Perezida Kagame na Mitsotakis: ‘Abimukira baba inyungu y’Afurika n’u Burayi’

  • NTAWITONDA JEAN CLAUDE
  • Gashyantare 21, 2022
  • Hashize imyaka 2
Image

“Afurika n’u Burayi bikwiye gushora imari mu kubaka ubushobozi bw’abaturage babyo mu guharanira ko abimukira babyara inyungu ku migabane yombi”, nk’uko byashimangiwe na Perezida wa Repubulika y’u Rwanda Paul Kagame na Minisitiri w’Intebe w’u Bugiriki Kyriakos Mitsotakis.

Aba bayobozi bombi bagaragaje ko isano iri hagati y’Afurika n’u Burayi yimbitse cyane. Uyu munsi imigabane yombi isangiye imbogamizi mu guharanira iterambere rirambye, izirebana n’imihindagurikire y’ikirere ndetse n’izijyanye no kwimukira ku ngufu zitangiza, izireba inzego z’ubuzima no kugera ku nkingo, ndetse amahoro n’umutekano.

Mu nkuru bandikiye Ikigo cy’Itangazamakuru gikomeye cy’I Burayi Euractiv, Perezida Kagame na Mitsotakis bavuze ko imbogamizi ziruta izindi ari izirebana n’umutungo w’abantu urenze indi mitungo yose. Bavuga ko gushora imari mu kubaka ubushobozi bw’abakozi bifite isano ya bugufi n’abimukira ndetse n’urujya n’uruza rukorwa hagati y’imigabane yombi.

Bati: “Ni ibiriho kandi bizakomeza kuba ikintu cy’ingenzi mu mibanire yacu mu myaka iri imbere. Kwimuka bishobora kugirira akamaro imigabane ibiri, mu gihe bitunganyijwe neza, bifite umutekano kandi byibanda ku byo buri muntu akeneye. Urujya n’uruza ni ikintu cy’ingenzi cyane kuri  Afurika n’u Burayi.”

Mu myaka ishize, cyane cyane ku nkombe z’u Burayi, ibihugu byagiye bihura n’inshingano zigoye: ku ruhande rumwe guhuza inshingano zo kwakira umubare wiyongera ubutitsa w’impunzi mu buryo bukwiriye, kubahiriza ibisabwa n’amategeko mpuzamahanga, ndetse ku rundi ruhande binasabwa kurinda ubusugire n’umutekano mu gihe hari abakora ibikorwa birimo ubucuruzi bwa magendu, gucuruza abantu n’ibindi. 

“[…] Ikibazo kirushaho kuba kibi muri Afurika icumbikiye hafi kimwe cya kane cy’impunzi ziboneka ku Isi. Ibihugu bike nk’u Rwanda, byakira abasaba ubuhungiro bikabaha n’uburenganzira bwabo bwo gukora, ariko ibyo biboneka hake. Umubare munini w’impunzi wisanga warafatiwe mu buzima bugoye bugenda bugabanya ubushobozi bwo guhanga ubuzima bushya.”

Perezida Kagame na Mitsotakis bakomeza bavuga ko ntawukwiye kuguma mu nzozi z’uburambe bw’ibisubizo biriho ubu. Bati: “Urufatiro rw’ibisubizo byacu, twizera ko rugomba gushingira ku kuri; ibisubizo birambye bishobora gutanga umusaruro mu gihe byibanze ku muzi w’ikibazo. Ibi bivuze guharanira ko urubyiruko rwose rw’Abanyafurika rubona amahirwe rukeneye haba ku mugabane cyangwa hanze yawo.”

Urubyiruko rukeneye amahirwe yo kongera ubumenyi n’ubushobozi

Perezida Kagame na mugenzi we, bashimangiye ko gutanga amahirwe yo kubona uburezi n’amahugurwa bikwiye haba ku mugabane w’u Burayi n’Afurika, bikajyana no gushora imari mu ikoranabuhanga rigezweho rihanga imirimo muri Afurika, bizafasha urubyiruko rw’Abanyafurika kuguma ku mugabane ndetse n’abimutse mbere bagatahuka mu bihugu byabo.

“[…] Bagomba nyuma ya byose kugira amahirwe yo kubaho ubuzima bwiyubashye, butanga umusaruro, n’umutekano ku mugabane w’Afurika. Bagomba kugira amahirwe yo kongera ubumenyi no kwagura ubushobozi bwabo, buhanga mu by’ikoranabuhanga na tekinoloji, binyuze mu mashuri no mu mahirwe yo gukora mu mahanga bituma bagarukana ubumenyi bw’agaciro gakomeye igihe bagarutse ku mugabane.”

Bemeza ko kuri ubu gukorera ikigo cy’i Burayi bidasaba kwimukira kuri uwo mugabane kuko gutanga ayo mahirwe bikwiye kujyana no kongera ishoramari mu ikoranabuhanga ryorohereza abari muri Afurika gukorera imirimo y’i Burayi ku mugabane wabo.

Urubyiruko rw’Afurika n’u Burayi rukeneye kubona amahirwe angana yo kongererwa ubumenyi n’ubushobozi

Kwagura imiterere y’urujya n’uruza hagati y’Afurika n’u Burayi ngo bishobora kuba urufunguzo rw’iterambere rirambye ku mpande zombi. Urujya n’uruza rw’ingenzi cyane ni urukozwe hagati y’ibihugu by’Afurika kuko rushobora gufungura amahirwe menshi atari yarigeze abyazwa umusaruro.

Guhanga imirimo mu nzego zirimo urw’ingufu zitangiza, ubukungu bwisubira mu kubyaza umusaruro ibyakoreshejwe , ubwikorezi butangiza ibidukikije ndetse n’ubuhinzi burambye, byagira uruhare rukomeye muri gahunda y’Isi yose yo guhangana n’imihindagurikire y’ikirere, ari na ko bifasha mu kubaka urufatiro rw’ubukungu bushya busangiwe n’Afurika n’u Burayi.

Gukangurira ishoramari ry’u Burayi guhanga imirimo muri izo nzego muri Afurika bishobora gufasha mu guhangana n’ikibazo cy’abimukira gihora cyisubira ndetse hakaboneka na ba rwiyemezamirimo. Ingamba ziriho zifashishwa ngo zikwiye kwagurwa, bityo hakaboneka izamuka ry’ubukungu riruseho, iterambere  ndetse n’ukwihuza kw’abaturage muri Afurika imbere.  

Perezida Kagame na Mitsotakis bemeza ko mu gihe gushora imari mu kongera ubumenyi n’ubushobozi ari ingenzi, ibyo ngo bikwiye kujyana no gushyiraho gahunda iboneye y’abinjira n’abasohoka ndetse no kugenzura urujya n’uruza.

“[…] Ubwimukira bucunzwe neza ni inshingano zisangiwe kandi zikaba n’imbogamizi, ari na yo mpamvu abafatanyabikorwa bakwiye kuba bemera gufatanya kuri bwo. Inama ihuza Umuryango w’Ubumwe bw’u Burayi n’Umuryango w’Afurika (EU-AU Summit) ni ikindi kimenyetso cy’ukwiyemeza mu guharanira iterambere kandi itanga ubwirinzi ku babukeneye hakurikijwe ibyo amategeko mpuzamahanga ateganya no kubahiriza uburenganzira bwa muntu shingiro kugira ngo hatagira n’umwe usigara ahutazwa. Ku rundi tuhande dukwiye guharanira ko ntawushaka ubuhunzi uhohoterwa.”

Ibyo ngo bisaba gushyiraho ingamba zifasha mu gukora ingendo zizira ingorane kandi n’uburyo umuntu yemererwa gukora ingendo mu mahanga bukaba busobanutse. Politiki zibanda gusa ku gufunga, guhambiriza ndetse no gutera ubwoba abantu zagaragaje ko zidashobotse mu bihe byahise, kandi ko zidashobora gutanga igisubizo kirambye.”

Hakenewe gutandukanya ubwimukira bwemewe n’ubutemewe

Perezida Kagame na mugenzi we Mitsotakis bemeza ko ari ingenzi cyane gutandukanya ibikorwa byo kwambuka imipaka mu buryo bwemewe n’uburyo butemewe kuko abambuka mu buryo bunyuranyije n’amategeko akenshi baba biganjemo abakora ibyaha birimo no gucuruza abantu.

Ni ingenzi ku migabane yombi gushyira hamwe mu gufunga imyoboro ya ba rushimusi, hagahagarikwa ibikorwa by’abagerageza kwambuka bajya i Burayi banyuze mu nzira  ya Mediterranee zitemewe kandi zibashyira mu kaga aho bamwe bahasiga ubuzima mu gihe hakomeza no kuba icyuho cyo guhembera ibikorwa by’abanyabyaha.

“[…] Ni ngombwa ko uko ibintu byifashe ubu bihagarara, aho abantu bihebye kandi akenshi bafite intege nke cyane bagerageza uru rugendo ruteye ubwoba. Kurinda imipaka neza, kurwanya imiyoboro y’ubugizi bwa nabi no gucunga neza abimukira ni ibintu by’ingenzi, hamwe n’imishinga ikemura intandaro yo kwimuka, guteza imbere ibikorwa remezo cyangwa koroshya itahuka ry’abantu badafite uburenganzira bwo gutura ku butaka bw’u Burayi. Izo ni inzego EU ifite byinshi yagiramo uruhare, cyane cyane binyuze mu kongera ubushobozi.”

Mu gihe abatuye Isi bakomeje guhura n’ibibazo bikomeye by’ahazaza nk’iyangirika ry’ibidukikije ndetse n’imihindagurikire y’ikirere, ubwimukira n’urujya n’uruza bishobora guhinduka kimwe mu bisubizo aho kuba ikibazo cy’ingorabahizi.

“[…] Amateka n’ubunararibonye byacu byatwigishije byinshi. Dukwiye kwibanda ku bikorwa bizazamura ukwigira kw’imiryango yacu ndetse hakabaho na politiki zikumira ibikorwa byimura abantu ku ngufu bitewe n’ibiza karemano, ubukene cyangwa ubwihebe, ari na ko twimakaza ubuhahirane ndetse n’urujya n’uruza rutanga inyungu ku mpande zombi.”   

Aba bayobozi bombi bemeza ko ahazaza hakwiye gushingira ku biganiro bifunguye, kubwizanya ukuri ndetse mbere y’ibindi byose hakaba hari umuhate wo guhanga udushya n’uwo kwiyemeza kuzuza inshingano zihuriweho n’imigabane yombi.

Bavuga ko uburyo bushyize mu gaciro, bufatika kandi bwuzuye ku bwimukira n’urujya n’uruza rw’abantu budashobora kugerwaho keretse iyo buyobowe n’amahame y’ubufatanye, gushyira hamwe ndetse n’inshingano zisangiwe, bishingiye ku kubahiriza uburenganzira bwa muntu n’amategeko mpuzamahanga.

Bityo ngo intego ihuriweho ku Burayi ndetse n’Afurika ni iyo kwiyemeza kudacogora mu guharanira imicungire y’ubwimukira iramba kandi ihamye, kimwe n’uburyo bugezweho bwo kugenzura urujya n’uruza

  • NTAWITONDA JEAN CLAUDE
  • Gashyantare 21, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE