Perezida Kagame na Museveni biyemeje gufatanya gukemura ikibazo cya RDC

  • Imvaho Nshya
  • Mata 25, 2022
  • Hashize imyaka 2
Image

Perezida wa Repubulika y’u Rwanda Paul Kagame na Perezida wa Uganda Yoweri Kaguta Museveni, biyemeje ubufatanye mu guharanira ko habaho amahoro n’umutekano mu Karere bakemura ikibazo cya Repubulika Iharanira Demokarasi ya Congo (RDC), nk’ibihugu bigize Umuryango w’Afurika y’Iburasirazuba (EAC).

Uko kwiyemeza kuje gukurikira icyemezo cyafashwe n’abayobozi batanu b’Ibihugu bigize EAC, cyo gushyiraho ingabo zihuriweho zirwanya imitwe y’inyeshyamba yahinduye RDC indiri yazo mu guhungabanya umutekano w’aka Karere kamaze kwakira RDC nk’Umunyamuryango wa karindwi.

Abakuru b’Ibihugu bya EAC basabye imitwe yose yitwaje intwaro ikorera muri RDC gushyira intwaro hasi nta yandi mananiza kandi iy’abanyamahanga igatahuka vuba na bwangu mu bihugu ikomokamo, itabyubahiriza igakomeza gufatwa nk’imitwe y’iterabwoba ikarandurwa n’ingabo zihuriweho n’ibihugu by’Akarere.

U Rwanda, Uganda ndetse n’u Burundi ni byo bihugu bikunze guhura n’ibibazo by’umutekano muke by’urudaca biterwa n’imitwe yitwaje intwaro ikorera muri RDC.

Abayobozi bombi bagiranye ibiganiro ku Cyumweru byibanze ku ngingo zitadukanye byabereye ku Ngoro ya Perezida wa Uganda, i Entebbe mu ruzinduko rwihariye Perezida Kagame yagiriye muri icyo Gihugu ku butumire bwa mugenzi we Perezida Museveni.

Perezida Kaguta Museveni na Madamu wa Perezida Janet Kataha Museveni batumiye Perezida Kagame mu birori byo guha icyubahiro umuhungu wabo akaba n’Umugaba w’Ingabo za Uganda (UPDF) zirwanira ku butaka Lt. Gen. Muhoozi Kainerugabawizihije isabukuru y’imyaka 48 amaze avutse.

Akigera i Entebbe, Perezida Kagame wari mu ruzinduko rw’umunsi umwe yakiriwe na Perezida Museveni, Madamu wa Perezida Janet Museveni n’Umuhungu wabo Lt. Gen. Muhoozi Kainerugaba.

Perezida Museveni yamuhaye ikaze anavuga ko ibibazo bikomeje kuzonga Akarere, nk’intambara z’urudanca zo muri RDC, bikeneye ubufatanye bw’abagize Umuryango wa EAC bose.

Perezida Museveni yagize ati: “Kuri ubu noneho tugomba gutsimbarara ku gukorera hamwe kuko aba bantu [ba RDC] barababaye cyane. Nabwiye Perezida wa Kenya Uhuru Kenyatta ko niba tutinjiye mu Karere, Congo ishobora guhinduka nka Sudani.”

Intambara z’urudaca muri Sudani zateje ibibazo bikomeye bigikurikirana Igihugu kugeza n’ubu. Icyiswe impinduramatwara muri Sudani cyabaye impinduka zikomeye mu buyobozi bwa Politiki y’iki gihugu gihereye ku myigaragambyo yo ku ya 19 Ukuboza 2018 kigakomereza no kutumvira kw’abaturage mu gihe cy’amezi umunani byabyaye ihirikwa ry’ubutegetsi bw’uwari Perezida Omar al-Bashir mu 2019.

Perezida Kagame na we yashimangiye ko ubufatanye bw’abagize Akarere ari ingenzi, ariko ashimangira ko ikibazo cya RDC kidakwiye kuba inshingano z’abandi, ahubwo  abayobozi n’abahagarariye amashyaka yose bagomba kumvikana binyuze mu biganiro by’amahoro kugira ngo ikibazo gikemuke burundu.

Ati: “Bakeneye kumvikana ntawe basize inyuma”.

Perezida Museveni kandi yamenyesheje Perezida Kagame ibijyanye n’ibiganiro byabereye i Nairobi muri Kenya hagati ya Guverinoma ya Congo n’inyeshyamba za M23 zikomeje imirwano mu Ntara ya Kivu y’Amajyaruguru.

Nyuma y’aho ni bwo Perezida Museveni afatanyije na Madamu we akaba na Minisitiri w’Uburezi na Siporo Janet Kataaha Museveni, bakiriye Perezida Kagame mu birori byo guha icyubahiro Lt Gen Muhoozi Kainerugaba wishimira imyaka 48 amaze ku Isi.

Perezida Kagame yaherukaga kugenderera Uganda muri Werurwe 2018, mu gihe agatotsi kari mu mubano w’ibihugu byombi kari katarajya hanze. Kuva ubwo kugeza mu mpera z’umwaka wa 2021 ibihugu byombi ntibyacanaga uwaka, nyuma Lt. Gen Muhoozi agira uruhare rukomeye mu kongera kuzahura uwo mubano bivugwa ko wari umaze imyaka ibarirwa muri itanu ujemo kidobya.

  • Imvaho Nshya
  • Mata 25, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE