Niger: Igisirikare kirashinja ubugambanyi Perezida cyakoreye kudeta

  • Imvaho Nshya
  • Kanama 14, 2023
  • Hashize amezi 10
Image

Igisirikare cya Niger cyatangaje ko kigiye kujyana mu nkiko Mohamed Bazoum ashinjwa ubugambanyi bwo ku rwego rwo hejuru, nyuma y’amasaha make itsinda ry’intiti zikomeye z’Abayisilamu zivuze ko abayobozi bahiritse ubutegetsi bafunguye dipolomasi kugira ngo bakemure amakimbirane yabo n’Umuryango w’Akarere k’Afurika y’Iburengerazuba.

Nk’uko bitangazwa na Al Jazeera, mu itangazo ryasomwe kuri televiziyo y’Igihugu mu mpera z’icyumweru gishize, umuvugizi w’igisirikare cya Niger yavuze ko ibirego Bazoum aregwa ari “ubugambanyi bukabije no guhungabanya umutekano w’imbere mu gihugu no hanze”.

Bazoum w’imyaka 63 n’umuryango we, bafungiye mu rugo rwa Perezida i Niamey kuva ku munsi w’ihirikwa ry’ubutegetsi ku ya 26 Nyakanga, amahanga akaba ahangayikishijwe n’imibereho yabo muri urwo rugo bamazemo ibyumweru birenga bibiri.

Umuryango w’Ubukungu w’Ibihugu by’Afurika y’Iburengerazuba (ECOWAS) wasabye ko Bazoum yasubizwa mu kazi, ugaragaza ko ufatira ibihano by’ubukungu Niger n’abasirikare bakoze kudeta mu gihe batihutiye gusubiza ubuyobozi mu maboko y’abasivili. 

Umuryango ECOWAS wamaze kwemeza ko Niger yakohererezwa abasirikare biteguye kurinda ubusugire bw’Itegeko Nshinga, kandi unashimangira ko wiyemeje kugira uruhare mu gushaka igisubizo kirambye mu bya dipolomasi.

Ku Cyumweru, Umuvugizi w’igisirikare cya Niger Col. Maj. Amadou Abdramane, yikomye Abafite impungenge ku buzima bwa Bazoum, avuga ko Bazoum yabonanye na muganga we akagaragaza ko nta kibazo na kimwe afite.

Ati: “Nyuma y’uru ruzinduko, umuganga nta kibazo yigeze agaragaza ku bijyanye n’ubuzima bwa Perezida wavanyweho ndetse n’abagize umuryango we”.

Abdramane yakomeje yamagana ibihano ECOWAS yafatiye Niger, avuga ko ibyo bihano “bitemewe, nta bumuntu burimo kandi ari iterabwoba” kuko bituma abantu batabona imiti, ibyo kurya n’amashanyarazi.

Aya magambo yavuzwe nyuma y’amasaha make itsinda ry’intiti za kisilamu zo muri Nijer zitangaje ko zahuye n’Umuyobozi wayoboye Kudeta muri Niger Abdourahamane Tchiani i Niamey, zikavuga ko uyu Jenerali yemeye kugirana “ibiganiro bitaziguye” na ECOWAS.

Sheikh Abdullahi Bala Lau wari uyoboye intumwa za Niger, yabwiye Al Jazeera ko ubutumwa bwabo muri Niamey bwari bugamije gushyiraho “uburyo abayobozi b’ubutegetsi bwakoze kudeta muri Niger bazagirana ibiganiro n’abayobozi ba ECOWAS kugira ngo bumvikane”.

Mu nama yabo, Tchiani “yemeye kugirana ibiganiro byuzuye n’abayobozi ba ECOWAS”.

Intiti z’abayisilamu zasuye Niamey byemejwe na Perezida wa Nigeria Bola Tinubu, ari na we uyobora ECOWAS. Tinubu yafashe icyemezo gikomeye cyo kurwanya ihirikwa ry’ubutegetsi ribaye ku nshuro ya gatandatu mu bihugu bihuriye muri EACOWAS kuva mu mwaka wa 2020.

Uyu muryango wahagaritse ibikorwa by’imari, guhererekanya amashanyarazi na Niger ndetse ufunga n’imipaka, bikumira ibicuruzwa bikenerwa cyane muri kimwe mu bihugu bikennye cyane ku Isi.

Mali na Burkina Faso bituranye na Niger, na byo biyobowe n’abasirikare bahiritse ubutegetsi, aho avuga ko gutabara bizaba ari nko gutangaza intambara kuri bo.

Tchiani yohereje intumwa ziyobowe n’Umuyobozi Mukuru w’ingabo, Gen. Moussa Salaou Barmou, mu Murwa Mukuru wa Gineya-Conakry, gushimira abayobozi baho ku nkunga yabo, kikaba ari ikimenyetso cy’uko abayobozi bakoze kudeta bakomeje kunga ubumwe mu gihe bahagurukiwe n’imbaraga ziturutse mu Karere no ku rwego mpuzamahanga.

Yanditswe na MUKUNDWA RUTAGENGWA PHIONAH

  • Imvaho Nshya
  • Kanama 14, 2023
  • Hashize amezi 10
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE