Muhanga: Hegitari 233 zitahingwaga zahawe abahinzi

  • AKIMANA JEAN DE DIEU
  • Ugushyingo 21, 2023
  • Hashize amezi 6
Image

Ubutaka bwari busanzwe budahingwa bufite hegitari zisaga 233 buri mu Mirenge itandukanye y’’Akarere ka Muhanga bumaze guhingwaho bimwe mu bihingwa byiganjemo ibinyabijumba nk’uko abaturage babisabye.

Mu kiganiro bagiranye n’Imvaho Nshya bavuga ko bashimira ubuyobozi kuko babugejejeho igitekerezo cyo guhinga ibinyabijumba bitagihingwa ahabonetse hose bitewe no guhuza ubutaka bakavuga ko bizabafasha cyane mu kwihaza mu biribwa.

Rwakayiro Evariste avuga ko ubu butaka butahingwaga bugiye kubafasha guhinga ibihingwa byari birimo gukendera.

Yagize ati: “Hari hashize igihe kirekire ubu butaka budahingwa ariko batwemereye ko duhingamo bimwe mu bihingwa byari biri mu marembera kubera ko aho twabihingaga mu bishanga hahujwe bikagenerwa guhingwamo ibihingwa byatoranyijwe bihingwa ku butaka buhuje harimo ibigori, umuceri n’ibindi bitandukanye”.

Munyaneza Jean de la Croix avuga ko bishimishije kuko ubu butaka bwari bwararaye kandi bukwiye guhingwa ariko kuba bagiye kubuhingaho ibijumba, amateke, ibinyamayogi n’imyumbati.

Ati: “Turishimye cyane rwose kuko ubu butaka bwari bwararaye budahingwa, ariko icyo twishimira ni uko batwemereye ko duhingaho ibihingwa birimo ibijumba, amateke, ibinyamayogi, imyumbati kandi hari naho bahinze ibirayi “.

Rudakubana Pontien avuga ko kuba baremerewe guhinga ubutaka butahingwaga bizatuma haboneka ibiribwa ku buryo umucyo ubonetse bakeza cyane byatuma ibiciro bigabanyuka ku isoko.

Ati: “Hari bamwe mu baturage batahingaga ubutaka bwabo kubera intege ariko baraganirijwe barabyumva ndetse hakaba n’abandi bafite ubutaka bufite bene bo bemeye kubuha abandi baturage bakabuhinga bizadufasha kubona ibiribwa, ubundi mu bishanga twahingagamo ibihingwa bihingwa ku butaka buhujwe ariko hano ni uguhinga ibyo ushatse”.

Umuyobozi w’Akarere ka Muhanga wungirije ushinzwe iterambere ry’ubukungu Bizimana Eric avuga ko mu ibarura ryakozwe basanze bafite hegitari 233.5 zitahingwaga, bemereye abaturage guhingaho ibihingwa bihitiyemo.

Ati: Mu ibarura ryakozwe habonetse hegitari 233,5 twararebye dusanga abaturage bakwihitiramo ibyo guhinga benshi bahitamo guhinga ibinyabijumba bizunganira indi myaka izaba yeze ku butaka bwari busanzwe buhingwa.

Ibihingwa byahinzwe kuri izi hegitari twizeye ko tuzabona umusaruro ukwiye ukazafasha abaturage bacu bakabona ibyo bafungura bagasagurira n’amasoko”.

Yongeyeho ko iyo mirima itari ihinze yari hegitari 233,5 yari yararaye ndetse ari ho babashije kubarura kandi hakaba harahinzwe ku kigero cya 83%, hahingwa ibihingwa birimo ibijumba, amateke n’ibindi.

AKIMANA JEAN DE DIEU

  • AKIMANA JEAN DE DIEU
  • Ugushyingo 21, 2023
  • Hashize amezi 6
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE