Ngororero: Ibikorwa remezo bitameze neza biteza ibihombo amakoperative

  • NYIRANEZA JUDITH
  • Mutarama 12, 2024
  • Hashize amezi 2
Image

Aborozi bibumbiye muri Koperative y’Aborozi mu Murenge wa Muhanda KAMU bahura n’igihombo baterwa n’imihanda mibi idatuma bageza umukamo ku ruganda ruyatunganya.

Byagarutsweho mu kiganiro abanyamuryango b’iyi koperative igizwe n’abanyamuryango 374 bagiranye n’itsinda ry’Abasenateri babasuye mu Murenge wa Muhanda mu rwego rwo kugenzura uburyo amakoperative afasha abanyamuryango kwiteza imbere.

Itsinda rigizwe na ba Senateri Uwizeyimana Evode na Dusingizemungu Jean Pierre bagaragarijwe ikibazo cy’imihanda itari nyabagendwa mu gihe cy’imvura bityo umusaruro w’amata ugatinda kugera ku ruganda rwa Mukamira Dairy bigatera igihombo.

Uwagaragaje imiterere ya KAMU yagize ati: “Koperative KAMU duhomba miliyari 2 ku mwaka kubera imihanda mibi ituma umusaruro w’amata utagera neza ku ruganda ruwutunganya rwa Mukamira Dairy”.


Ni mu gihe kandi abanyamuryango ba Koperative y’Abahinzi Borozi mu Kagari ka Mwendo mu Murenge wa Kabaya KABKAM, bo bafite ikibazo cyo kutagira amashanyarazi ndetse n’ikibazo cy’imbuto y’ibirayi idahagije.

Abasenateri babijeje ubuvugizi ibibazo bikazabonerwa ibisubizo.

Ku munsi wa 2 w’uruzinduko rwabo bagiranye inama n’abayobozi b’amakoperative mu Mirenge, bagaragarijwe aho amakoperative yavuye n’aho ageze.

Mu mbogamizi zagaragajwe harimo imihanda b’ibiraro bitameze neza by’umwihariko mu gihe cy’imvura bituma umusaruro unyuranye utagera ku masoko, ubuhunikiro budahagije, ibiryo by’amatungo bigihenze, amahugurwa adahagije ku banyamuryango b’amakoperative.

Mu kiganiro kirambuye abasenateri bagiranye n’abitabiriye inama hunguranywe ibitekerezo ku mikorere y’amakoperative, imbogamizi ahura nazo n’uburyo zishakirwa ibisubizo.

Abanyamuryango ba KAMU bagaragaje ko imbogamizi z’imihanda zivuyeho bagira n’uruhare mu kurwanya imirire mibi mu bana ikiboneka mu Karere ka Ngororero.

Umuyobozi w’Akarere ka Ngororero Nkusi Christophe yagaragaje ko hari imishinga migari nk’uw’amazi n’amashanyarazi izavanaho imbogamizi zikiboneka mu iterambere ry’imibereho myiza y’abanyamuryango.

Yagize ati: “Mu Karere hari imishinga migari y’amazi n’amashanyarazi, bizafasha gukemura ibyo bibazo”.

Bagiriwe inama yo kwigiranaho hagati y’amakoperative ubwayo ndetse no hagati y’uturere.

Abasenateri bishimiye urugendo bagize bavuga ko basanze abanyangorero bacyeye haba ku muburi no mu bitekerezo.

Akarere ka Ngororero gafite amakoperative 134 arimo 29 y’ibihingwa ngandurarugo na 48 y’ubworozi. Hari kandi n’ay’ibihingwa ngengabukungu nk’icyayi na kawa.

Abanyamuryango b’amakoperative bagera ku 117,000 bingana na 30% by’abaturage b’Akarere.

  • NYIRANEZA JUDITH
  • Mutarama 12, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE