Nyamasheke: Umugore n’umuturanyi bararembye nyuma yo gutwikwa na gazi

  • BAHUWIYONGERA SYLVESTRE
  • Ugushyingo 22, 2023
  • Hashize amezi 6
Image

Umugabo witwa Amos w’imyaka 25 n’umugore witwa Manishimwe Adèle w’imyaka 34 babaga mu gipangu kimwe mu Mudugudu wa Rugaragara, Akagari ka Butare, Umurenge wa Gihombo, Akarere ka Nyamasheke, barembeye mu Bitaro bya Mugonero mu Karere ka Karongi nyuma yo gutwikwa na gazi bageragezaga gucana.

Mpagazehe Protais ushinzwe amakuru mu Mudugudu wa Rugaragara yatangarije Imvaho Nshya ko iyo mpanuka yabaye saa tatu z’igitondo cyo ku wa 21 Ugushyingo, ubwo Manishimwe Adèle yari agiye gucomeka gaze bikamunanira, akitabaza Amos ngo ayimucomekere bikarangira igurumanye

Manishimwe Adele asanzwe abana n’umwana we w’imyaka 2, n’umukozi wo mu rugo kuko umugabo we ngo yahamusize agiye kwiga hanze. Amos waje kumucomekera gazi we ngo asanzwe ari umuturanyi we uba mu yindi nzu yo muri icyo gipangu babanamo.

Mpagazehe ati: “Ntituzi niba icyumba twasanze iyo gazi yabatwikiyemo ari cyo yabagamo cyangwa Manishimwe yari yayihajyanye, ariko kuko afite gazi ebyiri yacometse agato karamunanira kanga kwaka, abwira uwo mugabo wari uri hanze ngo aze amucomekere iyo nini, aza gucomeka umugore amusiga acomeka ajya mu kindi cyumba.”

Yakomeje ati: “Umugabo agicomeka gaze yahise icumbeka umwotsi, icucumukamo umuriro mwinshi ugurumana imutwika ibice hafi ya byose by’umubiri iramwangiza bikomeye. Umugabo yatatse cyane ari gushya,umugore yumvise ataka aje yiruka kumutabara na we gazi ihita imufata imutwika  mu maso,amaboko n’amaguru irabyangiza  cyane bombi basohoka batabaza abumvise induru baza kubatabara.”

Avuga ko ari nk’amahirwe kuko gazi yari isigaje gato ngo iturike, ibyajyaga gutuma inzu zose zari aho zishya.

Ni bwo hahise haza umusore usobanukiwe neza ibya gazi arayizimya, abahiye bajyanwa ku Kigo Nderabuzima cya Kibingo, ariko bakihagera bakorerwa ubuvuzi bw’ibanze bahita boherezwa ku Bitaro bya Mugonero mu Karere ka Karongi kuko bari bababaye cyane bakeneye ubuvuzi bwisumbuye.

Bivugwa ko ku bw’amahirwe nta kindi cyari kiri hafi aho ngo kibe cyahiye, abatabaye bagerageza gukuramo ibyari mu nzu byose ntihagira na kimwe cyangirika.

Umunyamabanga Nshingwabikorwa w’Akagari ka Butare Uwamahoro Vestine, yabwiye Imvaho Nshya ko bababajwe n’ayo makuru y’abaturage bahiye bakoresha gazi mu gihe ari igikoresho cy’ingirakamaro mu muryango.

Yavuze ko Akagari ayobora gafite abaturage benshi bacana gazi kuko bazi akamaro kayo, karimo kurengera ibidukikije, kandi ko irinda imyotsi aho abantu batekera hagahora harangwa isuku.

Byanagaragaye ko gukoresha gazi bihenduka cyane kurusha gukoresha amakara, ikaba yanacanirwa aho ari ho hose mu rugo umuntu agateka byihuse.

Na we yemeza ko imbogamizi igihari ari iy’uko abaturage benshi baba badasobanukiwe uburyo ikoreshwa, bikaba biri mu biteza impanuka.

Ati: “Dukangurira abaturage babishoboye gukoresha gazi kubera ibyiza byayo byinshi, ariko kuko benshi bayitunga batazi uburyo ikoreshwa, hashobora kuvuka ibibazo ikaba yanatwika inzu n’abayirimo. Ni yo mpamvu dukangurira abayikoresha kumenya uburyo ikoreshwa neza ntibiteze impanuka.”

Ku bavuga ko bakurikije uko bumva hirya no hino gazi zitwika inzu zikanangiza ibindi birimo n’ubuzima bw’abazirimo, hashobora kuba hari iziza zitujuje ubuziranenge bazikoresha zigateza izi mpanuka, uyu Muyobozi yavuze ko atabyemeza, cyane ko ziba zaguzwe ku masoko azwi.

Ati: “Biduhaye isomo ryo gushaka ababizobereyemo, babyigishe abaturage, hato ubwo bagenda bakangukira kuzikoresha  biri no mu rwego rwo kurengera ibidukikije birinde impanuka za hato na hato zahaturuka.”

Gitifu Uwamahoro yavuze ko ari bwo bwa mbere humvikanye umuntu waba yagize impanuka ya gaze muri aka Kagari, mu gihe umubare w’abakoresha gazi wo ugenda wiyongera uko abantu basobanukirwa ibyiza byayo.

  • BAHUWIYONGERA SYLVESTRE
  • Ugushyingo 22, 2023
  • Hashize amezi 6
TANGA IGITEKEREZO
Theodomir says:
Ugushyingo 22, 2023 at 5:25 pm

Mbega Ibibazo Gaz ni nziza arko ni na mbi pe!

Andika igitekerezo

AMATEGEKO AGENGA IYANDIKA RY'IGITEKEREZO CYAWE