Mushikiwabo yahawe umudali kubera imiyoborere myiza ya OIF

  • Imvaho Nshya
  • Ukwakira 4, 2023
  • Hashize amezi 8

Umunyarwandakazi Louise Mushikiwabo akaba n’Umunyamabanga Mukuru w’Umuryango w’Ibihugu bikoresha urimi rw’Igifaransa ku Isi (OIF), yahawe umudali n’igihugu cya Romania ashimirwa uruhare yagize mu gushimangira umubano mwiza  wa Romania  n’Umuryango ayoboye.

Uyu mudali Mushikiwabo yahawe wiswe “National Order Star of Romania”, ni uwo ku rwego rwa kabiri mu byitwa Grand Cross Romania yamushimiye ko yagaragaje ubwitange mu guharanira ko OIF ikomeza kwimakaza umubano n’icyo gihugu.

Uyu mudali wa National Order Star of Romania watangiye gutangwa ku itariki ya 10 Gicurasi 1877, ukaba ari wo mudali wa mbere watanzwe ku mugaragaro na Leta ya Romania.

Ubusanzwe uyu mudali uhabwa abasirikare n’abasivili kubera ibikorwa by’indashyikirwa bakoreye igihugu cya Romania.

Ku wa Mbere tariki ya 2 Ukwakira 2023 ni bwo Perezida wa Romania Klaus Iohannis yashyize umukono ku iteka ryo guha uwo mudali Mushikiwabo.

Leta ya Romania yatangaje ko Umukuru w’Igihugu cya Romania ari we wahaye Umunyamabanga Mukuru wa Francophonie uyu mudali mu gihe cyo kwizihiza isabukuru y’imyaka 30 ishize Romania iri Umunyamuryango wa Francophonie.

Itangazo ryashyizwe ahagaragara riragira riti: “Ni ikimenyetso cyo gushimira byimazeyo ubufatanye buhoraho yimakaje n’abayobozi ba Romania, bigaragaza uruhare runini igihugu cyacu gifite mu guteza imbere indangagaciro n’amahame y’Umuryango mpuzamahanga wa Francophonie (OIF) “.

Louise Mushikiwabo yakiriwe na Perezida Klaus Iohannis mu ngoro ya Cotroceni kandi yitabira n’umuhango wo gutangiza Ingoro ya Francophonie.

  • Imvaho Nshya
  • Ukwakira 4, 2023
  • Hashize amezi 8
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE