Muhanga: Kabgayi hari abarwayi bataha batabonye serivisi z’ubuvuzi

  • AKIMANA JEAN DE DIEU
  • Ugushyingo 21, 2023
  • Hashize amezi 3
Image

Bamwe mu barwayi bajya gusaba serivisi ku bitaro bya Kabgayibaravuga ko serivisi barimo guhabwa ari mbi ndetse bakemeza ko bigeze naho uje kwivuza ataha adahawe serivisi z’ubuvuzi yaje ashaka. 

Mu kiganiro Imvahio Nshya yagiranye n’abaje kuhivuriza bemeza ko babwirwa gutaha kubera ko nta baganga bahari, naho  abaganga bahakorera bavuga ko umushahara bahabwa ari muke ndetse n’uburyo bwo gushyiramo uwakavuyemo bigoranye cyane.

Umurwayi witwa Mukamana Concilie avuga ko yaje kwivuza ku itariki ya 16 Ugushyingo 2023 ahabwa gahunda yo kugaruka ku munsi ukurikiyeho nabwo aragaruka ntiyavurwa.

Ati: “Njyewe naje kwivuza hano ku itariki 16 Ugushyingo 2023 ariko nahawe gahunda yuko nimero zashize ngomba kuzagaruka ku munsi ukurikiyeho nabwo ndagaruka biragorana kumvura mpitamo kwivuza mu ivuriro ryigenga rikorera mu karere ka Muhanga kandi nabaga mvuye mu Ngororero”.

Ruberwa Paulin ni umurwayi wari kuri ibi bitaro avuga ko yahaje avuga ko yaje kwivuza afite gahunda n’umuganga w’inzobere ariko ntiyavurwa asabwa kugaruka bucyeye.

Ati: “Naje hano ku itari ya 16 Ugushyingo 2023 nje kwivuza mfite gahunda ya muganga w’Inzobere ariko narahageze ndategereza sinagerwaho,  bambwira ko nagaruka  bucyeye bwaho ndaza baramvura kuko naraye ku bitaro gusa serivisi zitangirwa kuri ibi bitaro bya Kabgayi ntabwo zinoze kuko ikigaragara ni uko nta bakozi bahari rwose bivuze ko ushobora kuza urembye ukahaburira ubuzima kuko uhamara hejuru y’amasaha arenga 6 utegereje”.

Munyantore Jean Paul avuga ko kwivuriza i Kabgayi bigoranye cyane kuko usanga ubwinshi bw’abarwayi buruta inshuro amajana ababavura.

Yagize ati: “Rwose biragaragara ko kwivuriza ku bitaro bya Kabgayi biragoye kuko usanga hari abarwayi amajana baruta ababavura kuko ushobora kuzinduka ukahagera ahagana saa kumi n’imwe za mugitondo  ukahava saa munani z’amanywa, kuko ushobora no gusuzumwa ugatanga ibizamini bikaza nyuma y’ikogoroba noneho ugatangira urugamba rwo kujya kwishyura, a nabyo usanga bigoranye kubera bakozi bacye n’abahari bagatanga serivisi mbi”.

Umwe mu baganga bahavura yabwiye Imvaho Nshya ko ibitaro bya Kabgayi byazamuriwe urwego bikaba ibitaro byigisha byo ku rwego ra Kabiri (Teaching Hospital Lev II) ariko abakozi n’imishahara byagombaga kujyana n’urwego rwabyo bitahindutse.

Umuyobozi Mukuru w’Ibitaro bya Kabgayi, Dr Muvunyi Jean Baptiste avuga ko bagerageza gutanga serivisi uko bikwiye ariko kandi bafite ikibazo gikomeye kijyanye n’abakozi bake, harimo abaganga b’inzobere n’abavura indwara mu buryo bwa usange.

Yagize ati: “Tugerageza gutanga serivisi nziza kubazibona batugana ariko dufite ikibazo gikomeye cy’abaganga bake kuko nk’ubu dufite abaganga b’inzobere bagera  kuri 11 kuri  30 dukeneye,tukagira abaganga bavura rusange 8 kuri 30 twakabaye dufite kandi abagera kuri 3 bagiye kujya gukomeza amasomo ku nkunga ya Minisiteri y’Ubuzima nk’uko bigaragara ni  uko tudashobora guhaza abatugana bose”.

Akomeza avuga ko mu kuziba icyuho cy’abaganga Minisiteri irimo kwigisha benshi kugira ngo babashe kuzaziba iki cyuho ariko na none abazajya kwiga mu kwezi kwa Ukuboza 2023, kugeza ubu ntabwo twizeye ko bazahita basimburwa kuko nta baganga bashya bari ku isoko.

Ubusanzwe ibi bitaro byakira abarwayi bava mu Turere twa Kamonyi, Ruhango na Ngororero, abasaba serivisi bakaba benshi ku buryo ku munsi ibi bitaro byakira abari hagati ya 200 na 260 harimo abasaga 30 bivuza bakaba barara mu bitaro.

AKIMANA JEAN DE DIEU

  • AKIMANA JEAN DE DIEU
  • Ugushyingo 21, 2023
  • Hashize amezi 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE