni bw’abapolisi kugira ngo bafashe igihugu gukemura icyo kibazo.

Umunyamabanga Mukuru w’Umuryango w’Abimbumbye Antonio Guterres, ageza ijambo ku bitabiriye inama ya 45 ya CARICOM

Antonio Guterres yabigarutseho ku wa Mbere, mu ijambo yagejeje ku bitabiriye umuhango wo gufungura ku mugaragaro iyo nama, anagaragaza ko kugeza ubu nta gisubizo cya Politiki kiraboneka kubera ibibazo by’amateka Haiti yahuye na byo.

Yasabye ibihugu bigize CARICOM guhuza imbaraga bikunganira Haiti muri ibi bihe bigoye irimo, asaba n’Akanama gashinzwe Umutekano ku Isi kwemeza gahunda yo kohereza inzego z’umutekano muri Haiti mu gufasha Polisi y’aho guhashya amabandi akomeje guteza umutekano muke mu bice bitandukanye.

Roosevelt Skerritt, Minisitiri w’Intebe wa Repubulika ya Dominican akaba n’Umuyobozi Mukuru mushya wa CARICOM, yasabye amahanga guhuza imbaraga bagashyigikira ibisubizo Haiti ikomeje kwishakamo, ndetse ashimangira ko hazakomeza ibiganiro kugira ngo hashakwe umuti urambye.

Uretse Haiti, CARICOM ibarizwamo n’ibindi bihugu birimo Bahamas, Barbados, Belize, Dominica, Saint Kitts & Nevis, Anguilla, Bermuda, Ibirwa bya British Virgin, Ibirwa bya Cayman, Saint Lucia, Saint Vincent na Grenadines, Jamaica, Montserrat, Suriname, na Trinidad & Tobago.

Ibirwa bya Turks na Caicos, Aruba, Grenada, Guyana, Colombia, Repubulika ya Dominicani, Mexico, Puerto Rico na Venezuela na byo byamaze kubona uburenganzira bwo kwinjira muri uwo Muryango.

  • NTAWITONDA JEAN CLAUDE
  • Nyakanga 4, 2023
  • Hashize amezi 11
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE