Perezida Kagame, Biden, Macron, Trudeau… mu itabarizwa rya Elizabeth II

  • NTAWITONDA JEAN CLAUDE
  • Nzeri 19, 2022
  • Hashize imyaka 2
Image

Perezida wa Repubulika y’u Rwanda Paul Kagame, ni umwe mu Bakuru b’Ibihugu na Guverinoma baturutse mu mpande enye z’Isi bitabiriye umuhango wo gutabariza Umwamikazi Elizabeth II watanze ku ya 8 Nzeri 2022 afite imyaka 96.

Abo Bakuru b’Ibihugu bitabiriye uwo muhango bifatanyije n’umuryango w’ibwami ndetse n’abaturage b’u Bwongereza muri rusange mu bihe bitoroshye barimo, aho banatanze ubutumwa bwo kubakomeza no kubihanganisha bwanditswe mu gitabo cy’urwibutso.

Uretse Perezida Kagame, abandi Bakuru b’Ibihugu baraye i London mu Bwongereza barimo Perezida wa Leta Zunze Ubumwe z’Amerika (USA) Joe Biden, Perezida w’u Bufaransa Emmanuel Macron, Minisitiri w’Intebe wa News Zealand Jacinda Ardern, Perezida wa Singapore Halimah Yacob, Perezida wa Samoa Tuimaleali’ifano Va’aleto’a Sualauvi II, na Perezida wa Ireland Michael D Higgins.

Mu bandi baraye bahageze harimo na Perezida wa Brazil Jair Bolsonaro, Minisitiri w’Intebe wa Canada Justin Trudeau, Minisitiri w’Intebe wa Ukraine Denys Shmyhal, abayobozi baturutse muri Ghana, Afurika y’Epfo, Bengladesh no mu bindi bihugu byiganjemo ibihuriye mu Muryango w’Ibihugu bikoresha Icyongereza (COmmowealth).

Muri rusange, ubutumwa bwatanzwe n’abo Bakuru b’Ibihugu na za Guverinoma, bagaragaje uburyo imyaka 70 Umwamikazi yari amaze ku ngoma yabaye iyihariye, by’umwihariko ibihugu bya Commonwealth bikaba byarabonye impinduka bidahwema kugaragaza ko ari we zibikesha.

Bagaragaje uburyo yahesheje icyubahiro ingoma y’ubwami, ndetse bakaba bizeye ko inama n’ubuhanga bye bizakomeza kuyobora benshi mu rugendo n’icyerekezo abasigiye, banagaragaza ko bakomeza kwagura ubutwererane n’u Bwongereza bashingiye ku murage mwiza asigiye ubu bwami kuri ubu buyobowe n’Umwami Charles III.

Perezida Joe Biden nyuma yo gusinya mu gitabo cy’urwibutso rw’ubutumwa bw’ihumure bwatanzwe n’Abakuru b’Ibihugu na Guverinoma batandukanye

Ku Cyumweru imihanda yegereye ingoro y’ibwami i London, yari yakumiriwemo urujya n’uruza rw’abaturage basanzwe kubera abo banyacyubahiro baraye bahasesekaye, bakaba biteguye gukurikirana umuhango w’itabarizwa ry’Umwamikazi Elizabeth II mu masaha ari imbere kuri uyu wa Mbere taliki ya 19 Nzeri.

Umugogo w’Umwamikazi kuri ubu uruhukiye mu nyubako iherereye i Westminster, bikaba byitezwe ko Abakuru b’Ibihugu na Guverinoma bitabiriye baza kumusezeraho bwa nyuma bakanakurikirana umuhango wo kumutabariza.

Biba biteganyijwe ko abo Bakuru b’Ibihugu bose bazenguruka Umugogo w’Umwamikazi aho aruhukiye. By’umwihariko, u Rwanda nk’Igihugu kiyoboye Commonwealth mu myaka ibiri iri imbere, ahagana saa mbiri z’umugoroba wo ku Cyumweru rwifatanyije n’Ubwami bw’u Bwongereza mu munota wo kwibuka no gutekereza ku buzima bw’Umwamikazi.

U Rwanda ruri mu bihugu bya Commonwealth byifatanyije n’u Bwongereza muri ibi bihe bikomeye, aho mu Mujyi wa Kigali inyubako ya Kigali Convention Centre (KCC) yatse amabara y’umweru, ubururu n’umutuku mu kwifatanya n‘iki gihugu.

Ambasaderi w’u Bwongereza mu Rwanda Omar Daair, yavuze ko icyo gikorwa cy’ineza gisobanuye byinshi, ashimira Umuyobozi w’Umujyi wa Kigali washyigikiye u Bwongereza muri ibi bihe bikomeye bibanziriza itabarizwa ry’Umwamikazi.

Amb. Omar Daair yashimangiye ko Umwamikazi Elizabeth ataratanga yahozaga ku mutima Umuryango w’Ibihugu bikoresha Icyongereza (Commonwealth), ari na yo mpamvu banyuzwe cyane no kubona ibihugu bigize uyu muryango na byo bimuhoza ku mutima.

Mu gihe kuri uyu wa Mbere taliki ya 19 Nzeri mu Bwongereza habera umuhango wo kumutabariza, Perezida wa Repubulika y’u Rwanda Paul Kagame hamwe n’abandi bayobozi b’Ibihugu bya Commonwealth ndetse n’inshuti z’u Bwongereza baraye i Londres.

Amb. Omar Daair yavuze ko ari agahebuzo kubona uburyo ibihugu bigize uyu muryango byitabiriye gushyigikira u Bwongereza, by’umwihariko bakaba bakomejwe na Perezida Kagame kuri ubu ari na we Muyobozi wa Commonwealth mu gihe cy’imyaka ibiri.

Umwami Charles na we yashimiye ibihugu byose byagaragaje ko byifatanyije n’Ubwami bw’u Bwongereza, ati: “Mu myaka 10 ishize, njye n’umugore wanjye twakozwe ku mutima cyane n’ubutumwa bwinshi bwo kutwihanganisha no kudushyigikira haba ubwavuye muri iki gihugu ndetse n’ubwaturutse ku Isi yose.”

Yakomeje ashima buri gihugu ndetse na buri wese wagize uruhare mu kumukomeza no kumwihanganisha, by’umwihariko bakanagaragaza ko bifatanyije n’ingoro y’ibwami n’Igihugu muri rusange.

  • NTAWITONDA JEAN CLAUDE
  • Nzeri 19, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE