Nyaruguru: Batunguwe no kumva ko hari abantu bacuruza abandi

  • AKIMANA JEAN DE DIEU
  • Ukuboza 6, 2023
  • Hashize amezi 6
Image

Abahanga mu by’amategeko bavuga ko kutamenya amakuru ku cyaha bitakibuza kuba icyaha kandi ntibibuza itegeko gukora mu gihe kibaye, ariko hari benshi bisanga mu byaha batabizi harimo n’ibirebana n’icuruzwa ry’abantu kubera kutabisobanukirwa.

Abaturage batuye mu Murenge wa Ngoma, Akarere ka Nyaruguru, baravuga ko batari bazi ibijyanye n’icyaha cy’icuruzwa ry’abantu n’ingaruka zigishamikiyeho, bakaba batunguwe n’amakuru bahawe n’abakozi b’Urwego rw’Igihugu rw’Ubugenzacyaha (RIB).

Mu kiganiro bahaye Imvaho Nshya nyuma yo kuganirizwa n’Urwego rw’Igihugu rw’Ubugenzacyaha, bavuga ko nta makuru bari bafite babyumvaga gutyo bakumva ko byibera iyo mu mijyi.

Sikubwabo Augustin avuga ko ibijyanye n’iki cyaha cy’icuruzwa ry’Abantu atari abizi anatunguwe ku buryo umuntu yacuruza undi akemeza ko amakuru yahawe azamufasha gukumira iki cyaha aho atuye.

Yagize ati: “Ntabwo nari nzi ibijyanye n’iki cyaha ariko ndabyumvise ndatungurwa ahubwo ndibaza nti umuntu acuruza undi akabyemera gusa amakuru mpawe nzayakoresha neza kandi ngire uruhare mu kurwanya aba bacuruza abantu gusa mbona hano iwacu bitaraza”.

Mukansanga Brigitte avuga ko aya makuru y’icuruzwa ry’abantu nayumvaga ku maradiyo ariko amenye ububi bwabyo n’ingaruka bigira kuwashutswe akagurishwa akaba yabivaniramo ubumuga n’indwara zidakira.

Yagize ati: “Njyewe ndatunguwe kuko numvaga ko abantu bacuruzwa bivugwa na Radiyo simenye uko babigenza numvise biteye ubwoba uburyo bashobora no kugukuraho ingingo zimwe na zimwe zikagurishwa, ukaba wanakurizamo uburwayi budakira. Mfashe umwanzuro wo kutazahishira abashobora gutwara abana bacu tutabazi.”

Ntirenganya Jean Claude, Umuyobozi muri RIB ushinzwe gukumira ibyaha, avuga ko abaturage bakwiye kwirinda abantu bose babizeza ibya mirenge bagiye kubagezaho birimo kubaha akazi keza no guhembwa amafaranga meza bakajyanwa bahishwe .

Yagize ati: “Dukwiye gufunguka amaso tukirinda abantu bose batwizeza kuturangira akazi keza kazabahemba amafaranga menshi kuko ayo ni yo mayeri akoreshwa kugira ngo babashe kukujyana bakugurishe ukoreshwe imirimo y’agahato, ndetse banagukinishe Filime z’urukozasoni, kandi akenshi usanga bagucisha mu mayira ya rwihishwa kugira ngo imigambi yabo itamenyekana.”

Umuyobozi w’Akarere ka Nyaruguru Murwanashyaka Emmanuel, avuga ko muri aka Karere, bafite ibyambu 8 ku mugezi w’Akanyaru bishobora gukoreshwa n’abatwara abantu bakajya kubacuruza, akibutsa abaturage kuba maso bagakumira iki cyaha kitaraba kuko uwo gikorewe kimuhungabanya mu gihe atahaburiye ubuzima.

Yanakomeje abibutsa ko ntawukwiye gushukishwa ubuhendabana.

Ubuvugizi bwa RIB muri Mutarama 2023, bwatangaje ko hagati y’umwaka wa 2020 n’umwaka wa 2022 mu Banyarwanda 150 bacurujwe, abenshi bari abagore.

Mu mwaka wa 2020 uru rwego rwakiriye ibirego 33 by’abantu bakorewe icuruzwa byari birimo abantu 36 bacurujwe, ni ukuvuga abagabo bari barindwi n’ abagore 29.

Mu mwaka wakurikiyeho ni ukuvuga uwa 2021, imibare yariyongereye igera ku bantu 66 bakorewe icuruzwa. Muri bo abagabo ni 22, abagore bakaba 44.

Icyo gihe ibirego byagejejwe kuri RIB byari 17 naho mu mwaka wa 2022 abacurujwe bari 48 barimo abagabo batandatu n’abagore 42.

Iyi mibare yerekana ko abagore cyangwa abakobwa ari bo bakunze kujyanwa n’aba banyamayeri bakajya kubacuruza.

RIB ivuga ko mu bantu bacurujwe, abagera kuri 68 bafite imyaka iri munsi ya 18, mu gihe abandi 68 bafite hagati y’imyaka 18 n’imyaka 30 y’amavuko naho abandi 14 bari hejuru y’imyaka 30 y’amavuko.

Mu mwaka wa 2020, abacurujwe bafite munsi y’imyaka 18 y’amavuko bari abantu 15, naho abari bafite imyaka iri hagati ya 18-30 bari 17 mu gihe abarengeje imyaka 30 bari bane.

Mu mwaka wakurikiyeho wa 2021, Abanyarwanda 27 ni bo bacurujwe bafite munsi y’imyaka 18, naho abandi 32 bari bafite hagati y’imyaka 18-30 mu gihe barindwi bari bafite imyaka iri hejuru ya 30.

Imibare ya RIB y’umwaka ushizeigaragaza ko abantu 26 bari munsi y’imyaka 18 ari bo bacurujwe, mu gihe abandi bantu 19 bari hagati y’imyaka 18-30 bacurujwe naho batatu(3) bari hejuru y’imyaka 30 akaba ari bo bakorewe ibi bikorwa by’icuruzwa ry’abantu.

Abagenzacyaha bavuga ko Abanyarwanda[kazi] benshi bacuruzwa muri Aziya no mu Burasirazuba bwo hagati gusa hari n’abacuruzwa Mu Burengerazuba bwa Afurika.

  • AKIMANA JEAN DE DIEU
  • Ukuboza 6, 2023
  • Hashize amezi 6
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE