Muhanga: Uwakekwagaho kubagira mu rugo inka z’inyibano yarekuwe by’Agateganyo

  • NTAWITONDA JEAN CLAUDE
  • Gashyantare 9, 2024
  • Hashize ibyumweru 3
Image

Niyonsaba Landuard w’imyaka 56 y’amavuko, umwe mu bagabo babiri bari bafungiwe kwiba inka bakazibagira mu rugo, yarekuwe by’agateganyo n’Urukiko rw’Ibanze rwa Nyamabuye.

Umwanzuro wafashwe kuri uyu wa Gatanu tariki ya 9 Gashyantare mu rubanza rwasomwe ahagana saa sita z’amanywa, ku cyicaro gikuru cy’Urukiko rw’Ibanze rwa Nyamabuye ruherereye mu Kagari ka Gitarama, Akarere ka Muhanga.

Urukiko rwemeje ko ibyagezweho bitagize impamvu zikomeye zituma Niyonsaba Landouard akekwaho icyaha cyo kwiba, ko nta mpamvu zikomeye zihari zatuma akurikiranwa afunzwe.

Urukiko rwemeje kandi rutegeka ko Niyonsaba afungurwa by’agateganyo agakurikiranwa ari hanze.

Hari hashize iminsi 21 hafunzwe abagabo babiri barimo na Simparingabo Emmanuel w’imyaka 42 bakurikiranyweho ibyaha byo kwiba inka no kuzibagira mu rugo rwa Niyonsenga ruherereye mu Mudugudu wa Samuduha Akagari ka Gifumba mu Murenge wa Nyamabuye.

Ifatwa ry’aba bagabo ryabaye ku wa 17 Mutarama 2024 hagati ya saa kumi n’imwe n’igice na saa kumi n’ebyiri n’igice za mu gitondo, ku bufatanye bw’Inzego zitandukanye zirimo n’iz”umutekano.

Mu iburana ku ifungwa n’ifungurwa ryabaye tariki ya 06 Gashyantare 2024 Niyonsaba yaburanye agaragaza ko ajya kubagira inka mu rugo yari yavunitse ku itariki ya 14 Mutarama 2024 ariko abimenyesha ubuyobozi bw’ibagiro rya Misizi.

Ubuyobozi bw’iryo bagiro bwanijeje ko bamwoherereza muganga w’amatungo wagombaga kuza kumupimira iyo nka yari yaguze n’uwitwa Mudacumura Rongin.

Uyu mugabo Niyonsaba yagaragaje ko afite ibimenyetso byose bigaragaza uko yishyuye amafaranga y’iseta yo kubagirwaho inka yahindutse iwe mu rugo ndetse akaba yari yemerewe n’Umuyobozi w’ibagiro ubu unafunzwe kubera ibindi bibazo by’ubucuruzi bw’inyama bukorwa buryo butemewe.

Niyonsaba warekuwe avuga ko agiye kwitwararika agakora ubucuruzi bwemewe bw’inyama kandi ngo n’iyo yagira ikibazo cy’inka azagura ikavunika atazongera kuyibaga hatari ubuyobozi bw’Inzego z’ibanze.

Yagize ati: “Ngiye kwitwararika nkore ubucuruzi bwanjye bw’inyama kandi bwemewe kuko mbonye ko kujya hariya ukurikiranyweho ibyaha byo kwiba inka no kuzica urw’agashinyaguro, byanteye ubwoba kandi iyo nabaze nari nayiguze mfite n’uruhushya ariko mu gihe bizambaho nzayibagisha hari Inzego z’ibanze kugira ngo ntafungwa.”

Iki cyemezo cyasomewe mu ruhame ku Rukiko rw’ibanze rwa Nyamabuye ndetse ubushinjacyaha n’uwarekuwe bibutswa ko bagomba kukijuririra mu minsi itanu.

  • NTAWITONDA JEAN CLAUDE
  • Gashyantare 9, 2024
  • Hashize ibyumweru 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE